(ព្រះសីហនុ)៖ ពិធីបើកបវេសនកាលថ្មីឆ្នាំ២០២២-២០២៣ នៅខេត្តព្រះសីហនុ កំពុងតែដំណើរការជាបណ្ដើរៗហើយ ជាក់ស្តែងកាលពីព្រឹកថ្ងៃទី២៦ ខែធ្នូ ឆ្នាំ២០២២ សាលាឯកជន «រីអាន អន្តរជាតិ» ក៏បានបើកបវេសនកាលថ្មីផងដែរសម្រាប់ឆ្នាំ២០២៣។
សាលារៀនឯកជននេះ ត្រូវបានបងប្អូនសហគមន៍ប្រជានេសាទ តែងតែនាំយកកូនមកចុះឈ្មោះចូលរៀនដោយសារពួកគាត់មានភាពងាយស្រួល ក្នុងការបញ្ជូនកូនមករៀន និងទទួលកូនចេញពីរៀនពីព្រោះនៅជិតកន្លែងស្នាក់នៅ និងកន្លែងរកស៊ីរបស់ពួកគាត់ ហើយក្នុងពិធីបើកបវេសនកាលថ្មីនេះ បានធ្វើឡើងក្រោមវត្តមានលោក មី សេងលាភ អនុប្រធានមន្ទីរអប់រំ យុវជន និងកីឡាខេត្តព្រះសីហនុ និងលោក ជ្រឹង សុឃិន ប្រធានការិយាល័យអប់រំ ក្រុងព្រះសីហនុ លោកសាស្រ្តាចារ្យបណ្ឌិត ចាន់ សំអាន នាយកសាលា «រីអាន អន្តរជាតិ» រួមទាំងភ្ញៀវកិត្តិយស និងបងប្អូនសហគមន៍ប្រជានេសាទជាច្រើននាក់ផងដែរ។
នាឱកាសនោះលោក មី សេងលាភ បានណែនាំដល់នាយកសាលា និងគ្រូៗបង្រៀនត្រូវផ្ដោតសំខាន់ទៅលើការអប់រំ ក្នុងស្មារតី នៃការបន្តបង្ការ និងទបទប់ស្កាតការរីករាលដាលនៃជំងឺកូវីដ១៩ ស្របតាមការណែនាំរបស់រាជរដ្ឋាភិបាល ហើយសិស្សានុសិស្សត្រូវប្រឹងប្រែងសិក្សារៀនសូត្រ ត្រងត្រាប់ស្តាប់ការពន្យល់ណែនាំរបស់លោកគ្រូ អ្នកគ្រូ និងមាតា បិតាអាណាព្យាបាលរបស់ខ្លួន គោរពវិន័យសាលា ដោយចៀសឱ្យឆ្ងាយពីគ្រឿងញៀន និងអំពើអបាយមុខផ្សេងៗ កុំខ្ជះខ្ជាយពេលវេលាឥតប្រយោជន៍។
ជាមួយគ្នានេះ អនុប្រធានមន្ទីរអប់រំខេត្ត បានលើកឡើង និងផ្តល់អនុសាសន៍ឲ្យនាយកគ្រប់គ្រងសាលាធានាបាននូវការរៀន និងបង្រៀនប្រកបដោយគុណភាព និងនិរន្តរភាព ផ្អែកលើមូលដ្ឋាន នៃការអនុវត្តគន្លងថ្មី នៃការអប់រំ ដោយកំណត់តម្រូវឱ្យមានការរៀបចំស្តង់ដាសាលារៀនមានប្រសិទ្ធភាពរួមមាន៖
*ទី១៖ ត្រូវមានស្តង់ដាសហគមន៍សាលារៀន
*ទី២៖ ថ្នាក់រៀន និងការសិក្សាដំណើរការឲ្យទៀងទាត់
*ទី៣៖ ត្រូវមានភាពជាម្ចាស់សហគមន៍សាលារៀន
*ទី៤៖ ដំណើរប្រតិបត្តិការ និងរដ្ឋបាលសាលារៀនឲ្យមានប្រសិទ្ធភាព
*ទី៥៖ ត្រូវមានគណនេយ្យភាពរបស់សាលារៀន ហើយព្រមទាំងវេនសិក្សា កម្មវិធីសិក្សាបំប៉ន កាលវិភាគសិក្សា ជម្រើសមុខវិជ្ជា និងវិធីសាស្ត្របង្រៀនតាមបែបចម្រុះ និងបត់បែន៕
