(ភ្នំពេញ)៖ ក្នុងឳកាសបុណ្យចូលថ្មី ឆ្នាំសកល២០២២ឈានចូល ២០២៣ ដ៏ប្រពៃថ្លៃថ្លានេះ មិនថាប្រជាជាតិខ្មែរយើង ឬបណ្ដាប្រជាជាតិនានាពិភពលោកទេ បានរៀបចំពិធីអបអរសាទរយ៉ាងអធិកអធមសប្បាយរីករាយដើម្បីទទូលអំណរសាទរឆ្នាំថ្មី ឆ្នាំសកល ក្នុងគោលបំណងដើម្បីរំឭកអំពីសមិទ្ធផលនៅឆ្នាំ២០២២ផង នឹងទិសដៅឆ្នាំ២០២៣ ខាងមុខបន្ដទៀតផងដែរ ។
តើបុណ្យចូលថ្មី ឆ្នាំសកល២០២២ ឈានចូល២០២៣ រំឭកឲ្យយើងឃើញអ្វីខ្លះ?
អ្នកជំនាញអារ្យធម៌ខ្មែរ លោក រត្ន័ សណ្ដាប់ ថ្លែងថានៅក្នុងឱកាសបុណ្យចូលឆ្នាំថ្មី ឆ្នាំសកល២០២២ ឈានចូល២០២៣នេះ បើយើងក្រទ្បេកមើលពីដំណើរការវិវត្ដន៍របស់រាជរដ្ឋាភិបាលកម្ពុជា ក្រោមមគ្គុទេសក៍របស់ សម្តេចតេជោ ហ៊ុន សែន យើងឃើញយ៉ាងច្បាស់នូវសមិទ្ធិផល ដ៏ធេងនៅឆ្នាំ២០២២នេះ គឺប្រទេសជាតិស្ថិតក្រោមដំបូល «សន្ដិភាព» ដ៏ត្រចះត្រចង់ និងការគ្រប់គ្រងមេរោគ Covid-19 ដ៏កាចសាហាវដែលកំពុងរាតត្បាតនឹងសម្លាប់មនុស្សម្នានៅលើពិភពលោក ប្រកបដោយប្រសិទ្ធិភាពខ្ពស់ជាទីបំផុត។
ក្នុងឆ្នាំ2022នេះចំពោះសមិទ្ធផលជាតិធំៗ ដែលបានលេចទ្បើងជាបន្ដបន្ទាប់មានដូចជា ស្ពានធំៗឆ្លងកាត់ទន្លេដើម្បីសម្រួលដល់មធ្យោបាយធ្វើដំណើររបស់ប្រជាពលរដ្ឋឆ្លងកាត់រាប់លាននាក់។ ផ្លូវហាយវ៉េល្បឿនលឿនយ៉ាងស្រស់បំព្រង ពីរាជធានីភ្នំពេញទៅខេត្ដព្រះសីហនុដែលពុំធ្លាប់មានប្រវត្ដិសាស្រ្ដនៃកម្ពុជា, ពហុកីទ្បដ្ឋានមរតកតេជោយ៉ាងធំស្កឹមស្កៃនិងទំនើបជាងគេក្នុងតំបន់អាស៊ាន, អាគារធំៗយ៉ាងខ្ពស់ត្រដែតពាសពេញផ្ទៃប្រទេស, ស្ពានអាកាសខ្វាត់ខ្វែង និងផ្លូវថ្នល់ជាតិខ្វាត់ខ្វែងពាសពេញរាជធានីក្រុង-ខេត្ដ រហូតដល់ជនបទ ដើម្បីសម្រួលភាពងាយស្រួលចរាចរណ៍ធ្វើដំណើរនឹងដឹកជញ្ជូនក្នុងការលើកកម្ពស់កម្រិតជីវភាពរស់នៅរបស់ប្រជាពលរដ្ឋ ។
ទន្ទឹមនឹងនេះទោះបីពិភពលោក ប្រឈមនឹងវិបត្ដិសេដ្ឋកិច្ចបណ្ដាលមកពីបញ្ហាកូវីដ-១៩ និងសង្រ្គាមរវាងអ៊ុយក្រែន និងរុស្ស៊ីយ៉ាងណាក្ដី ក៏រាជរដ្ឋាភិបាលនៅបន្ដរក្សាបាននូវកំណើនសេដ្ឋកិច្ច គួរជាទីមោទន: និងធ្វើឲ្យអ្នកវិនិយោគទុនទំាងក្នុង និងក្រៅប្រទេស សហគ្រាសតូចធំ រោងចក្រតូចធំ បានបន្ដបង្កើតការងារដល់ប្រជាពលរដ្ឋខ្មែរយ៉ាងសស្រាក់សស្រាំជាទីបំផុត ។
លោក រត្ន័ សណ្ដាប់ បន្ដថាបើយើងរៀបរាប់ពីសមិទ្ធផលរបស់រាជរដ្ឋាភិបាល ដែលបានដឹកនាំចលនាលើកស្ទួយប្រទេសជាតិ លើកកំពស់កេរ្ដិ៍ឈ្មោះប្រទេសជាតិលើឆាកអន្ដរជាតិឲ្យខ្ពស់ត្រដែតនៅឆ្នាំ២០២២នេះ គឺក្នុងឋាន:កម្ពុជាធ្វើជាប្រធានអាស៊ាន បានធ្វើចលនាឲ្យមានកិច្ចប្រជុំរវាងសហរដ្ឋអាមេរិក- អាស៊ាន គឺនាយករដ្ឋមន្ត្រី ហ៊ុន សែន ត្រូវបានអញ្ជើញជាពិសេសដោយលោក ប្រធានាធាធិបតីសហរដ្ឋអាមេរិក ចូ បៃដិន- Joe Biden ដើម្បីចូលរួមក្នុងកិច្ចប្រជុំកំពូលពិសេសរវាងសហរដ្ឋអាមេរិក-អាស៊ាន -US-ASEAN Special Summit នៅថ្ងៃទី១២-១៣ ខែឧសភា ឆ្នាំ២០២២ នៅសេតវិមាន រដ្ឋធានីវ៉ាស៊ីនតោនប្រកបដោយភាពសិទ្ធិស្នាលជាទីបំផុត ។
