(ភ្នំពេញ)៖ ក្រុមហ៊ុន Ford  និងក្រុមហ៊ុន អ អិម អេ ខេមបូឌា (RMA Cambodia) បានរៀបចំពិធីសម្ពោធដាក់ប្រើប្រាស់នូវអណ្ដូងទឹកស្អាតចំនួន៨ ស្រុកជុំគិរី  ក្នុងឃុំចំនួន៣ គឺ ស្រែករោង ស្រែកខ្នង និងស្រែចេង ខេត្ដកំពត ដែលចំណាយថវិកាសរុប ២០,០០០ដុល្លារ ក្រោមជំនួយឧបត្ថម្ភនៃមូលនិធិអភិរក្ស និងការពារបរិស្ថានក្នុងប្រទេសកម្ពុជា និងផ្ដល់ធនធានទឹកស្អាត ដែលអនុវត្ដគម្រោងដោយសភាយុវពាណិជ្ជកម្មកម្ពុជា ដើម្បីរួមចំណែកកាត់បន្ថយការលំបាកជារៀងរាល់ថ្ងៃរបស់ប្រជាពលរដ្ឋ ក្នុងការទទួល​បានទឹកស្អាត សម្រាប់ប្រើប្រាស់ប្រចាំថ្ងៃ ។

លោក សេង វឹង នាយកចាត់ការទូទៅផ្នែករថយន្ដ Ford នៃក្រុមហ៊ុន អ អិម អេ ខេមបូឌា បានថ្លែងថា ចាប់ពីថ្ងៃទី២១ ខែ​មិថុនា នេះតទៅ បងប្អូនដែលនៅក្នុងឃុំចំនួន៣នេះ នឹងមានទឹកសម្រាប់ប្រើប្រាស់គ្រប់គ្រាន់វិញហើយ ដែលជាផ្នែកមួយដ៏សំខាន់ដល់ជួយសម្រួលដល់ និងបំពេញភាពខ្វះខាតកន្លងមនេះ ពិសេស ក៏បានផ្ដល់អត្ថប្រយោជន៍ ដល់ប្អូនសិស្សសាលានៅទីនេះផ្ទាល់ បានទឹកស្អាតនេះសម្រាប់សំអាត ដៃ ថ្នាក់រៀន និងដំនាំ និងផ្កាផ្សេងៗនៅជុំវិញសាលាផងដែរ ។

លោក Thanabodee Kulthol ប្រធានផ្នែកទីផ្សារ ផ្នែកលក់ និងសេវាកម្ម ប្រចាំតំបន់អាស៊ីប៉ាស៊ីហ្វិក បានលើកឡើងថា «ថ្ងៃនេះ ជាថ្ងៃដ៏វិសេសវិសាលណាស់ សម្រាប់យើងខ្ញុំទាំងអស់គ្នា ដែលបានប្រារព្ធពិធីដ៏សំខាន់បំផុតដែលក្រុមហ៊ុន Ford តែងតែធ្វើនៅកម្ពុជា ដូចថ្ងៃនេះយើងក៏បានសម្ពោធអណ្ដូងទឹកចំនួន៨ នៅក្នុងខេត្ដកំពត ហើយនេះមិនមែនជាលើកទីមួយទេ ដែលខាងក្រុមហ៊ុនបានជួយអណ្ដូងទឹកនោះ គឺយើងបានជួយសាងសង់អណ្ដូងទឹកស្អាតនេះ ជាង៧០ អណ្ដូងហើយសម្រាប់ សហគមន៍ជនបទតាំងពីឆ្នាំ២០១២ មកម្ល៉េះ បន្ទាប់ពីមានការផ្ដួច​ផ្ដើមដោយអនុប្រធាន ក្រុមហ៊ុន Ford លោកស្រី Elena Ford ក្នុងអំឡុងពេលដំណើរទស្សនកិច្ចកាល ពីឆ្នាំ២០១១នៅកម្ពុជា»។

លោក បន្ដថា ក្នុងឱកាសសម្ពោធដាក់ប្រើប្រាស់អណ្ដូងទឹកស្អាត ខាងក្រុមហ៊ុនយើងក៏បាននាំយកនៅសម្ភារៈសិក្សាមួយចំនួនជូនដល់ប្អូនកុមារកំពុងសិស្សា នៅសាលាបឋមសិក្សា ពោធិសំរោងផងដែរ។ លោកសង្ឃឹមថា បងប្អូនដែលនៅក្នុងឃុំចំនួន៣នេះ នឹងថែរក្សាអណ្ដូងទឹកស្អាតនេះ សម្រាប់ប្រើប្រាស់ឲ្យបានយូរអង្វែង ។

ទន្ទឹមនឹងនោះ លោក អភិបាលស្រុកជុំគិរី លោក ខៀវ រិទ្ធិភ័ណ្ឌ និងប្រជាពលរដ្ឋ បានថ្លែងអំណរគុណ យ៉ាងជ្រាវជ្រៅ បំផុត ដល់ក្រុមហ៊ុន Ford រួមទាំងកម្មវិធីមូលនិធិ អភិរក្ស និងការពារបរិស្ថាន ដែលជាកម្មវិធីមួយដែលក្រុមហ៊ុន Ford ចូលរួមចំណែកជួយសម្រួលដល់ការរស់របស់ប្រជាជនក្នុងសហគមន៍ ផងដែរ ដែលបានជួយ ឧបត្ថម្ភដល់ អណ្ដូងទឹកស្អាតដ៏ច្រើនលើសលុបនេះដល់ បងប្អូនដែលរស់នៅក្នុងឃុំចំនួន៣ ដើម្បីផ្គត់ផ្គង់ដល់ការខ្វះខាតទឹកន្លងមកនេះ ហើយយើងទាំងអស់គ្នា នឹងថែរក្សាឲ្យគង់វង្សរហូតទៅ។

គួរបញ្ជាក់ថា  Ford  បានចូលមកទីផ្សារប្រទេសកម្ពុជា តាំងពីឆ្នាំ១៩៩៧ មកម៉្លេះ  ដែលបានផ្ដោតសំខាន់ក្នុងការផ្ដល់រថយន្ដដែលមានគុណភាពស្ដង់ដាលំដាប់ពិភពលោក យ៉ាងល្អឥតខ្ចោះគ្មានពីរ ធន់ តម្លៃសមរម្យ ទាន់សម័យយ៉ាងទំនើបគ្រប់ពេលវេលាផងដែរ៕