(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅព្រឹកថ្ងៃទី១៨ ខែមិថុនា ឆ្នាំ២០១៦នេះ បានអញ្ជើញទៅចូលរួមបុណ្យសពលោកតា សាយ ភូថង នៅខេត្តកោះកុង ដោយនៅក្នុង​ពេលធ្វើដំណើរតាមរថយន្តលើផ្លូវជាតិលេខ៤ ពីភ្នំពេញមកកាន់ខេត្តកោះកុងព្រឹកនេះ សម្តេចមានឱកាសបានមើលឃើញ ជាបន្តបន្ទាប់នូវស្ថានភាពរស់នៅរបស់បងប្អូនប្រជាពលរដ្ឋ និងអាជីវករលក់​ដូរនៅតាមដងផ្លូវ ព្រមជាមួយរថយន្តដឹកទំនិញតូចធំ ធ្វើចរាចរណ៌តាមផ្លូវដែលបង្ហាញ ឲ្យឃើញពីការរីកចម្រើននៃប្រទេសជាតិ។ ចំពោះផ្លូវថ្នល់ និងស្ពានក៏មានលក្ខណៈ​កាន់តែធំទូលាយងាយ​ស្រួលក្នុងការធ្វើដំណើរបានឆាប់ផងដែរ។

សម្តេចតេជោ ហ៊ុន សែន បានបង្ហាញនៅលើ Facebook នូវរូបភាពជួបផ្ទាល់ប្រជាពលរដ្ឋ និងខ្លឹមសារយ៉ាងដូច្នេះថា៖ «នៅតាមដងផ្លូវចូលមកកាន់ខេត្តកោះកុង ខ្ញុំបានចុះសួរសុខ​ទុក្ខប្អូនប្រុស​អ្នករត់ម៉ូតូឌុប និងក្មួយស្រីអ្នកលក់ចាប់ហួយ ព្រមទាំងក្រុមគ្រួសារកសិករប្រកបរបរស្រែចំការដែលមានដាំដំណាំនៅជុំវិញផ្ទះ។ ខ្ញុំសប្បាយចិត្តដែលបានស្វែងយល់ និងបានឃើញជនរួម​ជាតិរស់នៅសុខ​សាន្ត មានរបបរទទួលទាន និងមានម៉ូតូជាយាន្តជំនិះផ្ទាល់ស្ទើរគ្រប់ផ្ទះ។ ខ្ញុំសូមអរគុណ បងប្អូនជនរួមជាតិដែលបានចូលរួមថែរក្សាសន្តិភាព យើងទាំងអស់គ្នាបន្តខិតខំចូលរួមកសាង និងអភិវឌ្ឍន៍​ប្រទេសជាតិយើង ឲ្យកាន់តែរីកចម្រើនខ្លាំងឡើង»៕