(ភ្នំពេញ)៖​ ធនាគារជាតិនៃកម្ពុជា​ ក្នុងនាមជាប្រធានប្តូរវេននៃមជ្ឈមណ្ឌលស្រាវជ្រាវនិងបណ្តុះបណ្តាលធនាគារកណ្តាលអាស៊ីអាគ្នេយ៍ (ដែលហៅកាត់ថា ស៊ាសិន) សម្រាប់ឆ្នាំ២០២៣ នឹងរៀបចំសន្និសីទថ្នាក់ទេសាភិបាលស៊ាសិនលើកទី៥៨ និងសិក្ខាសាលាជាន់ខ្ពស់ SEACEN-IMF-STI​ ព្រមទាំងកិច្ចប្រជុំក្រុមប្រឹក្សានៃទេសាភិបាលស៊ាសិនលើកទី៤២​ រយ:ពេល៣ថ្ងៃចាប់ពីថ្ងៃទី៤-៦ ខែធ្នូ ឆ្នាំ២០២២ នៅខេត្តសៀមរាប។

សន្និសីទនិងសិក្ខាសាលាជាន់ខ្ពស់នេះ​ ត្រូវបានរៀបចំជាលក្ខណៈអ៊ីប្រ៊ីដ ដោយមានការចូលរួមផ្ទាល់ និងតាមប្រព័ន្ធអនឡាញ ដោយទេសាភិបាលធនាគារកណ្តាល និងនាយកគ្រប់គ្រងអាជ្ញាធររូបិយវត្ថុ​ ដែលជាសមាជិកស៊ាសិនចំនួន ១៩ ប្រទេសនៅក្នុងតំបន់  ព្រមទាំងមានការចូលរួមជាកិត្តិយសពី លោកស្រី Christine Lagarde  ប្រធានធនាគារកណ្តាលអឺរ៉ុប (ECB) តំណាងរបស់មូលនិធិរូបិយវត្ថុ អន្តរជាតិ  (IMF)  ធនាគារសម្រាប់ការទូទាត់អន្តរជាតិ (BIS) សាស្រ្តាចារ្យនៃសាកលវិទ្យាល័យ Harvard និងស្ថាប័នអន្តរជាតិមួយចំនួនទៀត។  

សន្និសីទនាឆ្នាំនេះត្រូវបានរៀបចំឡើងក្រោមមូលបទ៖ «បញ្ហា ប្រឈមនៃគោលនយោបាយបច្ចុប្បន្ន៖ បរិបទសេដ្ឋកិច្ចសកលនិងអាស៊ី បញ្ហាប្រឈមនៃការផ្លាស់ប្តូរ និងការពង្រីកការផ្តល់ហិរញ្ញប្បទានអាកាសធាតុ»។

ទន្ទឹមនេះលោក ជា ចាន់តូ ទេសាភិបាល ធនាគារជាតិនៃកម្ពុជា ក្នុងនាមជាប្រធានប្តូរវេន​ នឹងដឹកនាំកិច្ចប្រជុំក្រុមប្រឹក្សានៃទេសាភិបាលស៊ាសិនលើកទី៤២ ដើម្បីពិនិត្យ​ និងពិភាក្សាលើវឌ្ឍនភាព ការងាររបស់មជ្ឈមណ្ឌលស៊ាសិន ដែលសម្រេចបានក្នុងរយៈពេល ១ឆ្នាំកន្លងទៅនេះ និងកំណត់ទិសដៅ ការងារចម្បងៗ ដែលនឹងគាំទ្រដល់មុខងារ-ភារកិច្ចរបស់មជ្ឈមណ្ឌល ស៊ាសិន ដែលក្នុងនោះរួមមាន៖

* ការបណ្តុះបណ្តាលជំនាញការងារ. ធនាគារកណ្តាល ភាពជាអ្នកដឹកនាំ ការពង្រឹងការស្រាវជ្រាវ ក្នុងតំបន់ និងការលើកកម្ពស់កិច្ចសហប្រតិបត្តិការ រវាងប្រទេសជាសមាជិក។

គណៈប្រតិភូដែលចូលរួមសន្និសីទនិងកិច្ចប្រជុំខាងលើ ក៏នឹងអញ្ជើញទស្សនាស្វែងយល់. ពីសក្តានុពលទេសចរណ៍ប្រវត្តិសាស្រ្តកម្ពុជា ក៏ដូចជាវប្បធម៌ និងប្រពៃណីខ្មែរ ដែលមានលើ ទឹកដីនៃខេត្តសៀមរាបផងដែរ។

គួររំលេចថា មជ្ឈមណ្ឌលស៊ាសិនត្រូវបានបង្កើតឡើងតាំងពីឆ្នាំ១៩៨២ ដោយមានបេសកកម្មចម្បង ផ្តោតលើការពង្រឹងសមត្ថភាពជំនាញរបស់មន្រ្តី-បុគ្គលិកធនាគារកណ្តាល និងអាជ្ញាធររូបិយវត្ថុ ជាសមាជិក តាមរយៈការបណ្តុះបណ្តាលនិងស្រាវជ្រាវ។

បច្ចុប្បន្នមជ្ឈមណ្ឌលស៊ាសិន មានសមាជិក ដែលជាធនាគារកណ្តាល និងអាជ្ញាធររូបិយវត្ថុចំនួន១៩ដូចជា៖ ព្រុយណេ កម្ពុជា ចិន ឥណ្ឌា ឥណ្ឌូណេស៊ី ហុងកុង កូរ៉េខាងត្បូង ឡាវ ម៉ាឡេស៊ី ម៉ុងហ្គោលី មីយ៉ាន់ម៉ា នេប៉ាល់ ប៉ាពូអាស៊ីនូវែល-ហ្គីណេ ហ្វីលីពីន សិង្ហបុរី ស្រីលង្កា តៃវ៉ាន់ ថៃ និងវៀតណាម៕