(សៀមរាប)៖ រដ្ឋបាលខេត្តសៀមរាប មន្ទីរអប់រំយុវជន និងកីឡា, មន្ទីរមុខងារសាធាណរៈ និងស្ថាប័នពាក់ព័ន្ធ បានវាយតម្លៃ និងផ្តល់ពិន្ទុដល់សាលារៀនចំនួន៤ ក្នុងខេត្តសៀមរាប ជាប់ជាសាលាគំរូខាងផ្នែកផ្តល់សេវាសាធារណៈទាក់ទងនឹងវិស័យអប់រំ ក្នុងចំណោមសាលារៀនជិត៣០ នៅក្នុងខេត្តដែលនឹងត្រៀមចូលរួមប្រកួតប្រជែងថ្នាក់ជាតិខាងមុខនេះ។
លោក លី ប៊ុណ្ណា ប្រធានមន្ទីរអប់រំ យុវជន និងកីឡា ខេត្តសៀមរាប បានបញ្ជាក់ប្រាប់ Fresh News ឱ្យដឹងថា អនុវិទ្យាល័យចំនួន២ ដែលជាប់ជាសាលាគំរូខាងផ្នែកផ្តល់សេវាសាធារណ:ទាក់ទងនឹងវិស័យអប់រំ គឺអនុវិទ្យាល័យខ្មែរមិត្ដភាពជប៉ុនព្រះឥន្ទកោសាក្រុងសៀមរាប បានជាប់ចំណាត់ថ្នាក់លេខ១ និងអនុវិទ្យាល័យអង្គរធំ បានជាប់ចំណាត់លេខ២។ ដោយឡែក សាលាបឋមសិក្សាក៏មានចំនួន២ផងដែរ ដែលជាប់សាលាផ្ដល់សេវាសាធារណៈគំរូសម្រាប់វិស័យអប់រំ មានបឋមសិក្សាវត្តបូព៌ និងបឋមសិក្សាក្រវាន់ ហើយសាលាទាំងពីរនេះ ក៏ត្រៀមនឹងចូលប្រកួតថ្នាក់ជាតិនៃការប្រឡងប្រណាំងផ្តល់សេវាសាធារណៈល្អផ្នែកអប់រំផងដែរ។
លោក លី ប៊ុណ្ណា បានបន្តថា កាលពីឆ្នាំកន្លងទៅការវាយសាលាគំរូខាងផ្នែកផ្តល់សេវាសាធារណ:ទាក់ទងនឹងវិស័យអប់រំ គឺរៀបចំធ្វើតែនៅវិទ្យាល័យប៉ុណ្ណោះ ហើយវិទ្យល័យចំនួន២ នៅក្នុងខេត្តសៀមរាប ក៏បានជាប់ជាវិទ្យាល័យគំរូផងដែរ ក្នុងនោះមាន៖ វិទ្យល័យពួក និងវិទ្យល័យហ៊ុនសែនប្រាសាទបាគង។
លោក លី ប៊ុណ្ណា បានបន្តទៀតថា ចំពោះការវាយតម្លៃ និងផ្ដល់ពិន្ទុដល់សាលារៀនគំរូទាំងនេះ គឺមានការចូលរួមពីអាជ្ញាធរខេត្ដ មន្ទីរអប់រំយុវជន និងកីឡា មន្ទីរមុខងារសាធារណ: និងស្ថាប័នពាក់ព័ន្ធ ដោយបានចុះទៅពិនិត្យនៅតាមសាលានីមួយៗដោយផ្ទាល់ ដើម្បីធ្វើការវាយតម្លៃ និងផ្ដល់ពិន្ទុផងដែរ។
ដោយឡែក ចំពោះលក្ខណវិនិច្ឆ័យមានចំនួន ៨ចំណុច ដែលត្រូវបានយកមកធ្វើការវាយតម្លៃរួមមានទី១៖ ស្ដង់ដាសេវាសាធារណៈ ទី២៖ ភាពងាយស្រួលក្នុងការទទួលយកសេវាទី៣៖ ភាពយកចិត្តទុកដាក់ក្នុងការទទួលអ្នកប្រើប្រាស់សេវា, ទី៤៖ ការផ្តល់សេវាតាមគោលការណ៍កំណត់ និងអភិបាលកិច្ចទី៥៖ ការអនុវត្តដើម្បីភាពស្អាត អនម័យ និងភាពបៃតងក្នុងសាលារៀន, ទី៦៖ ទំនាក់ទំនងល្អជាមួយប្រជាពលរដ្ឋ សហគមន៍ និងដៃគូអភិវឌ្ឍ ព្រមទាំងការចូលរួមវាយតម្លៃពីអ្នកប្រើប្រាស់សេវាសាអារណៈ, ទី៧៖ ការដោះស្រាយបញ្ហាប្រឈមជាមួយប្រជាពលរដ្ឋ និងសហគមន៍ និងទី៨៖ ការផ្តួចផ្តើមគំនិតថ្មីៗ និងនវានុវត្តន៍ ដើម្បីធ្វើឱ្យអង្គភាពមានដំណើរការកាន់តែប្រសើរ។
ជាមួយនេះដែរ លោក លី ប៊ុណ្ណា ក៏រំពឹងថាសាលារៀនទាំង៤នេះនឹងទទួលបានលទ្ធផលល្អក្នុងការប្រកួតថ្នាក់ជាតិនាពេលខាងមុខ សម្រាប់ការវាយតម្លៃជាសាលាគំរូផ្នែកសេវាសាធារណ:សម្រាប់វិស័យអប់រំនៅទូទាំងប្រទេសផងដែរ៕
