​(កំពត)៖ ប្រជាពលរដ្ឋប្រមាណ៣២គ្រួសារ​ មកពីភូមិរលួស​ និងភូមិកែបថ្មី​ នៃឃុំបឹងទូក​ ស្រុកទឹកឈូ​ ខេត្តកំពត​ នៅព្រឹក​ថ្ងៃទី១៧​ ខែមិថុនា​ ឆ្នាំ២០១៦​ បាននាំគ្នាមកតវ៉ានៅមុខសាលាខេត្តកំពត​ ពាក់ព័ន្ធបញ្ហាដីធ្លី​ ដែលស្ថាប័នពាក់ព័ន្ធមិនបានចេញប័ណ្ណកម្មសិទ្ធ​ និងមិនបន្តការវាស់វែងឲ្យពួកគាត់​។​

ប្រជាពលរដ្ឋ​ ដែលឡើងនៅចំពោះមុខប្រធានមន្ទីរបរិស្ថានខេត្ត​ លោក ស៊ុយ​ ធា​ និងលោក វិត​ វឌ្ឍនា​ នាយកទីចាត់ការអន្តរវិស័យសាលាខេត្តកំពត​ ដោយសុំស្នើទៅលោក ចាន់ ចេស្តា អភិបាលខេត្តកំពត​ ជួយអន្តរាគមន៍​ធ្វើយ៉ាងណាជួយចេញប័ណ្ណកម្មសិទ្ធដីធ្លី ដល់ពួកគាត់​ ដែលវាស់វែងរួចរាល់ហើយ​ តាំងពី​សារាចរលេខ០១ របស់រាជរដ្ឋាភិបាលកម្ពុជា​មកមម្ល៉េះ និងសុំឱ្យវាស់វែងបន្តដី ដែលនៅសេសសល់មិនទាន់បានវាស់ ដែលស្ថិតក្នុងឃុំបឹងទូក​ និងឃុំកោះតូច​ ស្រុកទឹកឈូ​ ខេត្តកំពត។

ក្នុងនោះដែរ លោក ស៊ុយ​ ធា​ ប្រធានមន្ទីរបរិស្ថានខេត្ត​ បានបញ្ជាក់ប្រាប់ប្រជាពលរដ្ឋវិញថា​ រឿងពាក់ព័ន្ធដីធ្លីរបស់ពលរដ្ឋខាងលើ​ ខាងអាជ្ញាធរខេត្ត​ បានដាក់សំណើរជូនទៅសម្តេចតេជោ​ ហ៊ុន​ សែន​ នាយករដ្ឋមន្ដ្រីនៃកម្ពុជា ដើម្បីសម្រេចជូនប្រជាពលរដ្ឋរួចរាល់អស់ហើយ​ ហើយលោកសង្ឃឹមថា​ សម្តេចតេជោ ពិតជាសម្រេចជូនប្រជាពលរដ្ឋ​ ដែលមិនទាន់បានកម្មសិទ្ធ​ និងវាស់វែងដីដែលនៅសេសសល់បន្តទៀត​៕