(បន្ទាយមានជ័យ)៖ លោក បោន ប៊ិន សមាជិកអចិន្ត្រៃយ៍គណបក្សខេត្តបន្ទាយមានជ័យ និងជាប្រធានក្រុមការងារគណបក្សចុះមូលដា្ឋនស្រុកភ្នំស្រុក នៅព្រឹកថ្ងៃទី៧ ខែមករា ឆ្នាំ២០២៣នេះ បានអញ្ជើញជាអធិបតីភាពពិធីប្រកាសបញ្ចូលសមាជិកថ្មី នៃគណបក្សប្រជាជនកម្ពុជា ចំនួន១,០៣៤នាក់ ដែលជាអតីតអ្នកគាំទ្រគណបក្សនយោបាយផ្សេងៗ នៅក្នុងស្រុកភ្នំស្រុក មកសុំចូលមករួមរស់ជីវភាពជាមួយគណបក្សប្រជាជនកម្ពុជា។
ពិធីប្រកាសបញ្ចូលសមាជិកគណបក្សប្រជាជនកម្ពុជាថ្មីទាំង១,០៣៤នាក់នេះ ក៏មានការអញ្ជើញចូលរួមពីសំណាក់ក្រុមការងារចុះជួយស្រុកភ្នំស្រុក ប្រធានគណៈកម្មការគណបក្សប្រជាជនកម្ពុជាស្រុក សមាជិក-សមាជិកាបក្សនៅមូលដ្ឋានផងដែរ។
តំណាងសមាជិកទាំង ១,០៣៤នាក់ ដែលស្ម័គ្រចិត្តរួមរស់ជីវភាពជាមួយគណបក្សប្រជាជនកម្ពុជា បានលើកឡើងដោយបានមើលឃើញយ៉ាងច្បាស់នូវគោលនយោបាយដឹកនាំរបស់គណបក្សប្រជាជនកម្ពុជា ក្រោមការដឹកនាំប្រកប ដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជនកម្ពុជា ដែលបាននាំមកនូវសន្តិភាពពេញលេញជូនមាតុភូមិ ព្រមទាំងបានអភិវឌ្ឍន៍ប្រទេសជាតិ លើគ្រប់វិស័យឱ្យមានការរីក ចម្រើនលើគ្រប់វិស័យឱ្យប្រែប្រួលឆាប់រហ័ស គួជាទីមោទនភាពក្រៃលែង។ ដោយពិនិត្យឃើញជាក់ច្បាស់យ៉ាងដូច្នេះ ពួកគាត់មានជំនឿជឿជាក់លើការដឹកនាំរបស់សម្តេចតេជោ ហ៊ុន សែន ក៏បានសម្រេចចិត្តចូលរួមជីវភាព នយោបាយជាមួយគណបក្សប្រជាជនកម្ពុជា ដោយឥតងាករេជារៀងរហូត។
នាឱកាសនោះលោក បោន ប៊ិន ក៏បានថ្លែងនូវអំណរគុណចំពោះសមាជិកថ្មី ដែលបានស្ម័គ្រចិត្តរួមរស់ជីវភាពរបស់គណបក្សប្រជាជនកម្ពុជាផងដែរ។ ជាមួយគ្នានោះ លោកបានរំឮកពីប្រវិត្តការតស៊ូរបស់កម្ពុជា ដែលបានហែល ឆ្លងកាត់សង្រ្គាមរ៉ាំរ៉ៃការកាប់សម្លាប់ជាតិសាសន៍ឯងយ៉ាងសាហាវព្រៃជាទីបំផុត ពីរបបខ្មែរក្រហម ប៉ុល ពត។
លោក បោន ប៊ិន បានបញ្ជាក់ថា ដោយមានស្មារតីជ័យជំនះ ៧ មករា គឺជាការផ្តល់កំណើតទី២ របស់ប្រជាជនកម្ពុជា បានធ្វើឱ្យប្រជាពលរដ្ឋមានឱកាសជួបជុំគ្នាយ៉ាងសប្បាយរីករាយ គ្មានការភ័យខ្លាច និងមានការអភិវឌ្ឍ គ្រប់ទីកន្លែង ក្រោមកិច្ចខិតខំប្រឹងប្រែងរបស់ប្រមុខរាជរដ្ឋាភិបាលកម្ពុជា ដែលបានតស៊ូរំដោះជាតិមាតុភូមិ ចេញពីរបបដ៏ខ្មៅងងឹត ជូនប្រជាជនកម្ពុជា ដែលចងចាំមិនភ្លេចនូវសោកនាដកម្មដ៏សាហាវព្រៃផ្សៃ។ ចំណុចទាំងអស់នេះ ហើយបើគ្មានសុខសន្តិភាពនោះទេ ពិតណាស់របបដ៏ខ្មៅងងឹតក៏មិនអាចរលត់ទៅវិញនោះដែរ។
សូមបញ្ជាក់ថា សមាជិក-សមាជិកា ដែលបានស្ម័គ្រចិត្តរួមរស់ជាមួយគណបក្សប្រជាជនកម្ពុជាទាំង ១,០៣៤នាក់ ក្នុងម្នាក់ៗទទួលបាន៖ អង្ករ២៥ គីឡូក្រាម, សារ៉ុង០១ រួមនឹងថវិកាចំនួន២ម៉ឺនរៀល។ ក្រុមការងារមូលដ្ឋាន ស្រុកចំនួន ២៦នាក់ក្នុងម្នាក់ទទួលបាន សារ៉ុង០១, ទឹកក្រូច០១យួរ, មី០១កេស និងថវិកាចំនួន៤ម៉ឺនរៀល។ ដោយឡែកក្រុមការងារមូលដ្ឋានឃុំ-ភូមិចំនួន ៧១នាក់ ក្នុងម្នាក់ទទួលបានទឹកភេសជ្ជៈប៉ូវកម្លាំងចំនួន០១កេស, សារ៉ុង០១, ទឹកក្រូច០១យួរ, មី០១កេស និងថវិកា ៤ម៉ឺនរៀលផងដែរ៕
