(ភ្នំពេញ)៖ នៅព្រឹកសុក្រ ទី៣០ ខែធ្នូ ឆ្នាំ២០២២ រដ្ឋបាលខណ្ឌដូនពេញ បានរៀបចំពិធីសំណេះសំណាលជាមួយ មន្ត្រីរាជការ កម្លាំងប្រជាការពារខណ្ឌ ដើម្បីអបអរសាទរក្នុងឱកាសចូលឆ្នាំថ្មី ឆ្នាំសកល ២០២៣ ក្រោមអធិបតីភាព លោក ជា ខេមា អភិបាលខណ្ឌដូនពេញ។
ក្នុងឱកាសនោះ លោកអភិបាលខណ្ឌ បានថ្លែងអំណរគុណដល់មន្រ្តីរាជការ កងកម្លាំងគ្រប់ប្រភេទរបស់រដ្ឋបាលខណ្ឌដូនពេញ ដែលបានខិតខំបំពេញក្នុងការអនុវត្តការងារនាពេលកន្លងមក និងសូមបន្តយកចិត្តទុកដាក់ខិតខំ អនុវត្តការងារក្នុងឆ្នាំថ្មីខាងមុខបន្តទៀតអោយកាន់តែល្អប្រសើរ។
ក្នុងពិធីសំណេះសណាលនោះ លោកអភិបាលខណ្ឌ បានក្រើនរំលឹកដល់បងប្អូនជួយផ្សព្វផ្សាយដល់បងប្អូនអាជីវករ ម្ចាស់អាជីវកម្ម មេត្តាជួយសហការដល់អាជ្ញាចុះរៀបចំសណ្តាប់ធ្នាប់ ការចុះគូសគំនូសកំណត់ទីតាំងអាជីវកម្ម ការតាំងផើងផ្កាការចតយាន្តយន្តលើទីតាំងហាមឃាត ការចតយាន្តយន្តខុសបច្ចកទេសជាដើម។
លោកថា ការចុះគូសគំនូសគោលបំណងដើម្បីរំដោះផ្លូវថ្មើរជើង កន្លងមកដោយមានការយោគយល់ពីអាជ្ញាធរចំពោះបងប្អូនអាជីវករ ម្ចាស់អាជីវកម្មផ្លូវថ្មើរជើងស្ទើរបាត់ទាំងស្រុង។ ដូច្នេះដើម្បីស្វាគមន៍ភ្ញៀវជាតិ អន្តរជាតិអញ្ជើញមកកំសាន្ត ក៏ដូចជាហាត់ប្រាណនោះ ស្នើសុំបងប្អូនមេត្តាសហការដល់អាជ្ញារធរឲ្យបានគ្រប់ជ្រុងជ្រោយ។
ក្នុងពិធីសំណេះសំណាលនោះដែរ លោកអភិបាលខណ្ឌ បានផ្តល់ជាថវិកាមួយចំនួនជាការលើកទឹកចិត្តដល់មន្រ្តីរាជការដែលកំពុងបំពេញកិច្ចយ៉ាងសស្រាក់សស្រះកន្លងមក។ ក្នុងឱកាសឆ្នាំថ្មីខាងមុខ លោក អភិបាលបានជូនពរដល់មន្ត្រីក្រោមឱវាទទាំងអស់ ជួបប្រទះតែសុភមង្គល សេចក្តីសុខ សេចក្តីចម្រើនគ្រប់ក្រុមគ្រួសារ និងសូមជួបនូវពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
