(ភ្នំពេញ)៖ លោកបណ្ឌិត ហ៊ុន ម៉ាណែត បេក្ខភាពនាយករដ្ឋមន្ត្រីបន្តវេនរបស់គណបក្សប្រជាជនកម្ពុជា បានចែករំលែក និងលើកបង្ហាញគន្លឹះចំនួន៤ ដែលនាំឱ្យជីវិតសិក្សា និងជីវិតការងារអាចទទួលបានជោគជ័យ។

គន្លឹះទាំង៤នោះរួមមាន៖
១៖ ជោគជ័យធំ គឺកើតចេញពីជោគជ័យតូចៗជាច្រើនរួមផ្គុំគ្នា
២៖ ការខិតខំប្រឹងប្រែងព្យាយាមតស៊ូ ជាកត្តាសំខាន់នៃភាពជោគជ័យ
៣៖ ភាគជោគជ័យពេលខ្លះអាចប្រើពេលវេលាយូរអង្វែង ដូច្នេះទាមទានូវការអំណត់អត់ធន់
៤៖ ការកំណត់គោលដៅច្បាស់លាស់ និងបន្តទៅមុខជានិច្ចរហូតសម្រេចបាននូវគោលដៅនោះ ទោះជាត្រូវប្រឈមនឹងបញ្ហាជាច្រើនតាមផ្លូវក៏ដោយ។

លោកបណ្ឌិត ហ៊ុន ម៉ាណែត បានចែករំលែកនូវគន្លឹះទាំងនេះ ក្នុងឱកាសអញ្ជើញប្រគល់សញ្ញាបត្រដល់និស្សិតបញ្ចប់ការនៅក្នុងខេត្តបាត់ដំបង កាលពីថ្ងៃទី១២ ខែធ្នូ ឆ្នាំ២០២២កន្លងទៅនេះ។

នៅក្នុងពិធីចែកសញ្ញាបត្រនោះ អនាគតនាយករដ្ឋមន្ត្រីកម្ពុជាដែលបញ្ចប់ការសិក្សាពីសហរដ្ឋអាមេរិក និងចក្រភពអង់គ្លេសរូបនេះ បានចែករំលែកបទពិសោធន៍មួយចំនួនទាំងជីវិតការសិក្សា និងជីវិតការងារ ដើម្បីជាទុនសម្រាប់និស្សិតបញ្ចប់ការសិក្សាយកទៅប្រតិបត្តិនៅក្នុងជីវិតរបស់ពួកគេ។

អនាគតនាយករដ្ឋមន្ត្រីដែលកំពុងមានប្រជាប្រិយភាពរូបនេះ បានគូសបញ្ជាក់ថា បទពិសោធន៍ទាំងក្នុងជីវិតសិក្សា និងជីវិតការងារមិនខុសនោះឡើយ។ សម្រាប់លោកបណ្ឌិត ហ៊ុន ម៉ាណែត គន្លឹះទាំង៤ ដែលបានលើកបង្ហាញ គឺជាធាតុដ៏សំខាន់ ដើម្បីសម្រេចបានជោគជ័យក្នុងជីវិតសិក្សា​ និងជីវិតការងារ។

លោកបណ្ឌិត ហ៊ុន ម៉ាណែត បានទម្លាយផងដែរថា ទាំងក្នុងជីវិតសិក្សា និងការងាររបស់លោក បានជួបរឿងបរាជ័យជាច្រើន ប៉ុន្តែលោកមិនដែលបោះបង់នោះឡើយ៕