(ភ្នំពេញ)៖ អ្នកជំនាញអារ្យធម៌ខ្មែរ លោក រត្ន័ សណ្ដាប់ បានថ្លែងថានៅថ្ងៃទី២៥ ធ្នូ បើនិយាយអំពីពិធីអបអរសាទរបុណ្យណូអែល-Merry Christmas ជាទិវាជំនឿលើព្រះរបស់គ្រីស្ទបរិស័ទ ដែលបានជួបជុំក្រុមគ្រួសារ បងប្អូន និងមិត្តភ័ក្តិ នៅទូទាំងពិភពលោកដ៏សែនរីករាយនេះ គឺជាបុណ្យដើម្បីរំឭកទៅដល់ព្រះអង្គប្រសូត្រផង និងដើម្បីរំលឹកនូវការគោរពដឹងគុណអំពីគុណតម្លៃនៃភាពស្ងប់សុខ ស្មោះត្រង់ ការបន្ទាបខ្លួនការដឹងគុណ សាមគ្គីភាព និងការរឹតចំណងផ្សះផ្សាជាតិ ដោយការជូនពរឧទ្ទិសនូវភាពស្ងប់សុខ និង «សន្ដិភាព»។
បានសេចក្ដីថាបុណ្យណូអែល ជាការឆ្លុះបញ្ចាំងពីការផ្លាស់ឆ្នាំចាស់ និងត្រៀមទទួលយកឆ្នាំថ្មី ជាថ្ងៃផ្ញើសារជូនពរដល់គ្នាឧទ្ទិសដល់ទ្រង់ ដែលបានលះបង់ជីវិតដោយជាប់ឈើឆ្កាង រហូតក្លាយជាគ្រិស្ដសាសនានូវភាពស្ងប់សុខនិង «សន្តិភាព» ដែលទ្រង់ បាននាំមកជូនគ្រិស្ដបរិស័ទហ្នឹងឯង។
លោក រត្ន័ សណ្ដាប់ បន្ដថាចំពោះប្រព័ន្ធជំនឿ «សន្ដិភាព» នៃគ្រិស្ដសាសនានេះ គឺជា «សន្តិភាព» ដល់ព្រលឹងតាមរយៈការផ្សះផ្សាជាមួយព្រះ និងសេចក្តីរីករាយ ចេញជាផលផ្លែផ្កាដែលបានបង្កើតឡើងយ៉ាងល្អគឺ «ព្រះអង្គជាម្ចាស់នៃសន្តិភាព» នៅលើផែនដី ហើយអញ្ជើញបរិស័ទឲ្យធ្វើការដើម្បី «សន្ដិភាព» ផ្តល់នូវភាពរីករាយនិងស្ងប់សុខដល់មនុស្សគ្រប់ៗគ្នា ជាពេលវេលាដើម្បីនាំមកនូវការចងចាំក្តីសង្ឃឹម និងសេចក្តីស្រឡាញ់ ជាបំណងល្អរបស់ព្រះ។
«សន្តិភាព» ជាមួយនឹងព្រះនេះ ជាភស្ដុតាងចេញពីសារជូនពរថ្ងៃបុណ្យណូអែល នូវពាក្យ «សន្តិភាព» ក្នុងចំណោមមនុស្សដែលទ្រង់សព្វព្រះហឫទ័យយ៉ាងទូលំទូលាយ។ ព្រោះ «សន្តិភាព» ជាខ្លឹមសារក្នុងសារជូនពរក្នុងថ្ងៃបុណ្យណូអែលដើម្បីនាំមកនូវ «សន្តិភាព» ដែលទ្រង់ផ្ដល់ដល់មនុស្សគ្រប់ៗរូប គឺព្រះអង្គជាម្ចាស់នៃ «សន្តិភាព»។
លោក រត្ន័ សណ្ដាប់ បញ្ជាក់ថាចំពោះពាក្យ «សន្តិភាព» នេះត្រូវបានផ្សាភ្ជាប់ទៅនឹងជីវិតរបស់ទ្រង់ តំាងពីប្រសូត្រ រហូតដល់ចុងបញ្ចប់នៃជីវិតរបស់ទ្រង់នៅលើផែនដី ហៅថា «RIP- Rest In Peace សូមស្ងប់ស្ងាត់ដោយសន្ដិភាព»។ ចំពោះបេសកកម្មដ៏ឧត្តុង្គឧត្តមដើម្បីសន្តិភាពនេះ គឺនៅក្នុងចិត្តរបស់បុគ្គលម្នាក់ៗ ដោយចេះទទួលពន្លឺពីព្រះអង្គហើយបន្ត ទៅកាន់មនុស្សគ្រប់ៗគ្នា បានផ្តល់សេចក្តីស្រឡាញ់ពីទ្រង់ចំពោះយើង និងសេចក្តីស្រឡាញ់របស់យើងចំពោះទ្រង់ និងសម្រាប់ផងគ្នាទៅវិញទៅមកដ៏មហិមា។
ហេតុនេះចំពោះពិធីបុណ្យណូអែលនេះ នៅប្រទេសស៊ុយអែត សហគមន៍អឺរ៉ុប ក៏បានក្លាយជាទំនៀមទម្លាប់មួយ ណែនាំឲ្យមនុស្សធ្វើអាកប្បកិរិយាប្រកបដោយការគោរពនូវ «សន្តិភាព» ចាប់ពីចុងស.វ.ទី១៣ រហូតតរៀងមក។ ដូច្នេះពិធីបុណ្យណូអែល ជាការឧទ្ទិសដល់ «សន្តិភាព» ដែលទ្រង់នាំមកជូនគ្រិស្ដបរិស័ទហ្នឹងឯង។ បានន័យថាព្រះអង្គ គឺជាម្ចាស់ «សន្ដិភាព» របស់គ្រិស្ដបរិស័ទ៕
