(កំពង់ធំ)៖ លោកស្រីបណ្ឌិត ជា សិរី អគ្គនាយកបច្ចេកទេសធនាគារជាតិនៃកម្ពុជា នៅថ្ងៃទី១១ ខែមករា ឆ្នាំ២០២៣នេះ បានចុះជួបសំណេះសំណាលជាមួយសិស្សានុសិស្ស ប្រឡងជាប់ជាប់សញ្ញាបត្រមធ្យមសិក្សាទុតិយភូមិ (បាក់ឌុប) ចំនួន៤៥១រូប ក្នុងស្រុកសន្ទុក ខេត្តកំពង់ធំ។
ក្នុងឱកាសជួបសំណេះសំណាលនេះ លោកស្រីបណ្ឌិត ជា សិរី បានចូលរួមអបអរសាទរ ដល់សិស្សានុសិស្ស ប្រឡងជាប់ជាស្ថាពរ និងចាត់ទុកលទ្ធផលប្រឡង របស់សិស្សានុសិស្សទាំង៤៥១រូប ដែលប្រឡងជាប់សញ្ញាបត្រមធ្យមសិក្សាទុតិយភូមិថា មិនមែនជាជោគវាសនាទេ ប៉ុន្តែជាការវាស់ស្ទង់សមត្ថភាពពិតៗ របស់ប្អូនម្នាក់ៗក្នុងការខិតខំសិក្សាកន្លងមក។
លោកស្រីបណ្ឌិត ជា សិរី បានថ្លែងថា ជោគជ័យរបស់ប្អូនៗបានបង្ហាញឲ្យឃើញពី ស្មារតីតស៊ូ អត់ធ្មត់ ខិតខំប្រឹងប្រែង និងយកចិត្តទុកដាក់រៀនសូត្រ រហូតបានសម្រេចលទ្ធផលជាវិជ្ជមាននេះ។ ការខិតខំព្យាយាមរៀនសូត្ររបស់ប្អូនៗ ពិតជានាំមកនូវកិត្តិយស និងសេចក្តីថ្លៃថ្នូរជូនក្រុមគ្រួសារប្អូនៗ និងសង្គមជាតិ ពិសេសក្នុងស្រុកសន្ទុក ខេត្តកំពង់ធំ។
ក្នុងនោះលោកស្រីបណ្ឌិត បាននាំមកនូវការផ្តាំផ្ញើសាកសួរសុកទុក្ខ និងជូនពរពីសំណាក់លោក ជា ចាន់តូ ទេសាភិបាលធនាគារជាតិនៃកម្ពុជា ជូនលោកនាយក នាយករង និងប្អូនៗទាំងអស់ ព្រមទាំងក្រុមការងារថ្នាក់មូលដ្ឋាន និងក្រុមការងារធនាគារជាតិទាំងអស់ ដែលចំណាយពេលវេលាដ៏មានតម្លៃ និងបានលះបង់ទាំងកម្លាំងកាយ កម្លាំងចិត្ត និងពេលវេលា រួមចំណែកយ៉ាងសកម្ម ជាមួយថ្នាក់ដឹកនាំគណបក្សប្រជាជនកម្ពុជាក៏ដូចជា ថ្នាក់ដឹកនាំធនាគារជាតិ ក្នុងការងារគណបក្ស សង្គម សាសនា និងការងារយុវជន។
ជាការលើកទឹកចិត្ត ដល់សិស្សដែលប្រឡងជាប់បាក់ឌុបទាំង៤៥១នាក់ លោកស្រីបណ្ឌិត ជា សិរី ផ្ដល់ជូនកុំព្យូទ័រយួរដៃ ដល់សិស្សនិទ្ទេសAចំនួន២នាក់ ក្នុងម្នាក់ៗមួយគ្រឿង សិស្សនិទ្ទេសBចំនួន២២នាក់ ម្នាក់ៗទទួលបានថវិកា១០ម៉ឺនរៀល និងអ្នកជាប់និទ្ទេសបន្តបន្ទាប់ម្នាក់ៗ២ម៉ឺនរៀល។
លោកស្រីបណ្ឌិត ជា សិរី ក៏បានឧបត្ថម្ភ ដល់លោកនាយក នាយរង លោកគ្រូអ្នកគ្រូ និងមន្ត្រីការិយាល័យអប់រំស្រុក៣៤នាក់ ដោយម្នាក់ៗទទួលបានអាវរងារមួយ និងថវិកា៣ម៉ឺនរៀល និងបានឧបត្ថម្ភសាលាស្រុកថវិកា៥០ម៉ឺនរៀល និងប្រតិទិន៥០ក្បាល។
សូមបញ្ជាក់ថា តាមរបាយការណ៍របស់លោកឡង គីសឹង អភិបាលស្រុកសន្ទុក បានឲ្យដឹងថា ក្នុងស្រុកសន្ទុកមានបេក្ខជន ចូលរួមប្រឡងចំនួន៦១៣នាក់ ជាលទ្ធផលអ្នកប្រឡងជាប់មានចំនួន៤៥១នាក់ ស្មើនឹង៧៣,៨១% បើយប្រៀបធៀបទៅនឹងឆ្នាំសិក្សា២០២០-២០២១កន្លងទៅគឺខ្ពស់ជាង៤,៦៧% ក្នុងនោះមានសិស្សស្រីចំនួន២រូប មកពីវិទ្យាល័យកំពង់ថ្ម១រូប និង១រូបទៀតមកពីវិទ្យាល័យតាំងក្រសាំង ទទួលបាននិទ្ទេសA៕