តមកនៅថ្ងៃទី១០ -១៣ ខែវិច្ឆិកា ឆ្នាំ២០២២ កន្លងមកនេះកម្ពុជាក្នងឋាន:ប្រធានអាស៊ាន បានដឹកនាំកិច្ចប្រជុំកំពូលអាស៊ានលើកទី៤០-៤១ និងកិច្ចប្រជុំពាក់ព័ន្ធ ដោយកម្ពុជាបានទទួលស្វាគមន៍មេដេឹកនាំតំបន់ និងមេដឹកនាំប្រទេសមហាអំណាចសេដ្ឋកិច្ចធំៗលើពិភពលោក បានធ្វើដំណើរមកកម្ពុជាដោយគ្មានការភ័យខ្លាច មានដូចជា អគ្គលេខាធិការអង្គការសហប្រជាជាតិ, សហគមន៍អឺរ៉ុប, មេដឹកនាំប្រទេសជប៉ុន, កូរ៉េខាងត្បូង, អ៊ុយក្រែន, កាណាដា, អូស្រ្ដាលី, នូវែលហ្សេឡង់, រុស្ស៊ី, ចិន និងលោកប្រធានាធិបតីមហាអំណាចសហរដ្ឋអាមេរិក ចូ បៃដិន Joe Biden ជាដើម បានធ្វើដំណើរមកជុំគ្នានៅកម្ពុជា គឺបានលើកតម្កើងកិត្យានុភាពកម្ពុជាលើឆាកអន្ដរជាតិយ៉ាងធំធេង និងជាមោទនភាពជាតិខ្មែរទាំងមូល ។
តមកទៀតថ្មីៗនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពជានិងជាប្រធានអាស៊ាន នៅថ្ងៃទី១៤ ធ្នូ ឆ្នាំ២០២២នេះ បានអញ្ជើញចូលរួម និងធ្វើជាសហប្រធាន នៃកិច្ចប្រជុំកំពូលរំលឹកខួបអនុស្សាវរីយ៍អាស៊ាន-សហភាពអឺរ៉ុប និងដើម្បីអបអរសាទរខួប៥៤ ឆ្នាំ នៃទំនាក់ទំនងដៃគូសន្ទនាអាស៊ាន-សហភាពអឺរ៉ុប នាទីក្រុងព្រុចសែល -Brussels ប្រទេសប៊ែលហ្សិក -Belgium បានលើកតម្កើងកិត្យានុភាពកម្ពុជាក៏ដូចតំបន់ទាំងមូល។
អ្វីដែលយើងកំពុងរៀបរាប់មកនេះ គេត្រូវចំាឲ្យច្បាស់ថា គឺមានតែគណបក្សកាន់អំណាចតែមួយគត់ ដែលមានសម្តេចតេជោ ហ៊ុន សែន ជាប្រមុខដឹកនាំរាជរដ្ឋាភិបាល ដែលបានដឹកនាំប្រទេសមួយនេះឲ្យមានការរីកចម្រើន អភិឌ្ឃន៍ ឈានទៅរកភាពទាន់សម័យ និងទំនើបភាព ក្លាយជាអារ្យប្រទេសជឿនលឿននៅលើពិភពលោក ទន្ទឹមនឹងបក្សប្រឆំាងដែលបាន និងកំពុងធ្វើព្យុះធ្វើផ្គរ ទំាងក្នុងនិងក្រៅប្រទេស ធ្វើចលាចលកេណ្ឌប្រជាជនឲ្យធ្វើបាតុកម្មផ្ដួលរំលំរាជរដ្ឋាភិបាល អស់រយៈពេល១ឆ្នាំគត់ ឆ្នាំ២០២២នេះ រហូតស្រែកទាមទារដល់ប្រទេសដៃគូរអភិវឌ្ឃបស់រាជរដ្ឋាភិបាលនានាឲ្យផ្ដាច់ជំនួយអភិវឌ្ឍន៍ដល់កម្ពុជាទៀតផង។
ជាសរុប ក្នុងបរិការដូចបានរៀបរាប់ខាងលើ ខណៈដែលពលរដ្ឋទូទៅត្រៀមធ្វើពិធីរំឭកនូវអ្វីៗដែលបានធ្វើនៅឆ្នាំ២០២២ដើម្បីឈានចូលឆ្នាំ២០២៣ គឺគេបានឃើញច្បាស់ណាស់ថា រាជរដ្ឋាភិបាលជាអ្នកស្ថាបនា រីឯបក្សប្រឆំាងបានត្រឹមតែយកជើងរាទឹកតែប៉ុណ្ណោះ៕
