(កំពង់ធំ)៖ លោក អោក ស៊ីម ជាអតីតយុទ្ធជនពិការនៅខេត្តកំពង់ធំ ធ្លាប់ចូលបម្រើកងទ័ពនៅឆ្នាំ១៩៧៩ ទើបតែទទួលបានផ្ទះថ្មីមួយខ្នងដែលជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ស្ថិតនៅភូមិព្រៃបន្លិច សង្កាត់អាចារ្យលាក់ ក្រុងស្ទឹងសែន។
ការប្រគល់ផ្ទះនេះធ្វើឡើងនាថ្ងៃទី១៣ ខែវិច្ឆិកា ឆ្នាំ២០២២ តាមរយៈលោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជាខេត្តកំពង់ធំ។
លោក អោក ស៊ីម បានបញ្ជាក់ថា លោកមានអាយុ៦៣ឆ្នាំបានចូលបម្រើកងទ័ពនៅឆ្នាំ១៩៧៩ មានមុខងារជាប្រធានកងអនុសេនាធំទី១នៅអង្គភាពកងពលធំលេខ៥ ខេត្តព្រះវិហារ ហើយបានត្រូវរបួសពិការជើងខាងឆ្វេងនៅឆ្នាំ១៩៨៧ ក្នុងពេលប្រយុទ្ធជាមួយនឹងខ្មាំងនៅសមរភូមិអូរពោធិ៍ ខេត្តព្រះវិហារ។ លោកមានភរិយានិងកូននៅក្នុងបន្ទុកចំនួន៥នាក់ ដោយប្រកបមុខរបរប៉ះកង់/ម៉ូតូ ដើម្បីជួយសម្រួលដល់ជីវភាពប្រចាំថ្ងៃ គួបផ្សំនឹងប្រាក់បៀវត្សដែលរាជ្ឋាភិបាលបានផ្តល់ជូនប្រចាំខែ។
ឧត្ដមសេនីយ៍ទោ សោម ស៊ុន បានបញ្ជាក់ថា ដោយមើលឃើញពីជីវភាពរស់នៅរបស់គាត់ មានការលំបាកខ្វះខាតពុំមានលទ្ធភាពសាងសង់ផ្ទះឱ្យបានសមរម្យដោយខ្លួនឯងបាន ទើបគណៈកម្មាធិការសមាគមអតីតយុទ្ធជនកម្ពុជាខេត្តកកំពង់ធំសុំការសម្រេចសាងសងផ្ទះអំណោយរបស់សម្តេចតេជោជាខ្នងផ្ទះទី២២៤ ដោយបានសាងសង់ខ្ពស់ផុតពីដីសសរបេតុង ឆ្អឹងដែក រនាបក្តារ ជញ្ជាំងស្មាតបត ដំបូលប្រក់ស័ង្កសីកិនភ្លី និងជណ្ដើរកាច់។
ក្នុងពិធីប្រគល់ផ្ទះថ្មីនៅពេលនេះ ឧត្តមសេនីយ៍ទោ សោម ស៊ុន បាននាំយកនូវអំណោយរបស់ឧត្តមសេនីយ៍ឯក ហ៊ុន ម៉ាណែត និងលោកស្រី ពេជ ចន្ទមុន្នី ផ្ដល់ជូនគាត់បន្ថែមទៀតមានអង្ករចំនួន៥០គីឡូក្រាម មីចំនួន២កេស ទឹកពិសារបរិសុទ្ធចំនួន១កេស ទឹកត្រី ទឹកស៊ីអ៉ីវចំនួន២យួរ និងសម្ភារៈសម្រាប់ប្រើប្រាស់ក្នុងផ្ទះបាយមួយចំនួន ព្រមទាំងថវិកាមួយចំនួនផងដែរ។
លោក អោក ស៊ីម អតីតយុទ្ធជនពិការនិងក្រុមគ្រួសារបានសូមគោរពថ្លែងអំណរគុណដ៏ជ្រាលជ្រៅជាទីបំផុតនិងសូមគោរពជូនពរចំពោះសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ព្រមទាំងលោក ហ៊ុន ម៉ាណែត និងលោកស្រី រួមទាំងគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំផងដែរ៕
