(ភ្នំពេញ)៖ អង្គការមូលនិធិថែទាំសុខភាពអ្នកជំងឺអេដស៍ (AHF) រួមជាមួយរដ្ឋាភិបាល និងអង្គការសង្គមស៊ីវិល នឹងរៀបចំពិធីអបអរសាទរទិវាពិភពលោកប្រយុទ្ធនឹងជំងឺ អេដស៍ឆ្នាំ២០២២ នាថ្ងៃទី២៦ ខែវិច្ឆិកា ឆ្នាំ២០២២ខាងមុខនេះ នៅលើទឹកដីខេត្តស្វាយរៀង ជាមួយនឹងការបង្ហាញប្រធានបទថ្មីទាន់ពេលវេលាមួយគឺ «មិនទាន់បញ្ចប់ទេ» ដើម្បីរំលឹកដល់មេដឹកនាំពិភពលោក ស្ថាប័នសុខភាព សាធារណៈពិភពលោក និងសង្គមស៊ីវិលថា ការងារជាច្រើននៅតែមានប្រសិនបើយើងធ្វើមួយថ្ងៃបញ្ចប់ នឹងមិនអាចបញ្ឈប់ការរីករាលដាលនៃជំងឺអេដស៍បាននោះទេ។
ទិវាពិភពលោកប្រយុទ្ធនឹងជំងឺអេដស៍ឆ្នាំ២០២២នេះ នឹងរៀបចំនៅក្នុងវិទ្យាល័យស្វាយរៀង ក្នុងខេត្តស្វាយរៀង ជាមួយក្តីរំពឹងថានឹងមានអ្នកចូលរួមប្រមាណ ៧០០នាក់ ជាមួយនឹងការរៀបចំការប្រគុំតន្ត្រីប្រកបដោយភាពសប្បាយរីករាយ។ ក្រៅពីនេះអង្គការមូលនិធិថែទាំសុខភាពអ្នកជំងឺអេដស៍ ក៏មានការរៀបចំប្រារព្ធពិធីនេះតាមប្រព័ន្ធអនឡានចាប់ពីថ្ងៃទី២៦ ខែវិច្ឆិកា រហូតដល់ថ្ងៃទី០១ ខែធ្នូ ឆ្នាំ២០២២ផងដែរ ដើម្បីជាសារមួយអំពាវនាវឱ្យមានការទៅធ្វើតេស្តឈាមរកមេរោគអេដស៍ជាមួយនឹងការទទួលបានស្រោមអនាម័យ ដោយឥតគិតថ្លៃផងដែរ។
សូមជម្រាបថា យោងតាមស្ថិតិចុងក្រោយរបស់ UNAIDS មនុស្សជាង ៣៨លាននាក់ កំពុងរស់នៅជាមួយមេរោគអេដស៍/ជំងឺអេដស៍នៅទូទាំងពិភពលោក ហើយមនុស្សជាង ៤០លាននាក់ បានស្លាប់ដោយសារជំងឺដែលទាក់ទងនឹងជំងឺអេដស៍ ចាប់តាំងពីការចាប់ផ្តើមនៃការរីករាលដាលនៃមេរោគអេដស៍។ ខណៈពេលដែលមនុស្សរាប់លាននាក់សព្វថ្ងៃនេះ កំពុងទទួលបានការព្យាបាលដោយថ្នាំប្រឆាំងមេរោគអេដស៍។
លោកស្រី Terri Ford ប្រធាន AHF នៃផ្នែកតស៊ូមតិ និងគោលនយោបាយសកល បានបញ្ជាក់ឱ្យដឹងដែរ យើងកំពុងអំពាវនាវឱ្យភាគីពាក់ព័ន្ធ និងអ្នកតស៊ូមតិក្នុងប្រទេសទាំងអស់បង្កើនកិច្ចខិតខំប្រឹងប្រែងការពារ ការធ្វើតេស្ត និងការព្យាបាលមេរោគអេដស៍នៅទូទាំងពិភពលោក ដើម្បីពន្យាអត្រាឆ្លងមេរោគអេដស៍ថ្មីដែលកំពុងកើនឡើងយ៉ាងឆាប់រហ័ស និងការពារផលប្រយោជន៍ដ៏មានតម្លៃដែលយើងបានធ្វើ យើងបានមកឆ្ងាយពេកហើយក្នុងការប្រយុទ្ធប្រឆាំងនឹងមេរោគអេដស៍ និងជំងឺអេដស៍។
លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ីនៃអង្គការមូលនិធិថែទាំសុខភាពអ្នកជំងឺអេដស៍ (AHF) បានឱ្យដឹងដែរថា ក្នុងឱកាសនៃទិវាពិភពលោកប្រយុទ្ធនឹងជំងឺអេដស៍នេះ អង្គការ AHF ធ្វើឡើងនេះដើម្បីប្រាប់ពិភពលោកថា «យើងអាចធ្វើបាន!» ហើយយើងកំពុងប្រើប្រាស់ប្រធានបទ «មិនទាន់បញ្ចប់ទេ» របស់យើង ដើម្បីជំរុញក្រុមអ្នកតស៊ូមតិ និងអ្នកពាក់ព័ន្ធនៅទូទាំងអាស៊ី ឱ្យយកចិត្តទុកដាក់លើមេរោគអេដស៍/ជំងឺអេដស៍។ លោកបានអះអាងថានៅក្នុងតំបន់មួយចំនួននៃទ្វីបអាស៊ី ជាពិសេសក្នុងតំបន់មានចំនួនប្រជាជនរស់នៅច្រើន ការឆ្លងមេរោគអេដស៍ថ្មីៗកំពុងកើនឡើង ដែលពួកគេធ្លាប់បានមើលឃើញកាធ្លាក់ចុះ កាលពីមួយទសវត្សរ៍កន្លងមក។
សូមបញ្ជាក់ថា អង្គការមូលនិធិថែទាំសុខភាពអ្នកជំងឺអេដស៍ (AHF) ជាអង្គការប្រយុទ្ធនឹងជំងឺអេដស៍ធំជាងគេបំផុតនៅលើពិភពលោក ដោយបច្ចុប្បន្នអង្គការកំពុងផ្តល់ការព្យាបាល ថែទាំ និងសេវាកម្មដល់មនុស្សជាង ១.៤៧លាននាក់ នៅក្នុង៤៥ប្រទេសទូទាំងពិភពលោក ដូចជានៅសហរដ្ឋអាមេរិក អាហ្វ្រិក អាមេរិកឡាទីន ការាបៀន តំបន់អាស៊ីប៉ាស៊ីហ្វិក និងអឺរ៉ុបខាងកើតជាដើម។ សម្រាប់ព័ត៌មានលម្អិតអំពី សូមចូលទៅកាន់គេហទំព័ររបស់យើង: ទំព័រហ្វេសប៊ុក: www.facebook.com/aidshealth និង Twitter: @aidshealthcare ឬ Instagram: @aidshealthcare ។ AHF www.aidshealth.org (http://www.aidshealth.org/) ៕
