(ភ្នំពេញ)៖ នាព្រឹកថ្ងៃអង្គារ ទី១៥ ខែវិច្ឆិកា​ ឆ្នាំ​២០២២ លោក សុខ សម្បត្តិ អភិបាលខណ្ឌបឹងកេងកង បានអញ្ជើញផ្តល់អំណោយដល់គ្រួសារសព​ឈ្មោះ​ កែវ​ ណារិន​ អាយុ៧០ឆ្នាំ​ ដែលបាន​ទទួលមរណភាព​ ដោយគ្រោះអគ្គិភ័យ​ នៅផ្ទះលេខ​៧៦ ច្រកផ្លូវលេខ៣៣០ ភូមិ៣ សង្កាត់​បឹងកេងកង​ទី៣ ខណ្ឌបឹងកេងកង។

លោក សុខ សម្បត្តិ បានចូលរួមសម្តែងនូវការសោកស្តាយជាមួយគ្រួសារសព​ឈ្មោះ​ កែវ​ ណារិន​ អាយុ​៧០ឆ្នាំ​ ដែលបាន​ទទួលមរណភាព​ ដោយគ្រោះអគ្គីភ័យ និងបាននាំយកការផ្តាំសួរសុខទុក្ខពីសំណាក់លោក ឃួង ស្រេង អភិបាលរាជធានីភ្នំពេញ ដែលតែងតែជួយឈឺឆ្អាល និងជួយសំរាលទុក្ខលំបាកប្រជាពលរដ្ឋដែលកំពុងរងគ្រោះថ្នាក់ផ្សេងៗ។

លោក សុខ សម្បត្តិ ក៏បានអំពាវនាវឲ្យប្រជាពលរដ្ឋត្រូវប្រុងប្រយ័ត្នខ្ពស់ និងពិនិត្យមើលនៅឧបករណ៍ភ្លើងដែលងាយឆាបឆេះ និងត្រូវបិតបារ៉ែតភ្លើង ការពារកុំឲ្យមានអគ្គិភ័យឆាបឆេះ វាអាចបំផ្លាញទ្រព្យសម្បត្តិផ្ទាល់ខ្លួន និងខាតបង់ពេលវេលា ដូចពាក្យស្លោកមួយឃ្លាថា «ស៊ូលិចទូកកណ្តាលទន្លេ កុំឲ្យភ្លើងឆេះផ្ទះ»។

អំណោយដែលអភិបាលខណ្ឌបឹងកេងកង ឧបត្ថម្ភជូនដើម្បីចូលរួមបុណ្យសពលោកតា កែវ ណារិន នាពេលនេះ រួមមាន៖ អង្ករ​៥០គីឡូក្រាម​, ទឹកសុទ្ធ៣កេស​, ភេសជ្ជៈ​៣កេស​ និងថវិកា ចំនួន ​១.០០០.០០០រៀល។

នាឱកាសនោះ ក្រុមគ្រួសារសព​ បានគោរពថ្លែងអំណរគុណ​យ៉ាងជ្រាលជ្រៅបំផុត​ និងសូមគោរពជូនពរ​ លោកអភិបាល​ខណ្ឌ សុខភាពល្អ និងជួបនូវពុទ្ធពរទាំង ៤ប្រការ​ គឺ​ អាយុ​ វណ្ណៈ​ សុខៈ​ ពលៈ​ កុំប្បីឃ្លៀងឃ្លាតឡេីយ​៕