(កំពង់ធំ)៖ ដោយសារប្រទេសមានសុខសន្តិភាព បានធ្វើឲ្យមានការអភិវឌ្ឍរីកចម្រើនលើគ្រប់វិស័យ ក្នុងនោះយើងឃើញថា ការអភិវឌ្ឍដែលរាជរដ្ឋាភិបាលបានកំណត់មាន ផ្លូវ ភ្លើង ទឹក និងធនធានមនុស្ស ដោយឡែកនៅឃុំពង្រ ស្រុកតាំងគោក ខេត្តកំពង់ធំ អាជ្ញាធរ ព្រះសង្ឃ ពុទ្ធបរិស័ទ្ធ បានមូមតិគ្នាផ្តួចផ្តើមស្ថាបនាផ្លូវមួយខ្សែបំពាក់បំពូលសូឡាផងដែរ។
ព្រះគ្រូសីលមុនីវង្ស តុន ពិសី ព្រះគ្រូចៅអធិការវត្តគុហនគរមានសង្ឃដិកាថា សមិទ្ធផលខាងនេះលើ បានមកពីមានការសាមគ្គីភាព ការគាំទ្ររបស់ញាតិញោម ជិតឆ្ងាយ ក្នុងនិងក្រៅប្រទេសហើយការលះបង់របស់ញាតិញោម ពិតជាធំធេងណាស់ ជាការចូលរួមនូវការអភិវឌ្ឍន៏ជាមួយរាជរដ្ឋាភិបាលមានផ្លូវគឺមានអ្វីៗទាំងអស់។
ព្រះអង្គបន្តថា ផ្លូវបេតុងនេះកសាងនៅខែសីហា ឆ្នាំ២០២១ ដែលកសាងមកបានជាង១ គីឡូម៉ែត្រ រួមទាំងអំពូលសូឡាជិត២០០ដើម មានទទឹង ៦ម៉ែត្រ កម្រាស់២០សង់ទីម៉ែត្រ ចំណាយថវិកាប្រមាណជាងមួយពាន់លានរៀល ដែលបានការចូលរួមពីញាតិញោម សប្បុរសជន ទាំងក្នុង និងក្រៅប្រទេស ក្នុងនោះក៏មានការចូលរួមពីប្រមុខរាជរដ្ឋាភិបាលសម្ដេចតេជោផងដែរ។
ព្រះអង្គបានបន្តទៀតថា ក្រោយពីសង្គ្រាមមក មានការយកចិត្តទុកដាក់អភិវឌ្ឍយ៉ាងខ្លាំងក្លាមែនទែន តែមិនអាចបានសព្វជ្រុងជ្រោយ និងបំពេញគ្រប់តម្រូវការបានទេ ដូច្នេះហើយបានជាអាត្មាភាព ព្រមទាំងអាចារ្យ គណៈកម្មការ លោកមេភូមិ មេឃុំ បានស្រុះស្រួលមូលមតិគ្នាផ្ដើមជាកសាងផ្លូវនេះ ដោយរួមជាមួយការអភិវឌ្ឍជាមួយប្រមុខរាជរដ្ឋាភិបាល។ ព្រះអង្គអំពាវនាវដល់ញាតិញោម គ្រប់ទិសទី ជាពិសេសជាមួយគណៈកម្មការ អាជ្ញាធរ ចូលរួមបន្ថែមទៀត ដើម្បីយើងបានសាងសមិទ្ធិផលថ្មីៗ ជាពិសេសសូមញាតិញោមចូលរួមថែរក្សា ដើម្បីឱ្យការប្រើប្រាស់របស់យើងហ្នឹងបានយូរអង្វែង។
ព្រះអង្គក៏បានថ្លែងអំណរគុណអភិបាលស្រុក ដែលតែងតែផ្តល់ជាគំរូរ និងផ្តល់កម្លាំងចិត្តដល់ព្រះអង្គ ពេលឃើញលោកខិតខំប្រឹងប្រែងអភិវឌ្ឍដើរតាមមូលដ្ឋានរហូតថ្ងៃខ្លះ លោកកើតខ្យល់ក៏មានក្នុងនាមជាមាតាបិតា របស់ប្រជាពលរដ្ឋក្នុងស្រុកតាំងគោក នេះជាមូលហេតុដែលនាំឲ្យព្រះអង្គខិតខំចូលរួមអភិវឌ្ឍភូមិឃុំជាមួយលោកអភិបាលនិងពុទ្ធបរិស័ទ។
ប្រជាពលរដ្ឋមានការរីករាយសប្បាយចិត្តយ៉ាងខ្លាំង ដោយសារស្នាព្រះហត្ថរបស់ព្រះគ្រូ ព្រះចៅអធិការវត្តគុហនគរ និងពុទ្ធបរិស័ទទាំងជិត ទាំងឆ្ងាយ ទាំងក្នុងទាំងក្រៅប្រទេស ដែលបានចូលរួមជួយកសាងផ្លូវបេតុងនេះ ឱ្យប្រជាពលរដ្ឋគ្រប់រូបនៅក្នុងភូមិនេះ តែងតែត្រេកអរនិងមិនភ្លេចគុណនូវការកសាងផ្លូវបេតុងប៉ុន្តែម្យ៉ាងវិញទៀតនោះ សូមថ្លែងអំណរគុណដល់រាជរដ្ឋាភិបាលដែលបានជួយជ្រោមជ្រែង និងសន្តិភាពបានជាប្រជាពលរដ្ឋយើងមានដូចសព្វថ្ងៃនេះ៕
