(ភ្នំពេញ)៖ យុវសិស្សឆ្នើមកម្រិតអន្តរជាតិនៃសាលាអន្តរជាតិ ស៊ី អាយ អេ ហ្វឺសត៍ ចំនួន៤រូប នឹងចូលរួមប្រកួតវគ្គផ្ដាច់ព្រ័ត្រពានរង្វាន់បញ្ញាវន្តពិភពលោក World Scholar’s Cup ប្រចាំឆ្នាំ២០២២ ក្នុងវគ្គផ្ដាច់ព្រ័ត្រ នៅសាកលវិទ្យាល័យយ៉េល (Yale University) សហរដ្ឋអាមេរិក ចាប់ពីថ្ងៃទី១១ ដល់ថ្ងៃទី១៦ ខែវិច្ឆិកា ឆ្នាំ២០២២ ខាងមុខនេះ។

បើតាមសេចក្តីប្រកាសព័ត៌មានដែលបណ្តាញព័ត៌មាន Fresh News ទទួលបាននៅថ្ងៃទី០៥ ខែវិច្ឆិកា ឆ្នាំ២០២២នេះ បានឱ្យដឹងថា
សិស្សឆ្នើមកម្រិតអន្តរជាតិនៃសាលាអន្តរជាតិ ស៊ី អាយ អេ ហ្វឺសត៍ ដែលនឹងត្រូវចូលរួមប្រកួតវគ្គផ្តាច់ព្រ័ត្រពានរង្វាន់បញ្ញាវន្តពិភពលោកនេះ រួមមាន៖ យុវសិស្ស ធន់ សុគន្ធក្លីនដឺ, យុវសិស្ស ជួរ គឹមលី, យុវសិស្ស ទីវ សុភ័ក្រ្តនីកា និងយុវសិស្ស ឡុង ស៊ីងហួ។

នេះគឺជាកិត្តិយសដ៏ខ្ពង់ខ្ពស់ និងជោគជ័យមួយបន្ថែមទៀត សម្រាប់សិស្សានុសិស្សផ្ទាល់ សាលារៀនមាតាបិតា អ្នកអាណាព្យាបាល និងសង្គមជាតិទាំងមូល ដែលសិស្សានុសិស្សកម្ពុជា ទទួលបានឱកាសក្នុងការចូលរួមក្នុងវគ្គផ្ដាច់ព្រ័ត្រនៃកម្មវិធីប្រកួតចំណេះដឹងកម្រិតពិភពលោក ដែលមានមានការចូលរួមពីបញ្ញវន្តវ័យក្មេងប្រមាណជាង ១៥,០០០នាក់ មកពីជាង ៦៥ប្រទេស និងដែលមានគោលបំណងជំរុញទឹកចិត្តសិស្សគ្រប់មជ្ឈដ្ឋាន ដើម្បីស្វែងរកសក្ដានុពលផ្ទាល់ខ្លួនរបស់ពួកគេ និងកសាងអ្នកដឹកនាំសម្រាប់ជោគវាសនារួមគ្នានៃសហគមន៍នាថ្ងៃអនាគត។

លទ្ធផលជាផ្លែផ្កាដ៏ត្រចះត្រចង់ដែលពួកគេទទួលបាននៅថ្ងៃនេះ គឺឆ្លុះបញ្ចាំងពីភាពជាដៃគូដែលមិនអាចខ្វះបានរវាងសាលា និងមាតាបិតា ឬអ្នកអាណាព្យាបាល ហើយគឺជារង្វាស់នៃគុណភាពការអប់រំនៅសាលាអន្តរជាតិ ស៊ី អាយ អេ ហ្វឺសត៍ ដូចមានចែងក្នុងទស្សនវិស័យរបស់សាលាតាំងពីដើមរៀងមក គឺផ្ដល់បរិយាកាសនៃការបង្រៀន លើកកម្ពស់ដល់ការអប់រំកម្រិតខ្ពស់ជាលក្ខណៈអន្តរជាតិទាំងកម្មវិធីសិក្សាជាតិ និងកម្មវិធីសិក្សាអន្តរជាតិ។

គួររម្លឹកថាយុវសិស្សឆ្នើមទាំង០៤រូបខាងលើ បានឆ្លងកាត់ការប្រកួតយ៉ាងស្វិតស្វាញក្នុងវគ្គជម្រុះតាមតំបន់ Regional Round នៅទីក្រុងភ្នំពេញ កាលពីថ្ងៃទី១៣ ដល់ថ្ងៃទី១៤ ខែសីហា ឆ្នាំ២០២២ និងក្នុងវគ្គ Global Round នៅទីក្រុងបាំងកក ប្រទេសថៃ កាលពីថ្ងៃទី២ ដល់ថ្ងៃទី៧ ខែកញ្ញា ឆ្នាំ២០២២ មុននឹងជាប់ជាជ័យលាភី និងត្រូវបានជ្រើសរើសឱ្យទៅចូលរួមប្រកួតក្នុងវគ្គផ្តាច់ព្រ័ត្រនៅសាកលវិទ្យាល័យយ៉េល (Yale University) សហរដ្ឋអាមេរិក នាពាក់កណ្តាលខែវិច្ឆិកាខាងមុខនេះ។

យុវសិស្សឆ្នើមរបស់យើងនឹងចេញដំណើរទៅសហរដ្ឋអាមេរិក នៅថ្ងៃទី០៦ និងថ្ងៃទី១០ ខែវិច្ឆិកា ឆ្នាំ២០២២ ហើយសាលាសូមជូនពរប្អូនៗទាំង០៤រូប ព្រមទាំងក្រុមគ្រួសារទទួលបានសេចក្តីសុខសុវត្ថិភាពក្នុងការធ្វើដំណើរ និងទទួលបានជ័យលាភីជើងឯកក្នុងការប្រកួត៕