(បន្ទាយមានជ័យ)៖ នៅព្រឹកថ្ងៃចន្ទ ទី២៦ ខែធ្នូ ឆ្នាំ២០២២ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ តំណាងនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងមេបញ្ជាការកងរាជអាវុធហត្ថលើផ្ទៃប្រទេស បានអញ្ជើញសម្ពោធដាក់ឱ្យប្រើប្រាស់ជាផ្លូវការនូវអគាររដ្ឋបាល និងប្រកាសចូលកាន់មុខតំណែងលោកវរសេនីយ៍ត្រី ចាន់ រដ្ឋា ជាមេបញ្ជាការមូលដ្ឋានកងរាជអាវុធហត្ថស្រុកមង្គលបូរី រួមនឹងមេបញ្ជាការរងចំនួន៣រូបទៀតផងដែរ។
ពិធីនេះក៏មានការអញ្ជើញចូលរួមពីសំណាក់ប្រធានក្រុមប្រឹក្សាស្រុកមង្គលបូរី និងលោក រ័ត្ន ដាស៊ីណង់ អភិបាលស្រុកមង្គលបូរី មេបញ្ជាការរងកងរាជអាវុធខេត្ត នាយទាហាន នាយទាហានរង នៃកងរាជអាវុធហត្ថ និងអាជ្ញាធរមូលដ្ឋានបានចូលរួមផងដែរ។
ថ្លែងនាឱកាសនោះ លោកឧត្តមសេនីយ៍ត្រី បោន ប៊ិន បានលើកឡើងថា សមិទ្ធិផលដែលអង្គភាពកងរាជអាវុធហត្ថទទួលបាននាពេលកន្លងមក ក៏ដូចជាពេលនេះ គឺបានកើតចេញពីការជឿជាក់ និងពីសកម្មភាពការងារល្អ ទំនាក់ទំនងល្អ ជាមួយអាជ្ញាធរមូលដ្ឋាន សមត្ថកិច្ចគ្រប់លំដាប់ថ្នាក់ និងប្រជាពលរដ្ឋគ្រប់ទិសទី។ នេះសបញ្ជាក់ពីមោទនភាពដ៏វិសេសវិសាលបំផុត ក្រោមដំបូលនៃម្លប់សន្តិភាពក្រោមការដឹកនាំ ដ៏ឈ្លាសវៃមគ្គុទ្ទេសក៏ឯក របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងមានការចង្អុលបង្ហាញបញ្ជាផ្ទាល់ពីលោកនាយឧត្តមសេនីយ៍ សៅ សុខា។
លោកឧត្តមសេនីយ៍ត្រី បោន ប៊ិន បានណែនាំដល់មន្ត្រីកងរាជអាវុធហត្ថ ត្រូវយកចិត្តទុកដាក់ក្នុងកិច្ចការងារតាមតួនាទី ភារកិច្ច ជាពិសេសអាវុធហត្ថដែលទើបទទួលតួនាទី ភារកិច្ចថ្មី ត្រូវមានស្មារតីទទួលខុសត្រូវ និងការឆ្លើយតប ចំពោះការផ្តល់នូវភាពជឿជាក់របស់នាយឧត្តមសេនីយ៍ សៅ សុខា ដែលជានិច្ចជាកាល លោកតែងតែខិតខំយកចិត្តទុកដាក់ខ្ពស់ ដឹងសុខ ដឹងទុក្ខ ចំពោះ នាយទាហាន នាយទាហានរង និងពលទាហាន នៃកងរាជអាវុធហត្ថ។
សូមបញ្ជាក់ថា អគាររដ្ឋបាលមូលដ្ឋានកងរាជអាវុធហត្ថស្រុកមង្គលបូរី ដែលត្រូវបានដាក់សម្ពោធឱ្យប្រើប្រាស់ជាផ្លូវការនាថ្ងៃនេះ គឺជាអំណោយដ៏ថ្លៃថ្លារបស់លោកឧត្តមសេនីយ៍ត្រី បោន ប៊ិន ដែលមានទំហំ ២៥២.៦២ម៉ែត្រការ៉េ មាន០៦បន្ទប់, អគារស្នាក់នៅ១, ឃ្លាំងសម្ភារ១, អគារផ្ទះបាយ១, បន្ទប់ទឹក១ រួមនឹងសមិទ្ធិផលផ្សេងៗ សរុបអស់ថវិកាចំនួន១៦១,៨៤៨ដុល្លារ៕
