(កូសូវ៉ូ)៖ Hacker វ័យក្មេងមួយរូបត្រូវបាន​តុលាការចេញសេចក្ដីប្រកាសសម្រេចដាក់ពន្ធធនាគារ​ចំនួន ២៥ឆ្នាំ ពីបទ​លួចឯកសារ និងទិន្នន័យផ្ទាល់ខ្លួនរបស់ទាហានអាមេរិក ព្រមទាំងបានបញ្ជួនទៅឲ្យ​ក្រុមឧទ្ទាម ISIS។ នេះ​បើយោងតាម​ការចេញផ្សាយរបស់សារព័ត៌មាន The Next Web ចេញផ្សាយនៅរសៀលថ្ងៃទី១៦ ខែមិថុនា។

Hacker ឈ្មោះ Ardit Ferizi វ័យ ២០ឆ្នាំ ប្រើឈ្មោះក្លែងក្លាយ Th3Dir3ctorY បានធ្វើការ Hack ចូល​ប្រព័ន្ធគ្រប់គ្រង់ទិន្នន័យរបស់​យោធាអាមេរិក ដោយបានប្រមូលនូវទិន្នន័យផ្ទាល់ខ្លួនរបស់ទាហាន​ចំនួន ១,៣០០នាក់ និងបានផ្ញើទៅឲ្យក្រុមឧទ្ទាម ISIS តាមរយៈ Hacker មួយរូបទៀតឈ្មោះ Junaid Hussain ដែលត្រូវបានគេស្គាល់​ថា ជាសមាជិកសកម្មប្រយុទ្ធរបស់ក្រុមឧទ្ទាម ISIS។

លោក Ferizi បាន Hack ចូល និងលួចទិន្នន័យខាងលើតាំងពីចុងឆ្នាំ ២០១៥ ហើយត្រូវបាន​អាជ្ញាធរម៉ាឡេស៊ី សហ​ការជាមួយសហរដ្ឋអាមេរិក ចាប់ខ្លួនបាន ព្រមទាំងបញ្ជូនទៅកាន់​ប្រទេសកូសូវ៉ូ ដើម្បីកាត់ទោស ប៉ុន្តែមុនពេល​បញ្ជូនទៅ ត្រូវបានតុលាការអាមេរិក សួរចម្លើយពាក់ព័ន្ធនឹងករណី Hack ខាងលើ ដោយរូបគេបាន​សារភាពរាល់ទង្វើដែលគេបាន​ធ្វើ ទើបតុលាការកូសូវ៉ូ សម្រេចដាក់ទោស ២៥ឆ្នាំ ព្រោះ Hacker វ័យក្មេងម្នាក់នេះ បានប្រព្រឹត្តបទល្មើសចំនួន២ គឺទី១ លួចទិន្នន័យតាមប្រព័ន្ធអនឡាញ និងទី២ ចូលរួមជាក្រុម ISIS ក្នុងការបំផ្លាញ់ពិភពលោក៕