(អាមេរិក)៖ បណ្ដាញទំនាក់ទំនងសង្គម Instagram បានប្រកាសឲ្យដឹងនៅថ្ងៃនេះថា ​ចំនួនអ្នកប្រើប្រាស់​បាន​កើនឡើងដល់ជាង ៥០០លាននាក់ ក្នុងនោះមាន ៣០០លាននាក់ បានប្រើប្រាស់ជាប្រចាំថ្ងៃ។ នេះបើយោងតាម​ការចេញផ្សាយនៅលើគេហទំព័រ Instagram នៅថ្ងៃទី២២ ខែមិថុនា។

នៅក្នុងសេចក្ដីប្រកាសព័ត៌មានរបស់ Instagram បានឲ្យដឹងថា នេះជាជោគជ័យធំធែងមួយ សម្រាប់ឆ្នាំ​នេះ ដែលតួលេខនៃអ្នកប្រើប្រាស់ បានកើនឡើងយ៉ាងខ្លាំង ជាពិសេសគឺនៅក្នុងរយៈពេល ២ឆ្នាំចុងក្រោយ។

លោក Mark Zuckerberg ស្ថាបនិក Facebook និងជាម្ចាស់ក្រុមហ៊ុន Instagram បានឲ្យដឹងថា នេះ​ជាលទ្ធផលដ៏អស្ចារ្យ ហើយវាក៏ជាការ បើកទ្វារស្វាគមន៍ពិភពលោក ដើម្បីចែករំលែក និង​ផ្សារភ្ជាប់ទំនាក់ទំនង​មនុស្សទាំងអស់ នៅជុំវិញពិភពលោក។

គួរបញ្ជាក់ផងដែរថា Instagram ត្រូវបានបង្កើតឡើងនៅឆ្នាំ ២០១០ ដោយលោក Kevin Systrom និង Mike Krieger ហើយត្រូវបាន Facebook ទិញយកនៅខែមេសា ឆ្នាំ២០១២ ក្នុងតម្លៃ ១ពាន់លាន​ដុល្លារអាមេរិក៕