(ស្វាយរៀង)៖ សមត្ថកិច្ចនគរបាលស្រុកស្វាយជ្រំ ខេត្តស្វាយរៀង បានឃាត់ខ្លួនជនសង្ស័យម្នាក់ពាក់ព័ន្ធករណីជួញដូគ្រឿងញៀន និងរឹបអូសវត្ថុតាងបានមួយចំនួន។
ការឃាត់ខ្លួននេះធ្វើឡើងនៅវេលាម៉ោង ៦៖១០នាទីព្រលប់ថ្ងៃទី២ ខែមករា ឆ្នាំ២០២៣ ស្ថិតចំណុចខាងមុខក្លោងទ្វាវត្តគ្រួសស្ថិតនៅចំណុចភូមិគ្រួស ឃុំគ្រួស ស្រុកស្វាយជ្រំ ខេត្តស្វាយរៀង។
លោក សោម សុភ័ណ្ឌ អធិការនគរបាលស្រុកស្វាយជ្រំ បានឱ្យដឹងថា កំលាំងរបស់លោកបានឃាត់សង្ស័យម្នាក់ ភេទប្រុស អាយុ៥៤ឆ្នាំ មុខរបរមិនពិតប្រាកដ មានទីលំនៅភូមិគ្រួសឃុំគ្រួស ស្រុកស្វាយជ្រំ ខេត្តស្វាយរៀង។ ចំណែកវត្ថុតាងដែលរឹបអូសបានរួមមាន៖ ម៉្សៅក្រាមពណ៌សថ្លាថ្នាំញៀន (មេតាំហ្វេតាមីន) ចំនួន ១៣កញ្ចប់ ធំ១កញ្ចប់ ទូរស័ព្ទចំនួន ៣គ្រឿងម៉ូតូ១គ្រឿង និងឧបករណ៍សម្រាប់ប្រើប្រាស់គ្រឿងញៀនមួយចំនួន។
លោកអធិការស្រុកបានបន្តថា នៅចំពោះមុខសមត្តកិច្ចជនសង្ស័យបានឆ្លើយសារភាពថា ចំពោះថ្នាំញៀនចំនួន១៤កញ្ចប់ខ្លួនបានទិញពីភ្នំពេញ និងបានវេចខ្ចប់តាមរថយន្តតាក់សុីផ្ញើមកឱ្យខ្លួន។
លោក សោម សុភ័ណ្ឌ បានបញ្ជាក់ថា ក្រោយពីទទួលព័ត៌មានពីប្រជាពលរដ្ឋថា មានមុខសញ្ញាកំពុងជួញដូរគ្រឿងញៀនរួចមក លោកបានដឹកនាំបញ្ជាកម្លាំងជំនាញប្រឆាំងបទល្មើសគ្រឿងញៀនស្រុកស្វាយជ្រំ សហការជាមួយកម្លាំងប៉ុស្តិ៍នគរបាលរដ្ឋបាលគ្រួស ធ្វើការស្រាវជ្រាវឃាត់ខ្លួនជនសង្ស័យនៅចំណុចខាងមុខក្លោងទ្វាវត្តគ្រួស និងយកមកសាកសួរតែម្តង។
លោកអធិការស្រុក បានបន្តថា សមត្តកិច្ចបានធ្វើការពិនិត្យទឹកម៉ូតស្វែងរកសារធាតុញៀនជាលទ្ធផលវិជ្ជមាន ទើបសមត្ថកិច្ចជំនាញកសាងសំណុំរឿងចាត់ការតាមច្បាប់៕
