(កំពង់ស្ពឺ)៖ ដោយអារម្មណ៍ក្តុកក្តួល និងក្តីអាណិតអាសូរយ៉ាងពន់ពេកនោះ នៅថ្ងៃទី១១ ខែវិច្ឆិកា ឆ្នាំ២០២២នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា រួមជាមួយសាខាកាកបាទក្រហមកម្ពុជា ខេត្តកំពង់ស្ពឺ ចុះសួរសុខទុក្ខ និងនាំយកអំណោយមនុស្សធម៌ ជាគ្រឿងឧបភោគបរិភោគ ភេសជ្ជៈ និងថវិកាមួយចំនួន ជូនដល់លោកយាយ ស៊ុម នឹម អាយុ ៨៦ឆ្នាំ មានជំងឺប្រចាំកាយ និងលោកតា ពេជ្រ ធន់ អាយុ ៨៤ឆ្នាំ ពិការភ្នែកដើរពុំរួច ដែលត្រូវជាប្តីប្រពន្ធនឹងគ្នារស់នៅជាមួយគ្នាយ៉ាងលំបាក។
ចំណែកកូនស្រីរបស់លោកតា លោកយាយ ជាស្ត្រីមេម៉ាយកូន ៥នាក់ មិនទាន់ស្វែងរកការងារធ្វើបាននៅឡើយបន្ទាប់ពីវិបត្តិកូវីដ-១៩។ បច្ចុប្បន្នគ្រួសារខាងលើនេះ រស់នៅភូមិអន្លង់គង់ ឃុំត្រពាំងគង ស្រុកសំរោងទង ខេត្តកំពង់ស្ពឺ។
ក្នុងឱកាសនោះ លោកស្រីអគ្គលេខាធិការរងទី១ កាកបាទក្រហមកម្ពុជា បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងការគិតគូរពីជីវភាពរស់នៅរបស់លោកយាយលោកតា។
លោកស្រីបានជម្រាបជូនលោកយាយលោកតាផងដែរថា «សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែតាមដានជាប់ជានិច្ចពីសុខទុក្ខរបស់បងប្អូនប្រជាពលរដ្ឋ ហើយបន្ទាប់ពីបានឃើញព័ត៌មានអំពីករណីដ៏លំបាកមួយនេះ សម្តេចមានអារម្មណ៍ក្តុកក្តួល និងក្តីអាណិតអាសូរយ៉ាងក្រៃលែង ហើយបានចាត់ឱ្យក្រុមការងារចុះភ្លាមៗដើម្បីជួយសម្រាលការលំបាកក្នុងជីវភាព និងជាការលើកទឹកចិត្តដល់លោកយាយលោកតា»។
លោកស្រីក៏បានផ្តាំផ្ញើឱ្យស្ត្រីមេម៉ាយ ដែលត្រូវជាកូនស្រី ត្រូវបន្តមើលថែទាំលោកយាយលោកតា លើកទឹកចិត្តជំរុញពួកគាត់ទៅព្យាបាលជំងឺនៅមន្ទីរពេទ្យ ហើយត្រូវរស់នៅមានអនាម័យស្អាត ពិសាទឹកដាំឆ្អិន សម្អាតបរិស្ថានជុំវិញផ្ទះ ជាពិសេសត្រូវជំរុញកូនៗឱ្យបានទៅសិក្សារៀនសូត្រដើម្បីអនាគតរុងរឿង។
លោកយាយលោកតា និងកូនស្រី មានក្តីរំភើបរីករាយឥតឧបមា និងបានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់ គិតគូរ និងលើកទឹកចិត្តឱ្យមានក្តីសង្ឃឹមតទៅមុខទៀត រួមជាមួយអំណោយមនុស្សធម៌ជួយសម្រាលការលំបាកទៀតផង។
សូមបញ្ជាក់ថា អំណោយផ្តល់ជូនលោកយាយលោកតា រួមមាន៖ អង្ករ មី ត្រីខ ទឹកស៊ីវអ៊ីវ ទឹកដោះគោ ទឹកត្រចៀកកាំ ប្រេងខ្យល់ អាហារបំប៉ន មុង ភួយ សារុង ក្រមា និងថវិកាមួយចំនួន។ សាខាកាកបាទក្រហមកម្ពុជាខេត្តកំពង់ស្ពឺ ក៏បានឧបត្ថម្ភគ្រឿងឧបភោគបរិភោគ និងសម្ភារៈប្រើប្រាស់មួយចំនួនផងដែរ។ ដោយឡែក កាកបាទក្រហមកម្ពុជា ក៏បានឧបត្ថម្ភដល់ស្ត្រីមេម៉ាយ ដែលត្រូវជាកូនស្រីរបស់លោកយាយលោកតាខាងលើនេះ រួមមាន៖ អង្ករ មី ត្រីខ ទឹកស៊ីអ៉ីវ មុង ភួយ សារុង ក្រមា និងថវិកាចំនួនផងដែរ។
ក្នុងឱកាសនោះ ចាស់ឥតទីពឹង និងអ្នកងាយរងគ្រោះបំផុតចំនួន ២៩គ្រួសារ ដែលរស់នៅក្នុងភូមិឃុំខាងលើ ក៏ទទួលបានអំណោយមនុស្សធម៌ពីកាកបាទក្រហមកម្ពុជាផងដែរ ដោយគ្រួសារនីមួយៗទទួលបានអង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកស៊ីអ៊ីវ ១យួរ, ជែលលាងដៃ ១ដប, ឃីត (មុង ភួយ សារុង ក្រមា) ១កញ្ចប់ និងថវិកាមួយចំនួន៕
