(ស្ទឹងត្រែង)៖ មន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែងនៅថ្ងៃទី១២ ខែមករា ឆ្នាំ២០២០៣នេះ បានរៀបចំពិធីសន្និបាតបូកសរុបការងារឆ្នាំ២០២២ និងលើកទិសដៅការងារអនុវត្តឆ្នាំ២០២៣ ក្រោមអធិបតីភាពលោក ហ៊ាន វណ្ណហន រដ្ឋលេខាធិការតំណាងលោក ឌិត ឌីណា រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ និងមានការចូលរួមពីលោក ស៊ី សួន អភិបាលរង និងជាតំណាងលោក ស្វាយ សំអ៊ាង អភិបាលខេត្តស្ទឹងត្រែង រួមទាំងមានការចូលរួមពីលោក លោកស្រី ប្រតិភូអមដំណើរ តំណាងក្រុមហ៊ុន អង្គការ និងមន្ត្រីនៃមន្ទីរកសិកម្ម។
បន្ទាប់ពីលោក ទុំ នីរ៉ូ ប្រធានមន្ទីរកសិកម្មរុក្ខាប្រមាញ់ និងនេសាទខេត្តស្ទឹងត្រែង ដែលបានលើកឡើងពីលទ្ធផលសម្រេចបាន និង បញ្ហាប្រឈមនាពេលអនុវត្តកន្លងមក ព្រមទាំងលើកនូវទិសដៅសម្រាប់អនុវត្តឆ្នាំ២០២៣រួចមក, លោក ស៊ី សួន ក៏បានធ្វើការកោតសសើរ ដល់ថ្នាក់ដឹកនាំ និងមន្រ្តីរាជការទាំងអស់ នៃមន្ទីរកសិកម្ម អំពីលទ្ធផលសម្រេច ជោគជ័យក្នុងវិស័យកសិកម្ម រុក្ខាប្រមាញ់ និងនេសាទខេត្តក្នុងឆ្នាំ២០២២កន្លងទៅ ដោយសារការខិតខំប្រឹងប្រែងក្នុងកិច្ចសហការសម្របសម្រួលនិងបំពេញការងារ ព្រមទាំងការលះបង់កម្លាំងកាយចិត្ត ចុះផ្សព្វផ្សាយ អប់រំ និងទប់ស្កាត់ បង្ក្រាបបទល្មើសលើការងារព្រៃឈើ ជលផល និងការកាប់រានដីព្រៃលិចទឹក ដែលមានការសហការល្អ ជាមួយ សមត្ថកិច្ចពាក់ព័ន្ធ និងអាជ្ញាធរដែនដីផងដែរ។
ថ្លែងនាឱកាសនោះដែរលោក ហ៊ាន វណ្ណហន ក៏បានធ្វើការវាយតម្លៃខ្ពស់ចំពោះលទ្ធផលដែលមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង អនុវត្តបានក្នុងឆ្នាំ២០២២កន្លងមក និងបានលើកឡើងពីផលិតភាពកសិកម្ម ដែលមន្ទីរគ្រប់គ្រងបានល្អ ដើមី្បបម្រើនូវតម្រូវការក្នុងប្រទេស និងការនាំចេញ ព្រមទាំងធានានូវគុណភាព សុវត្ថិភាព តាមរយៈកាលលើកកម្ពស់ការផលិតស្បៀង និងបង្កើនតម្លៃបន្ថែម ក្នុងការពង្រីកការប្រកួតប្រជែងនៅទីផ្សារ ព្រមទាំងរក្សាតុល្យភាពការប្រើប្រាស់ដីកសិកម្ម និងធានាការគ្រប់គ្រងធនធានធម្មជាតិ ប្រកបទៅដោយនិរន្តរភាព ។
លោក ហ៊ាន វណ្ណហន ក៏បានណែនាំដល់អង្គសន្និបាតទាំងមូល ដែលបានលើកយកនូវបញ្ហាដែលមាននៅតាមមូលដ្ឋានបានជួបប្រទះ យកមកធ្វើការពិភាក្សា ដើមី្បរិះរកនិតិវិធីក្នុងការដោះស្រាយ និង ជាយន្តការមួយសម្រាប់យកទៅអនុវត្តក្នុងឆ្នាំ២០២៣នេះឲ្យទទួលបានប្រសិទ្ធភាព និងប្រសិទ្ធផលផងដែរ៕
