(បន្ទាយមានជ័យ)៖ នៅល្ងាចថ្ងៃទី៥ ខែវិច្ឆិកា ឆ្នាំ២០២២ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ អមដោយក្រុមការងារអញ្ជេីញជាអធិបតីក្នុងពិធីបិទការប្រណាំងទូកងនៅខេត្តបន្ទាយមានជ័យ ដែលអ្នកចូលរួមទស្សនាជាច្រេីនម៉ឺននាក់។
ឧបនាយករដ្ឋមន្ត្រី កែ គឹមយ៉ាន បានពាំនាំនូវការសួរសុខទុក្ខ ការកោតសរសើរ ពីថ្នាក់ដឹកនាំជាតិនិងវាយតម្លៃខ្ពស់ចំពោះអាជ្ញាធរដែនដី សមត្ថកិច្ចគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ ប្រជាពលរដ្ឋទាំងអស់ដែលបានរួមចំណែកយ៉ាងធំធេង ថែរក្សាសន្តិភាព សណ្តាប់ធ្នាប់ធ្នាប់ ប្រយុទ្ធប្រឆាំងគ្រឿងញៀន ប្រឆាំងជំងឺកូវីដ១៩ បន្តការអភិវឌ្ឍសង្គម-សេដ្ឋកិច្ច និងជីវភាពរស់នៅកាន់តែប្រសេីរបង្កេីតបានពិធីប្រណាំងទូកបង្ហាញបានពីស្មារតីសាមគ្គីភាពក្នុងមហាគ្រួសារអ្នកបន្ទាយមានជ័យ។
ក្នុងនាមរាជរដ្ឋាភិបាលកម្ពុជា ប្រធានក្រុមការងារ នាឱកាសនោះដែរ ឧបនាយករដ្ឋមន្រ្តី កែ គឹមយ៉ាន បានថ្លែងបន្តដោយកោតសរសើរ និងអរគុណចំពោះកិច្ចខិតខំប្រឹងប្រែង ប្រកបដោយស្មារតីទទួលខុសត្រូវរបស់គណៈអភិបាលខេត្ត ក្រុមប្រឹក្សាខេត្ត គណៈកម្មាធិការខេត្តរៀបចំបុណ្យជាតិ-អន្តរជាតិ គណៈកម្មការទូក មន្ត្រីរាជការគ្រប់លំដាប់ថ្នាក់ វិស័យសាសនា វិស័យឯកជន យុវជន សិល្បករ សិល្បការនី ពិធីករ ពិធីការនី បណ្តាញសារព័ត៌មាន និងផ្សព្វផ្សាយ ក្រុមសម្អាតអនាម័យ ដែលបានសហការគ្នា ចូលរួមយ៉ាងសស្រាក់សស្រាំរៀបចំពិធីប្រណាំងទូកនេះឡើងក៏ដូចជាការរៀបចំឲ្យមានការតាំងពិព័រណ៌ពាណិជ្ជកម្ម សិល្បតន្ត្រី ដើម្បីជាការកំសាន្តសប្បាយ របស់ប្រជាពលរដ្ឋក្នុងខេត្តបន្ទាយមានជ័យ និងអ្នកទេសចរមកពីបណ្តាខេត្តនានា។
ជាមួយគ្នានេះ ឧបនាយករដ្ឋមន្រ្តី កែ គឹមយ៉ាន បានថ្លែងបន្តទៀតថា ពិធីប្រណាំងទូកនៅខេត្តបន្ទាយមានជ័យឆ្នាំ២០២២ប្រព្រឹត្តទៅក្រោមបរិយាកាសអធិកអធម សប្បាយរីករាយ ហើយការប្រកួតកីឡាតែងមានអ្នកចាញ់ និងអ្នកឈ្នះ ហេីយភាពឈ្នះចាញ់នៃការប្រណាំងទូកនាពេលនេះ គឺពោរពេញដោយមោទនភាពទាំងអស់គ្នាព្រោះបានចូលរួមថែរក្សាប្រពៃណីវប្បធម៌ដ៏ផូរផង់របស់ខ្មែរផង ផ្តល់នូវសុខភាព ការសប្បាយរីករាយអបអរសាទរព្រះរាជពិធីបុណ្យអុំទូក បណ្តែតប្រទីប និង អកអំបុក សំពះព្រះខែ ផង និងសូមបំផុសស្មារតីកូនចៅយេីងឱ្យស្រឡាញ់កីឡាឆ្លៀតពេលទំនេរពីការសិក្សាបន្តលេងកីឡាទាំងអស់គ្នាដេីម្បីសុខភាព ចៀសចាកផុតពីអំពេីអបាយមានល្បែងស៊ីសង គ្រឿងញៀនជាដេីម។ល។
ជាមួយនឹងការសប្បាយពោរពេញដោយសាមគ្គីភាពនេះនាយឧត្តមសេនីយ៍ កែ គឹមយ៉ាន ផ្តល់នូវការឧបត្ថម្ភដល់ទូកជ័យលាភីទាំងអស់រួមមាន៖
ទី១៖ គណៈកម្មការនិងកីឡាទូកង ទាំង២៦សរុប ពាន២៦ ទង់២៦ ទឹកសុទ្ធ៥១៥យួរ ទឹកក្រូច១៨២កេស មី១៩៨កេស ភេសជ្ជ៣៦០ដប ថវិកាសរុបចំនួន៤៣លាន ៩៨០ពាន់រៀលគត់។
ទី២៖ ឧបត្ថម្ភថវិកា១ក្រុម/អង្គភាព១លានរៀល មានសាកលវិទ្យាល័យជាតិមានជ័យ កម្លាំងកងរាជអាវុធហត្ថខេត្ត អនុគណៈកម្មការពិធីការតុបតែង អនុគណៈកម្មការរៀបចំ (ពិធីសំពះព្រះខែ អកអំបុក ការប្រណាំងទូក អត្ថាធិប្បាយថតរូបភាព និងផ្សាយសម្លេង អំណោយពានរង្វាន់ជ័យលាភី ស្ដង់ពិពរណ៌
ភូមិ១ផលិតផល១ ប្រជាការពារ ក្រុមគ្រូពេទ្យក្រុមកាយរិទ្ធ។
ទី៣៖ ឧបត្ថម្ភកម្លាំងនគរបាលការពារចំនួន២លានរៀល
ទី៤៖ ឧបត្ថម្ភក្រុមការងារសម្អាតសំរាមក្នុងបរិវេណកន្លែងទស្សនាក្នុងពិធីបុណ្យអ៊ុំទូកថវិកា ២លានរៀលផងដែរ៕
