(ភ្នំពេញ)៖ ព្រះករុណាជាអម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យ ប្រោសព្រះរាជទាននូវសេចក្ដីនឹករលឹក សាកសួរសុខទុក្ខ ស្វាគមន៍យ៉ាងរាក់ទាក់កក់ក្ដៅ ប្រកបដោយព្រះរាជហឬទ័យ ស្រលាញ់រាប់អានដ៏ជ្រាលជ្រៅ ចំពោះ អ្នកឧកញ៉ា ហ៊ី គឹមហុង និងលោកជំទាវ ព្រមទាំងគណៈប្រតិភូ។
ព្រះករុណាជាអម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត ព្រះអង្គមានព្រះរាជហប្ញទ័យកោតសរសើរដ៏កក់ក្ដៅ ចំពោះក្រុមហ៊ុនពិភពដីមាសគ្រុប ដែលបានខិតខំធ្វើការវិនិយោគផ្នែកអចលនទ្រព្យឲ្យកាន់តែរីកចម្រើន និងធ្វើឲ្យវិស័យសេដ្ឋកិច្ចមានការអភិវឌ្ឍន៍ជាលំដាប់ ចូលរួមចំណែកដល់កិច្ចដំណើរការអភិវឌ្ឍន៍នៅកម្ពុជា។
ព្រះករុណាជាអម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត ព្រះអង្គសូមថ្លែងអំណរគុណចំពោះ អ្នកឧកញ៉ាប្រធាន និងលោកជំទាវ និងគណប្រតិភូ ដែលបាននាំមកនូវដង្វាយដ៏ច្រើន និងមានតម្លៃថ្វាយព្រះអង្គក្នុងឱកាសនេះ ហើយដង្វាយ ដែលកើតឡើងពីសេចក្ដីសប្បុរស ស្នេហាប្រជារាស្រ្តកម្ពុជា ពីសំណាក់ក្រុមហ៊ុនពិភពដីមាសគ្រុប នាពេលនេះ ព្រះអង្គនឹងប្រោសព្រះរាជទានឲ្យបានដល់ដៃប្រជារាស្រ្តក្រីក្រ ជួបការលំបាកខ្វះខាតក្នុងជីវភាព ដើម្បីជាគុណប្រយោជន៍ជួយសម្រាល នូវទុក្ខលំបាករបស់បងប្អូនរស់នៅតាមមូលដ្ឋាននានាក្នុងពេលដ៏ឆាប់ៗខាងមុខនេះ។
ក្នុងឱកាសដ៏វិសេសវិសាលនោះដែរ ព្រះករុណាជាអម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត ព្រមទាំងម្ចាស់ដង្វាយ បានយាង និងអញ្ជើញក្នុងពិធីថ្វាយ និងទទួលដង្វាយ ជានិមិត្តរូបនៃអង្ករ មានចំនួនសរុប៖ អង្ករ ចំនួន២០តោន និងថវិកា ចំនួន ១០០លានរៀលផងដែរ។
ក្នុងឱកាសដ៏ល្អប្រពៃនោះដែរ ព្រះករុណាជាអម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត សព្វព្រះរាជហឬទ័យប្រោសព្រះរាជទាន នូវពរជ័យសិរីមង្គល វិបុលសុខ និងមហាព្រះរាជកុសល ដែលកើតឡើងពីដង្វាយប្រកប ដោយសណ្ដានចិត្តដ៏ជ្រះថ្លានេះ ជូនម្ចាស់ដង្វាយសូមបានប្រកបនូវសុខភាពល្អអាយុយឺនយូរ និងទទួលបានជោគជ័យថ្មីៗថែមទៀត ក្នុងការបំពេញនូវគ្រប់ភារៈកិច្ច៕
