(អេហ្ស៊ីប)៖ បន្ទាប់ពីរកឃើញប្រអប់ខ្មៅ ដែលផ្ទុកប្រដាប់ថតសំឡេង «Voice Recorder» នៅថ្ងៃព្រហស្បតិ៍ម្សិលមិញ​ នៅថ្ងៃនេះ ប្រអប់ខ្មៅទី២ Data Recorder របស់យន្តហោះ EgyptAir ត្រូវបានក្រុមស្វែងរក និងស្រាវជ្រាវ រកឃើញ និងស្រង់​ចេញពី​​បាត់សមុទ្រមេឌីទែរ៉ាណេហើយ នេះបើយោងតាមការចេញផ្សាយរបស់សារព័ត៌មាន AP នៅមុននេះបន្តិច។

ក្រុមអ្នកស៊ើបអង្កេតអេហ្ស៊ីប បានបញ្ជាក់ឲ្យដឹងថា ប្រអប់ខ្មៅទី២ ដែលផ្ទុកទិន្នន័យទាំងមូលបាន ត្រូវបានរកឃើញ និង​ស្រង់ចេញពីបាតសមុទ្រមេឌីទែរ៉ាណេហើយ នៅល្ងាចថ្ងៃនេះ ហើយវាក៏ជាសំណាងណាស់ដែរ ព្រោះវាមិនទាន់​ផុត​កាល​​កំណត់រយៈពេល ៣០ថ្ងៃ។

គួរបញ្ជាក់ផងដែរថា យន្តហោះ​ដឹក​អ្នក​ដំណើរ ជើងហោះ Flight 804 របស់ក្រុមហ៊ុនអាកាសចរណ៍ EgyptAir បានបាត់ពីប្រព័ន្ធរ៉ាដា ខណៈកំពុងហោះហើរពី​ទីក្រុងប៉ារីស ប្រទេសបារាំង ទៅកាន់ទីក្រុងគែរ ប្រទេសអេហ្ស៊ីប ជាមួយនឹង​មនុស្ស ៦៦នាក់ ក្នុងនោះមានសហនាវិក ១០នាក់ និងបានធ្លាក់នៅសមុទ្រមេឌីទែរ៉ាណេ៕