(ភ្នំពេញ)៖ ដោយមានការអនុញ្ញាត ពីនាយឧត្តមសេនីយអគ្គស្នងការ នគបាលជាតិ និងមានការចង្អុលបង្ហាញផ្ទាល់ ពី​ឧត្តម​សេនីយឯក ចាន់ វ៉ាន់ឌឿន ប្រធាននាយកដ្ឋាន​ ប្រឆាំងបទល្មើសសេដកិច្ច ព្រមទាំងមានការដឹកនាំ ពីព្រះរាជអាជ្ញារងសាលាដំបូងរាជធានីភ្នំពេញ លោក លី សុផាណា នៅថ្ងៃទី១៤ ខែមិថុនា ឆ្នាំ២០១៦ នេះ សមត្ថកិច្ចនៃនាយកដ្ឋាន​បទល្មើសសេដកិច្ច បានសហការជាមួយកម្លាំង សមត្ថកិច្ចកាំកុងត្រូល ការិយាល័យប្រឆាំងបទល្មើសរាជធានី មន្រ្តីប៉ុស្ដិ៍រដ្ឋបាលកាកាប បានចុះត្រួតពិនិត្យ និងឆែកឆេរ​ទីតាំង​សិប្បកម្មផលិត ប្រហិតត្រីមួយកន្លែង មានឈ្មោះថា «ប៉េះកុង» ដែលត្រូវបានសមត្ថកិច្ច​សង្ស័យថា បានផលិត​ប្រហិតត្រីខុសបច្ចេកទេសស្ដង់ដា រក្សាទុកប្រហិតគ្មានអនាម័យ ដោយអាច​មាន​ដាក់បញ្ចូល នូវសារធាតុគីមី​ នាំឲ្យប៉ះពាល់ដល់សុខភាព អ្នកទទួល​ទានយ៉ាងធ្ងន់ធ្ងរ។

ទីតាំងដែលសមត្ថកិច្ច នៃនាយកដ្ឋាន​បទល្មើស សេដកិច្ចចុះត្រួតពិនិត្យ នៅថ្ងៃនេះ មានឈ្មោះថា«​ប៉េះកុង» មានទីតាំងនៅផ្ទះគ្មានលេខ ស្ថិតក្នុងភូមិត្រពាំងល្វា សង្កាត់កាកាប ខណ្ឌពោធិសែនជ័យ ​មានម្ចាស់​ឈ្មោះ ឆលី អាន ភេទប្រុសអាយុ២៦ឆ្នាំ។

​ឧត្តមសេនីយត្រី អ៊ុ មុនី អនុប្រធាននាយកដ្ឋាន ប្រឆាំងបទល្មើសសេដ្ឋកិច្ច និងជាប្រធានក្រុមប្រតិបត្តិការ​ ប្រចាំរាជធានីភ្នំពេញ នៃក្រសួងមហាផ្ទៃ បានថ្លែងឲ្យដឹងថា កម្លាំងនគរបាល​ប្រឆាំង​​បទល្មើសសេដ្ឋកិច្ច​ ក្រសួងមហាផ្ទៃ បានចុះត្រួតពិនិត្យ ​នៅរោងសិប្បកម្មផលិត សាច់ប្រហិតមួយ ដែលបានដឹកជញ្ជូន និងរក្សាទុកសាច់ត្រីខុស​លក្ខណៈបច្ចេកទេស និងគ្មានអនាម័យត្រឹមត្រូវ ដោយបានដកហូតបានសាច់ប្រហិត ចំនួន៣៣បាវ ទម្ងន់ជិត២ពាន់គីឡូក្រាម និងគ្រឿងទេស​ជាច្រើន​ទៀត។

មន្រ្តីនគរបាល​ប្រឆាំង​​ បទល្មើសសេដ្ឋកិច្ចរូបនេះ បានបន្តឲ្យដឹងទៀតថា ​​ក្រោយការត្រួតពិនិត្យ កម្លាំងសមត្ថកិច្ច បានដកហូតប្រហិតត្រីដែលចម្អិនរួច ចំនួន៣៣បាវ គិតជាទម្ងន់១,៧៤៩គីឡូក្រាម និងគ្រឿងទេសមួយចំនួន រួមមាន ម្ស៉ៅមី និងម្ស៉ៅឆាចំនួន២០២បាវ, ខ្លឹមសចំនួន៧៣បាវ, ប៊ីចេងចំនួន៩បាវ, ម្ស៉ៅស្វិតចំនួន៥៨បាវ, ម្ស៉ៅរ៉តឌីចំនួន២៣បាវ, ម្រិចចំនួន៩បាវ និងម្ស៉ៅរស​ជាតិចំនួន៤កញ្ចប់ ​ចង់វេចខ្ចប់មានអក្សរ ថៃ និងវៀតណាម ហើយបច្ចុប្បន្នវត្ថុតាងទាំងអស់ ត្រូវបានសមត្ថកិច្ចរឹប​អូស យក​ទៅរក្សា​ទុក ដើម្បីបញ្ជូនធ្វើការត្រួតពិនិត្យ តាមបច្ចេកទេសបន្ថែមទៀត នៅនាយកដ្ឋានកាំកុងត្រូល។

លោកបន្តទៀតថា ករណីឆែកឆេរទីតាំងប្រហិតត្រី នគរបាលសេដ្ឋកិច្ចក្រសួងមហាផ្ទៃ ធ្វើការត្រួតពិនិត្យដោយមានការចូលរួមពីមន្រ្តីកាំកុងត្រូល ហើយមិនទាន់​សម្រេចយ៉ាងណា​នៅឡើយទេ ដោយត្រូវរង់ចាំលទ្ធផលពិសោធន៍ របស់កាំកុងត្រូលជាមុនសិន ហើយប្រសិន​បើមានការកឃើញថា បានធ្វើឡើងខុសបច្ចេកទេស មានលាយនូវសារធាតុគីមី​ ប៉ះពាល់ដល់សុខភាពអ្នកទទួលទានមែន សិប្បកម្មផលិតប្រហិតត្រីនេះ នឹងប្រឈមមុខ នឹងការបិទអាជីវកម្មផងដែរ៕