(បន្ទាយមានជ័យ)៖ ជនសង្ស័យម្នាក់ដែលត្រូវបានកម្លាំងនគរបាលក្រុងប៉ោយប៉ែត ឃាត់ខ្លួនយោងតាមការដាក់ពាក្យបណ្តឹងពីជនរងគ្រោះ ពីបទឆបោកនោះ បានធ្វើអត្តឃាតចង-ក សម្លាប់ខ្លួន នៅក្នុងបន្ទប់ឃុំខ្លួនបណ្តុះអាសន្ន នៃនៅអធិការដ្ឋានក្រុងប៉ោយប៉ែត ខេត្តបន្ទាយមានជ័យ។
ជនសង្ស័យរូបនេះ មិនទាន់ត្រូវ បានសាកសួរផង ក៏ធ្វើអត្តឃាតខ្លួនឯងដោយយកខោជើងចង និងទ្វារ បណ្តាលឲ្យស្លាប់តែម្តង បើទោះសមត្ថកិច្ច បានទៅជួយអន្តរាគមន៍ក៏ដោយនោះ។
ហេតុការណ៍នេះ បានកើតឡើថនៅល្ងាច ថ្ងៃទី១៩ ខែមិថុនា ឆ្នាំ២០១៦ ស្ថិតនៅអធិការដ្ឋាននគរបាលក្រុងប៉ោយប៉ែត។
លោក អ៊ុំ សុផល អធិការនគរបាលក្រុងប៉ោយប៉ែតបានឲ្យភ្នាក់ងារ Fresh News នៅព្រឹកថ្ងៃទី២០ ខែមិថុនានេះថា ជនសង្ស័យឈ្មោះវ៉ា សាន់ ហៅហូ អាយុ ៤៦ឆ្នាំ នៅភូមិផ្សារកណ្តាល សង្កាត់ផ្សារកណ្តាល។
លោកថា ជនសង្ស័យ បានចងកក្នុងបន្ទប់ឃុំខ្លួនបណ្តោះអាសន្ន ដោយយកខោជើងវែងដែលស្លៀកជាប់នឹងខ្លួនឯង យកមកចង ក នៅនិងជង្រឹងទ្វារបន្ទប់ ខាងមុខពេលនោះកំលាំងប្រចាំការទាំងអស់ បានឃើញហើយនាំគ្នាស្ទុះទៅជួយង្រ្គោះភ្លាម ៗ ដែរ តែជួយសង្រ្គោះមិនបាន ហើយ ក៏ដាច់ខ្យល់ស្លាប់តែម្តង ។
មន្រ្តីនគរបាល បានឲ្យដឹងថា ជនសង្ស័យរូបនេះ បានបោកលុយ ជាង១៣លានរៀល ពីជនរងគ្រោះ ដើម្បីជាថ្នូរ ការចូលបម្រើការងារជាមន្រ្តីនគរបាល តែដោយជនរងគ្រោះដឹង ក៏ប្តឹងមកសមត្ថកិច្ច រហូតឃាត់ខ្លួនតែម្តង។
លោកបានបញ្ជាក់ថា ជនសង្ស័យឃុំខ្លួន បណ្តោះអាសន្នក្នុងករណី ឆបោក តែមុននឹងយកទៅឃុំខ្លួន កំលាំងជំនាញ បានដោះអាវទុក មិនឲ្យពាក់ ទុកតែខោជើងវែងស្លៀកប៉ុណ្ណោះ។
បច្ចុប្បន្ននេះ សាកសពតម្កល់ទុកនៅវត្តបាលិលេយ្យ ក្រុងប៉ោយប៉ែត រង់ចាំក្រុមគ្រួសារយកទៅធ្វើបុណ្យតាមប្រពៃណី៕
