(ភ្នំពេញ)៖ លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានលើកឡើងថា ស្មារតី ២ ធ្នូ ក្លាយទៅជាថ្ងៃដែលនៅស្ថិតស្ថេរជាអមតៈ ក្នុងដួងចិត្ត ប្រជាជនកម្ពុជា ជាពិសេសដួងចិត្តយុវជនជំនាន់ក្រោយគ្រប់ៗរូប ត្រូវតែងតែប្រារព្ធទិវារំលឹកខួបនេះជារៀងរាល់ឆ្នាំ និងបានចាត់ទុក ថ្ងៃ ២ ធ្នូ ជាថ្ងៃចាប់ផ្ដើមដ៏អស្ចារ្យ ក្នុងការផ្ដួលរំលំរបប ប៉ុល ពត។
លោកស្រីកិត្តិសង្គហបណ្ឌិត ម៉ែន សំអន បានបញ្ជាក់ថា «ថ្ងៃ ២ ធ្នូ គឺជាសច្ចធម៌ប្រវត្តិសាស្ត្រដែលមិនអាចបំភ្លៃ បំផ្លើស បំភ្លេច និងបំផ្លាញបានឡើយ»។
ការលើកឡើងបែបនេះ របស់លោកស្រីបណ្ឌិត ម៉ែន សំអន បានធ្វើឡើងក្នុងឱកាសដែលលោកស្រីបានអញ្ជើញជាតំណាងសម្តេចពញាចក្រី ហេង សំរិន ប្រធានរដ្ឋសភា និងជាប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា បានអញ្ជើញជាអធិបតីក្នុង មិទ្ទីញមហាជនអបអរសាទរខួបអនុស្សាវរីយ៍ លើកទី៤៤ ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា (២ធ្នូ ១៩៧៨-២ធ្នូ ២០២២) នៅព្រឹកថ្ងៃទី២ ខែធ្នូ ឆ្នាំ២០២២ នៅសាលសន្នីសិទ្ធចតុមុខ រាជធានីភ្នំពេញ។
ឆ្លៀតក្នុងឱកាសនោះ លោកស្រីបណ្ឌិត ម៉ែន សំអន បានផ្ដាំផ្ញើសួរសុខទុក្ខ និងមនោសញ្ចេតនានឹករឭកយ៉ាងជ្រាលជ្រៅរបស់សម្ដេចតេជោនាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ជូនចំពោះសមេ្ដច អស់លោក លោកស្រី ដែលមានវត្តមានក្នុងអង្គពិធី។
លោកស្រីបណ្ឌិត ម៉ែន សំអន បានថ្លែងថា រណសិរ្សនេះបានបដិសន្ធិឡើង នៅក្នុងតំបន់រំដោះស្ថិតក្នុងភូមិជើងភ្លូ ឃុំ២ធ្នូ ស្រុកស្នួល ខេត្តក្រចេះ និងមានឈ្មោះដំបូងថា «រណសិរ្សសាមគ្គីសង្គ្រោះជាតិកម្ពុជា» ដឹកនាំដោយឥស្សរជន ជាន់ខ្ពស់ជាច្រើនរូបរួមមាន៖ សម្តេចអគ្គមហាពញាចក្រី ហេង សំរិន, សម្ដេចអគ្គមហាធម្មពោធិ៍សាល ជា ស៊ីម, សម្តេចតេជោ ហ៊ុន សែន និងឥស្សរជនគណបក្សប្រជាជនកម្ពុជា ជាច្រើនទៀត ដើម្បីតស៊ូវាយរំដោះទឹកដី និងរំដោះជីវិតប្រជាជនកម្ពុជា ពីរបបប្រល័យពូជសាសន៍ ប៉ុល ពត ហើយទទួលបានជ័យជំនះទាំងស្រុងនៅថ្ងៃ៧ មករា ឆ្នាំ១៩៧៩។
លោកស្រីបណ្ឌិត ម៉ែន សំអន បានគូសបញ្ជាក់ថា៖ «ដោយសារគុណូបការៈនេះហើយ បានធ្វើឱ្យស្មារតី ២ ធ្នូ ក្លាយទៅជាថ្ងៃដែលនៅស្ថិតស្ថេរជាអមតៈ ក្នុងដួងចិត្តប្រជាជនកម្ពុជា ជាពិសេស ដួងចិត្តយុវជនជំនាន់ក្រោយគ្រប់ៗរូប ដែលជំរុញឱ្យយើងទាំងអស់គ្នាតែងតែប្រារព្ធទិវារំលឹកខួបនេះជារៀងរាល់ឆ្នាំ និងបានចាត់ទុក ថ្ងៃ២ធ្នូ ជាថ្ងៃចាប់ផ្ដើមដ៏អស្ចារ្យ ក្នុងការផ្ដួលរំលំរបប ប៉ុល ពត។ បច្ចុប្បន្ននេះ រណសិរ្សសាមគ្គីសង្គ្រោះជាតិ ២ ធ្នូ ១៩៧៨ ត្រូវបានប្តូរឈ្មោះមកជា «រណសិរ្សសាមគ្គីអភិវឌ្ឍន៍មាតុភូមិកម្ពុជា» វិញដែលជាអង្គការចាត់តាំងមួយ ឈានមុខរបស់គណបក្សប្រជាជនកម្ពុជា»។
លោកស្រីបណ្ឌិត ម៉ែន សំអន បានបញ្ជក់ថា ទាក់ទិននឹងប្រវត្តិសាស្រ្ត នៅថ្ងៃទី២០ ខែមិថុនា ឆ្នាំ១៩៧៧ គឺជាថ្ងៃដែល សម្តេចតេជោ បានយកជីវិតទៅប្តូរ តាមរយៈនៃការចេញដំណើរទៅកាន់ប្រទេសវៀតណាម ក្នុងគោលបំណង សុំជួបជាមួយថ្នាក់ដឹកនាំ សុំការគាំទ្រពីកងទ័ពស្ម័គ្រចិត្តវៀតណាម និងសហការជាមួយកងទ័ពកម្ពុជា ដើម្បីផ្តួលរំលំរបប ប៉ុល ពត រហូតឈានទៅបង្កើត រណសិរ្សសាមគ្គីសង្គ្រោះជាតិកម្ពុជា នាថ្ងៃ ២ ធ្នូ ១៩៧៨ ដែលជាមរតកនៃការឆ្ពោះទៅរំដោះប្រជាជនកម្ពុជា នាថ្ងៃជ័យជម្នះ ៧ មករា ១៩៧៩៕
