(ឧត្តរមានជ័យ)៖ អភិបាលខេត្តឧត្តរមានជ័យលោក ប៉ែន កុសល្យ និងអភិបាលខេត្តស៊ីសាកេត នៃប្រទេសថៃ នៅព្រឹកថ្ងៃទី៣ ខែមករា ឆ្នាំ២០២៣ បានដឹកនាំក្រុមការងារ ចូលរួមធ្វើពិធីបុណ្យរាប់បាត្រព្រះសង្ឃ៧០អង្គ រួមគ្នា នៅមាត់ច្រកទ្វារព្រំដែនអន្តរជាតិជាំសាង៉ាំស្ថិតក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
មន្ត្រីរដ្ឋបាលខេត្តឧត្តរមានជ័យ បានថ្លែងឲ្យដឹងថា ការធ្វើបុណ្យរាប់បាត្រព្រះសង្ឃ៧០អង្គរួមគ្នា រវាងខេត្តឧត្តរមានជ័យ និងខេត្តស៊ីសាកេត នាពេលនេះ គឺដើម្បីពង្រឹងចំណងសាមគ្គីភាព មិត្តិភាព និងកិច្ចសហប្រតិបត្តិការល្អ រវាងស្រុក និងស្រុក ខេត្ត និងខេត្ត នៃប្រទេសទាំងពីរ ដែលមានវប្បធម៌ ប្រពៃណី ទំនៀមទំលាប់ និងជំនឿសាសនា ប្រហាក់ប្រហែលគ្នា ពិសេសគឺដើម្បីអបអរសាទរពិធីបុណ្យចូលឆ្នាំថ្មី ឆ្នាំសកល ២០២៣។
នៅក្នុងពិធីនេះដែរ ក្រៅពីបានជូនវត្ថុអនុស្សាវរីយ៍ដល់គ្នាទៅវិញទៅមក ក្នុងឱកាសអបអរឆ្នាំថ្មី ឆ្នាំសកល ២០២៣ រួចមក ថ្នាក់ដឹកនាំខេត្តនៃប្រទេសទាំងពីរ បានចូលរួមក្នុងពិធីសាសនា តាមកម្មវិធីដែលបានគ្រោងទុក ព្រមទាំងបានរាប់បាត្រដល់ព្រះសង្ឃ ដោយទឹកចិត្តជ្រះថ្លាយ៉ាងក្រៃលែង៕
