(ក្រចេះ)៖ នគរបាលក្រុងក្រចេះ ក្រោមការចង្អុលបង្ហាញពីលោក លោក ឧត្ដមសេនីយ៍ទោ អ៊ូ សុបុណ្ណា ស្នងការនគរបាលខេត្ត និងសម្របសម្រួល ដោយលោក គឺ ប៊ុណ្ណារ៉ា ព្រះរាជអាជ្ញាអមសាលាដំបូងខេត្ត បានឃាត់ខ្លួនជនសង្ស័យចំនួន៣នាក់ ពាក់ព័ន្ធករណីកាន់អាវុធដោយខុសច្បាប់។

ប្រត្តិបត្តិការនេះ ធ្វើឡើងនៅល្ងាចថ្ងៃទី២៨ ខែធ្នូ ឆ្នាំ២០២២ ស្ថិត នៅភូមិក្រចេះ សង្កាត់ក្រចេះ ក្រុងក្រចេះ។

យោងតាមរបាយការណ៍នគរបាលក្រុងក្រចេះ ដែលភ្នាក់ងារ Fresh Newsទទួលបាន នៅព្រឹកថ្ងៃទី២៩ ខែធ្នូនេះ បានបញ្ជាក់ថា ជនសង្ស័យទាំង៣នាក់មានឈ្មោះ ដូចខាងក្រោម៖

១៖ ឈ្មោះ ហ៊ន សុខគាឧត្តម ភេទប្រុស មានទីលំនៅភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ
២៖ ឈ្មោះ ណុត សុវណ្ណរា ភេទប្រុស អាយុ១៧ឆ្នាំ មានទីលំនៅភូមិដូនជ្រាំ សង្កាត់ក្រចេះ ក្រុងក្រចេះ ខេត្តក្រចេះ
៣៖ ឈ្មោះ សួន វិសាល ភេទប្រុស អាយុ១៨ឆ្នាំ មានទីលំនៅភូមិថ្មគ្រែលើ ឃុំថ្មគ្រែ ស្រុកចិត្របុរី ខេត្តក្រចេះ។

អ្នកទាំង៣នេះ បានជិះម៉ូតូ១គ្រឿង ម៉ាកហុងដាឌ្រីម (មិនចាំស្លាកលេខ) បានមកផឹកស៊ីនៅមាត់ទន្លេចំណុច ហាងសុភក្រ្តាស្រាក្រឡុក និងបានធ្វើការអុកឡុកនៅក្នុងហាងផឹកស៊ី ព្រមទាំងកាន់កាំភ្លើងខ្លី០១ដើម (មិនចាំម៉ាក) កាលពីវេលាម៉ោង ០១៖៤០រំលងអាធ្រាត្រ ថ្ងៃទី២៧ ខែធ្នូ ឆ្នាំ២០២២ នៅចំណុចហាងសុភក្រ្តាស្រាក្រឡុក ស្ថិតនៅភូមិក្រចេះ សង្កាត់ក្រចេះ ក្រុងក្រចេះ ខេត្តក្រចេះ។

តាមរបាយការណ៍ បានបញ្ជាក់ទៀតថា ក្រោយពីទទួលបានពត៌មានសមត្ថកិច្ច បានធ្វើស្រាវជ្រាវកំណត់មុខសញ្ញា ជនសង្ស័យទាំង០៣ខាងលើ និងនាំមកកន្លែងដើម្បីសួរនាំ ជនសង្ស័យទាំង០៣ បានសារភាពខ្លួនពិតជាបានកាន់កាំភ្លើង និងបានអុកឡុកនៅក្នុងហាងស្រាក្រឡុកពិតប្រាកដមែន។

បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្តោះអាសន្ននៅអធិការដ្ឋាននគរបាលក្រុងក្រចេះ ដើម្បីបំពេញនីតិវិធី៕