(កណ្តាល)៖ ជនសង្ស័យ២០នាក់ ក្នុងនោះមានស្រីម្នាក់ ត្រូវបានកម្លាំងអាវុធហត្ថខេត្តកណ្តាល សហការជាមួយកម្លាំងអាវុធហត្ថរាជធានីភ្នំពេញ នៅថ្ងៃទី២៣ ខែមិថុនា ឆ្នាំ២០១៦នេះ បានបើកប្រតិបត្តិការ ចុះបង្ក្រាបជាបន្តបន្ទាប់ តាំងពីស្រុកខ្សាច់កណ្តាល រហូតដល់សង្កាត់ស្រះចក ខណ្ឌដូនពេញ ព្រមទាំងដកហូតថ្នាំញៀន៤កញ្ចប់ កញ្ចាក្រៀម២កញ្ចប់ និងឧបករណ៍សម្រាប់ជក់មួយចំនួនទៀត។

មន្រ្តីអាវុធហត្ថខេត្តកណ្តាលបានឲ្យដឹងថា ជនសង្ស័យទាំង២០នាក់ គឺ៣នាក់​ ត្រូវបានកម្លាំងអាវុធហត្ថស្រុកខ្សាច់កណ្តាលចាប់ខ្លួន នៅថ្ងៃទី២២ ខែមិថុនា ឆ្នាំ២០១៦ រួចក្រោយដឹងពីចម្លើយសារភាពនោះ ក៏តាមមកបង្ក្រាបដល់សង្កាត់ស្រះចក បន្ថែម១៧នាក់ទៀត នៅថ្ងៃនេះតែម្តង។

មន្រ្តីអាវុធហត្ថបានបញ្ជាក់ថា ថ្ងៃទី២២ ខែមិថុនា ឆ្នាំ២០១៦ កម្លាំង អហ ស្រុកខ្សាច់កណ្តាល ដឹកនាំដោយលោកមេបញ្ជាការស្រុក បានកំពុងធ្វើការល្បាតចល័ត ក្នុងភូមិសាស្រ្ត នៅចំណុចដងផ្លូវ ជាតិលេខ៨អា ស្ថិតក្នុងភូមិព្រៃចាស់ ឃុំវិហារសួគ៌ ស្រុកខ្សាច់កណ្តាល ក៏ប្រទះឃើញជនសង្ស័យ​៣នាក់ កំពុងជិះម៉ូតូ១គ្រឿងឌុបគ្នា។ ដោយគួរឲ្យសង្ស័យ កម្លាំងបានហៅឲ្យឈប់ត្រួតពិនិត្យ​ ពេលនោះរកឃើញថ្នាំញៀន (ម៉ាទឹកកក) ចំនួន​២កញ្ចប់តូច ហើយក៏ឃាត់ខ្លួនទាំង​៣នាក់ នាំទៅអង្គភាពធ្វើការសាកសួរបន្ថែមភ្លាមៗតែម្តង។

ក្រោយពីធ្វើការសាកសួររួចមក នៅថ្ងៃទី២៣ ខែមិថុនា ឆ្នាំ២០១៦នេះ ដោយអនុវត្តតាមអនុសាសន៍ របស់​នាយឧត្តមសេនីយ៍ សៅ​ សុខា​ និង​លោក ម៉ៅ​ ភារុណ​ អភិបាលខេត្តកណ្តាល​ ក្រោមការបញ្ជាផ្ទាល់ពីលោក​ឧត្តមសេនីយ៍ត្រី សំ​ តុលា​ មេបញ្ជាការ​ អហ​ ខេត្តកណ្តាល​ និង​ដោយមានការសហការយ៉ាងល្អពី​ អហ​ រាជធានី​ ក្រោមការសម្របសម្រួលនីតិវិធីដោយ លោកព្រះរាជអាជ្ញា អមសាលាដំបូងខេត្តកណ្តាល​ លឹម​ សុគន្ធា ព្រមទាំងការសារភាពរបស់ជនសង្ស័យ កម្លាំងជំនាញ អហ ខេត្ត និង​ស្រុកខ្សាច់កណ្តាល ដឹកនាំផ្ទាល់ដោយលោកមេបញ្ជាការរង​ ទូច​ អីុណាន​ បានធ្វើប្រតិបត្តការពន្លាតដែនដី សហការណ៍ជាមួយកម្លាំង អហ រាជធានីភ្នំពេញ ចុះបង្រ្កាប និងឆែកឆេរលំនៅដ្ឋានមួយកន្លែងដែលមានទីតាំង នៅចំណុចខាងក្រោយស្ថានទូតបារាំង ស្ថិតក្នុងភូមិ២០ ក្រុម២៤៨ សង្កាត់ស្រះចក ខណ្ឌដូនពេញ រាជធានីភ្នំពេញ ដោយធ្វើការឃាត់ខ្លួនជនសង្ស័យ បានចំនួន១៧នាក់ បន្ថែមទៀត (ស្រី០១នាក់) ព្រមទាំងដកហូតវត្ថុតាងមួយចំនួន រីឯម្ចាស់ផ្ទះមិនស្គាល់អត្តសញ្ញាណ គេចខ្លួន។

ក្រោយការចាប់ខ្លួនកម្លាំងអាវុធហត្ថ បានដកហូតរួមមាន៖

១/-ថ្នាំញៀន (ម៉ាទឹកកក) ចំនួន០២កញ្ចប់ (ធំ១,តូច១) សរុបទម្ងន់ជាមួយ០២កញ្ចប់តូចមុន ស្មើនឹង៥៣,២ក្រាម
២/-កញ្ឆាក្រៀម០២កញ្ចប់ ទម្ងន់១០,២ក្រាម
៣/-សម្ភារវេចខ្ចប់ និងជក់គ្រឿងញៀនមួយចំនួន។

សូមបញ្ជាក់ថា កម្លាំង អហ​ ខេត្តកណ្តាល​ តែងតែយកចិត្តទុកដាក់លើសុខទុក្ខប្រជាជន​ តាមតួ​នាទី​​ ភារកិច្ច​ ដែលថ្នាក់លើប្រគល់ឲ្យ​ គឺធ្វើដូចភ្លៀងរលឹម ដើម្បីចូលរួមលុបបំបាត់បញ្ហាគ្រឿងញៀននេះ ឲ្យបានខ្លាំង ពីព្រោះវាជាឃាតកសម្លាប់សង្គមជាតិទាំងមូលតែម្តង បើទប់ស្កាត់មិនបានទេនោះ។

បច្ចុប្បន្នជនសង្ស័យទាំង​ ២០នាក់ ត្រូវបានឃាត់ខ្លួននៅ អហ ខេត្តកណ្តាល និងកំពុងចាត់ការតាមនីតិវិធីច្បាប់៕