(កណ្តាល)៖ លោក ណុប រ័ត្ននិមល ជំនួយការសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានក្រុមការងារយុវជនគណបក្សចុះជួយស្រុកកណ្តាលស្ទឹង បានថ្លែងថា ទោះបីគណបក្សប្រជាជនកម្ពុជា ទទួលបានជ័យជំនះទាំងស្រុងទទួលបានអាសនៈ១២៥ ក្នុងរដ្ឋសភាក្នុងការជ្រើសតាំងតំណាងរាស្ត្រ នីតិកាទី៦ កន្លងមក ក៏ដោយក៏គណបក្សប្រជាជនកម្ពុជា នៅតែបន្តខិតខំប្រឹងប្រែងដូចភ្លៀងរលឹម បន្តការចុះជួយអភិវឌ្ឍន៍តាមមូលដ្ឋាន និងបម្រើប្រជាពលរដ្ឋឱ្យបានកាន់តែខ្លាំងខ្លាថែមទៀត ដើម្បីឆ្លើយតបទៅនឹងគុណបំណាចដ៏ថ្លៃថ្លារបស់ប្រជាពលរដ្ឋបានបោះឆ្នោតគាំទ្រជូនគណបក្សប្រជាជនកម្ពុជាកន្លងមក។
ការថ្លែងបែបនេះ របស់លោក ណុប រ័ត្ននិមល បានធ្វើឡើងក្នុងឱកាសដែលលោកបានអញ្ជើញជាតំណាងលោកកិត្តិបណ្ឌិត ហ៊ីង ប៊ុនហៀង សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានស្រុកកណ្តាលស្ទឹង បានអញ្ជេីញប្រកាសតែងតាំងអនុប្រធានក្រុមការងារគណបក្សចុះជួយមូលដ្ឋាន ឃុំព្រែកស្លែង និងចែងប័ណ្ណសរសើរ លិខិតសរសើរជូនសកម្មជនគណបក្សឃុំព្រែកស្លែង ស្រុកកណ្តាលស្ទឹង ខេត្តកណ្តាល នៅព្រឹកថ្ងៃទី២១ ខែធ្នូ ឆ្នាំ២០២២នេះ។
ក្នុងនាមប្រធានក្រុមការងារយុវជនគណបក្សចុះជួយដ្ឋានស្រុក, លោក ណុប រ័ត្ននិមល បានថ្លែងអំណរគុណយ៉ាងជ្រាលជ្រៅ និងដឹងគុណចំពោះប្រជាពលរដ្ឋ និងក្រុមការងារចុះជួយឃុំទាំងអស់ បានបំពេញការងារបានល្អជូនបក្ស និងបានទៅបោះឆ្នោតជូនគណបក្សប្រជាជនកម្ពុជាដ៏ច្រើនលើសលប់ធ្វើឱ្យគណបក្សបានទទួលជ័យជំនះយ៉ាងត្រចះត្រចង់។ ជ័យជំនះនេះបានបង្ហាញឱ្យឃើញថាប្រជាពលរដ្ឋកម្ពុជា មានការជឿជាក់យ៉ាងមុខមាំលើការដឹកនាំរបស់គណបក្សប្រជាជនកម្ពុជាដែលជាគណបក្សតែមួយគត់បានរួមសុខរួមទុក្ខជាមួយប្រជាជនគ្រប់កាលៈទេសៈក្នុងរយៈពេលជិត៤០ឆ្នាំកន្លងមកនេះ ជាគណបក្សដែរបានសម្រេចសមិទ្ធផលយ៉ាងធំធេងជាប្រវត្តិសាស្ត្រជូនជាតិនិងជាគណបក្សមានសមត្ថភាពគ្រប់គ្រាន់ក្នុងការដឹកនាំប្រទេសជាតិឱ្យសម្រេចបានជោគជ័យធំៗជាបន្តទៀត។
លោក ណុប រ័ត្ននិមល បានបញ្ជាក់ថា លទ្ធផលដែលទទួលបាន គឺជាការខិតខំប្រឹងប្រែងរបស់រាជរដ្ឋាភិបាលក្នុងការដាក់ចេញនៅគោលនយោបាយ និងកម្មវិធីកំណែទម្រង់ដោយផ្ដល់លើ បណ្ណាវិស័យសំខាន់ៗមួយចំនួនជាអាទិភាពដើម្បីបំពេញតម្រូវការរបស់ប្រជាពលរដ្ឋទទួលបានសមាចិត្តគាំទ្រគណបក្សប្រជាជនកម្ពុជា៕
