(ភ្នំពេញ)៖ ការផ្សព្វផ្សាយលក់បារីអេឡិចត្រូនិក ឬវេប (Vape) នៅតែបន្តកើតមានតាមរយៈបណ្តាញព័ត៌មានសង្គម, អង្គការចលនា ដើម្បីសុខភាពកម្ពុជា (CMH) បានស្នើសុំឱ្យស្ថាប័នមានសមត្ថកិច្ច ចាត់វិធានការឱ្យបានតឹងរឹងបំផុត ដើម្បីបង្ការកុមារ និងយុវជន កុំឱ្យធ្លាក់ទៅក្នុងការញៀនផលិតផលបារីអេឡិចត្រូនិក ខណៈដែលផលិតផលនេះត្រូវបានរាជរដ្ឋាភិបាលកម្ពុជា ហាមឃាត់មិនឱ្យប្រើប្រាស់ នាំចូល និងចែកចាយ។

នៅក្នុងសេចក្តីប្រកាសព័ត៌មាន របស់អង្គការចលនាដើម្បីសុខភាពកម្ពុជា ដែលបណ្តាញព័ត៌មាន Fresh News ទទួលបាននៅថ្ងៃទី០៥ ខែធ្នូ ឆ្នាំ២០២២នេះ បានឱ្យដឹងទៀតថា តាមរយៈការសង្កេតតាមដានជាប្រចាំ បានរកឃើញថា បណ្ដាញទំនាក់ទំនងសង្គមដូចជា Facebook Tik Tok និង Telegram ជាដើម នៅតែជាឧបករណ៍សម្រាប់ជនខិលខូចប្រើប្រាស់នៅក្នុងការផ្សព្វផ្សាយលក់ បង្ហោះជារូបភាព ឬវីដេអូ ទាក់ទាញឱ្យមានការប្រើប្រាស់ជាពិសេសក្នុងចំណោមយុវជន និងកុមារ។

ក្នុងនោះផងដែរយើងក៏មានឃើញតារាមួយចំនួនដែលកំពុងតែបង្ហាញពីការប្រើប្រាស់ផលិតផលទាំងនេះដោយមិនខ្វល់ពីផលប៉ះពាល់ ក៏ដូចជាធ្វើជាគម្រូមិនល្អសម្រាប់អ្នកគាំទ្រដែលសុទ្ធសឹងជាយុវជន និងកុមារ។ សកម្មភាពនេះបានចុះថមថយមួយរយៈខណៈដែលអាជ្ញាធរមានសមត្ថកិច្ច មានវិធានការចុះចាប់ និងធ្វើកិច្ចសន្យាជាមួយអ្នកប្រព្រឹត្តកុំឱ្យបន្តទៀត។ ប៉ុន្តែមួយរយៈពេលចុងក្រោយនេះ សកម្មភាពលក់និងចែកចាយបារីអេឡិចត្រូនិកនេះ ហក់ឡើងវិញ តាមបណ្តាញព័ត៌មានសង្គម។

អង្គការ CMH បានឱ្យដឹងទៀតថា បារីអេឡិចត្រូនិក ជាផលិតផលដ៏មានគ្រោះថ្នាក់ វាផ្ទុកជាតិនីកូទីន ដែលធ្វើឱ្យអ្នកប្រើប្រាស់ញៀនខ្លាំង ជាពិសេសចំពោះយុវជន និងកុមារ។ នីកូទីននេះក៏បង្កឱ្យមានការខូចខាតយ៉ាងធ្ងន់ធ្ងរដល់ការលូតលាស់ខួរក្បាលរបស់កុមារ។ ចំពោះយុវជន នីកូទីន ធ្វើឱ្យមានការចង់ចាំមិនល្អ ភ្លេចភ្លាំង ពិបាកក្នុងការផ្ចង់អារម្មណ៍ ដែលនាំឱ្យប៉ះពាល់ដល់សមត្ថភាពការងារ និងរៀនសូត្រ។ ចំណែក សារធាតុផ្សេងទៀត ដូចជាប្រូពីលែនគ្លីកូល (Propylene glycol) និង គ្លីសេរីន (Glycerin) វាធ្វើឱ្យប៉ះពាល់យ៉ាងធ្ងន់ធ្ងរដល់សួត និងបេះដូង។

យ៉ាងណាមិញបើយោងតាមលទ្ធផលបឋមនៃការសិក្សាស្រាវជ្រាវអំពីការប្រើប្រាស់ ចែកចាយ និងជួញដូរបារីអេឡិចត្រូនិកនៅក្នុងសាលារៀន បានបង្ហាញឱ្យឃើញថា យុវជន និងកុមារ ដែលជាសិស្សភាគច្រើន បានឃើញ បានស្គាល់ ជាពិសេសបានទិញបារីអេឡិចត្រូនិក (Vape) មកប្រើប្រាស់ តាមរយៈបណ្ដាញទំនាក់ទំនងសង្គម។ វត្តមាននៃការផ្សព្វផ្សាយលក់ ក៏ដូចជាការបង្ហាញអំពីការប្រើប្រាស់បារីអេឡិចត្រូនិកនៅតាមបណ្ដាញទំនាក់ទំនងសង្គម ដូចជា Facebook Tik Tok និង Telegram ជាដើមនេះ គឺពិតជាជះឥទ្ធិពលយ៉ាងអាក្រក់ចំពោះយុវជន និងកុមារ និងឈានដល់ការបំផ្លាញអនាគតពួកគេ។ យុវជន និងកុមារជាអនាគតធនធានមនុស្សរបស់ប្រទេសជាតិ ចុះបើអនាគតពួកគេត្រូវបានបំផ្លាញ តើអនាគតប្រទេសជាតិនឹងទៅជាយ៉ាងណា?

គួរបញ្ជាក់ផងដែរថា ផលិតផលបារីអេឡិចត្រូនិក គឺជាផលិតផលដែលត្រូវបានហាមឃាត់ការចែកចាយ ការធ្វើអាជីវកម្ម និងការប្រើប្រាស់នៅក្នុងព្រះរាជាណាចក្រកម្ពុជា យោងតាមសេចក្ដីណែនាំ ស្ដីពី ការចាត់វិធានការ បង្ការ បញ្ឈប់ការប្រើប្រាស់ ការធ្វើអាជីវកម្ម និងការនាំចូលផលិតផលស៊ីហ្សា (Sisha) និងបារីអេឡិចត្រូនិក (E-Cigarette) នៅក្នុងព្រះរាជាណាចក្រកម្ពុជា ចុះឆ្នាំ២០១៤។

យោងតាមការសិក្សាប្រមូលទិន្នន័យដោយ CDC នៃសហរដ្ឋអាមេរិក ចាប់ពីខែ សីហា ឆ្នាំ ២០១៩ ដល់ខែ កុម្ភៈ ឆ្នាំ ២០២០ បានបង្ហាញថាមានប្រជាជនអាមេរិកចំនួន២៨០៧នាក់ ឈឺ និង៦៨នាក់ បានស្លាប់ដោយសារតែជំងឺសួត ដែលបណ្ដាលមកពីការប្រើប្រាស់បារីអេឡិចត្រូនិក៕