(ភ្នំពេញ)៖ លោក ហូ វ៉ាន់ តំណាងរាស្រ្តគណបក្សសង្រ្គោះជាតិ បានប្រកាសថា គណបក្សសង្រ្គោះជាតិ នឹងនៅតែធ្វើពិធីជួបជុំបួងសួងនៅខេត្តសៀមរាប នៅថ្ងៃទី១៩ ខែមិថុនា ឆ្នាំ២០១៦ដដែល ខណៈអាជ្ញាធរខេត្តសៀមរាបអះអាងថា ការជួបជុំបួងសួងដោយមានមនុស្សច្រើនចូលរួមនេះ មិនបានសុំការ អនុញ្ញាតជាមុនទេ។ ជាមួយគ្នានេះអាជ្ញាធរមាន ការព្រួយបារម្ភអំពីបញ្ហា សន្តិសុខ សណ្តាប់ធ្នាប់។
លោក ឡុង កុសល អនុប្រធាននាយកដ្ឋានផ្សព្វផ្សាយ នៃអាជ្ញាធរជាតិអប្សរា បានថ្លែងប្រាប់អង្គភាព Fresh News ឲ្យដឹងថា គិតត្រឹមម៉ោង១២ថ្ងៃត្រង់នេះ អាជ្ញាធរជាតិអប្សរា ពុំទាន់ទទួលលិខិតផ្លូវការណាមួយ ពីខាងគណបក្សសង្គ្រោះជាតិ (CNRP) ជុំវិញការរៀបចំប្រារព្ធពិធីនៅមុខប្រាសាទអង្គរវត្តនៅថ្ងៃទី១៩ ខែមិថុនា ឆ្នាំ២០១៦ស្អែកនោះទេ។
មន្រ្តីអាជ្ញាធរជាតិអប្សរារូបនោះបានបញ្ជាក់ថា «ពិធីណាក៏ដោយ ត្រូវតែមានការសុំច្បាប់ពីអាជ្ញាធរជាតិអប្សរា មុនការប្រារព្ធរៀបចំនៅរមណីយដ្ឋានអង្គរ»។
កាលពីម្សិលមិញ អាជ្ញាធរជាតិអប្សរាបានប្រកាសថា ខ្លួនពុំទាន់ទទួលបានសំណើផ្លូវការណាមួយពី CNRP ជុំវិញការប្រារព្ធពិធីនៅមុខប្រាសាទអង្គរវត្ត នៅថ្ងៃទី១៩ ខែមិថុនា ឆ្នាំ២០១៦នោះទេ។
អាជ្ញាធរជាតិអប្សរា បានបញ្ជាក់ថា៖ «ថ្នាក់ដឹកនាំគណបក្សសង្គ្រោះជាតិ បានប្រកាសរៀបចំបួងសួង តាមបែបព្រះពុទ្ធសាសនា នៅបរិវេណខាងមុខប្រាសាទអង្គរវត្ត នៅថ្ងៃទី១៩ ខែមិថុនា ឆ្នាំ២០១៦។ ចំពោះករណីនេះ មកទល់រសៀលថ្ងៃទី១៧ ខែមិថុនានេះ អាជ្ញាធរជាតិអប្សរា ពុំទាន់ទទួលបានសំណើរប្រារព្ធពិធីនេះជាផ្លូវការនៅឡើយទេ។ អាជ្ញាធរជាតិអប្សរា មានការព្រួយបារម្ភចំពោះបញ្ហាសន្តិសុខ សណ្តាប់ធ្នាប់ របៀបរៀបរយ និងផលប៉ះពាល់មកដល់បេតិកភណ្ឌ បណ្តាលមកពីការប្រារព្ធពិធីដែលគ្មានការអនុញ្ញាត, ត្រូវទទួលខុសត្រូវទាំងស្រុង ចំពោះមុខច្បាប់ជាធរមាន ពាក់ព័ន្ធនឹងឧបទ្ទវហេតុជាយថាហេតុដែលកើតចេញអំពីការប្រារព្ធពិធីនេះ»។
ឆ្លើយតបនឹងសេចក្តីជូនដំណឹងខាងលើ លោក ហូ វ៉ាន់ នៅក្នុងសន្និសីទកាសែត នៅទីស្នាក់ការគណបក្សសង្រ្គោះជាតិ នាព្រឹកថ្ងៃទី១៨ ខែមិថុនា ឆ្នាំ២០១៦នេះ បានអះអាងថា ការរៀបចំពិធីសាសនានៅខេត្តសៀមរាប មិនចាំបាច់សុំការអនុញ្ញាតពីអាជ្ញាធរនោះទេ គ្រាន់តែជូនដំណឹងប៉ុណ្ណោះ។ លោកថា «ធម្មតាការរៀបចំ បែបពុទ្ធសាសនា គ្មានហេតុផលអ្វីដែលយើងត្រូវសុំច្បាប់ទេ យើងគ្រាន់តែមានការជូនដំណឹងថា យើងរៀបចំពិធី នេះពិធីនោះ ប៉ុន្តែយើងធ្វើនេះមិនមែនប្រមូល ប្រជាពលរដ្ឋដើម្បីធ្វើវេទិកា ធ្វើបាតុកម្ម គឺមិនមែនទេ គឺយើងធ្វើបែបពុទ្ធសាសនា ដើម្បីសុំសុខសន្តិភាព ដើម្បីការបង្រួបបង្រួមជាតិ ដើម្បីការអភិវឌ្ឍជាតិតែប៉ុណ្ណោះ»។
សូមបញ្ជាក់ថា គណបក្សសង្រ្គោះជាតិ បានប្រកាសថា ខ្លួននឹងរៀបចំពិធីបួងសួង ចំនួន២កន្លែងនៅខេត្តសៀមរាប នៅថ្ងៃទី១៩ ខែមិថុនា ឆ្នាំ២០១៦ ខាងមុខនេះ ក្នុងនោះមាននៅខាងមុខព្រះអង្គចេកព្រះអង្គចម និងមុខប្រាសាទអង្គរវត្ត។ ការរៀបចំពិធីបួងសួងនេះ បានធ្វើឡើងបន្ទាប់ពីតុលាការ មានវិធានការជាបន្តបន្ទាប់ ចំពោះលោក កឹម សុខា ប្រធានស្តីទីគណបក្សសង្រ្គោះជាតិ ដែលរងនូវបទចោទប្រកាន់មួយថ្មីមួយ ជុំវិញការមិនចូលខ្លួនបំភ្លឺ ក្នុងនាមជាសាក្សី ក្នុងរឿងសញ្ជារកម្ម៕
