(ភ្នំពេញ)៖ នៅល្ងាចថ្ងៃទី០៤ ខែវិច្ឆិកា ឆ្នាំ២០២២នេះ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោកស្រី អមដំណើរដោយលោក ស សុខា អនុប្រធាន ស.ស.យ.ក. និងលោកស្រី រួមទាំងថ្នាក់ដឹកនាំ ស.ស.យ.ក. បានអញ្ជើញចូលរួមក្នុងកម្មវិធី «សាទរស្នាព្រះហស្ថព្រះបិតាឯករាជ្យជាតិ» នៅសួនច្បារព្រះរាជបណ្ដាំ (ខាងមុខព្រះបរមរាជវាំង)។
កម្មវិធីនេះក៏មានការអញ្ជើញចូលរួមពី គណៈកម្មការរៀបចំព្រះរាជពិធីសមាជិក សមាជិកា ស.ស.យ.ក. និងមូលនិធិមុទិតាប្រមាណ ២០០នាក់ ផងដែរ។
នាបរិយាកាសដ៏វិសេសវិសាលនេះ គណអធិបតី និងអ្នកចូលរួមបានទស្សនាភាគយន្តរឿង « ឆាយាលើអង្គរ» ដែលប្រៀបប្រដូចទៅនឹងព្រះរាជឱង្ការរបស់ ព្រះករុណា ព្រះមហាវីរក្សត្រ ព្រះមរមរតនកោដ្ឋ មានអត្ថន័យសរបញ្ជាក់ឲ្យឃើញពីស្មារតីសេ្នហាជាតិ ហ៊ានធ្វើបូជនីយកិច្ចការពារប្រទេសជាតិ និងការសាមគ្គីរួបរួមជាធ្លុងមួយ ដើម្បីប្រឆាំងនឹងអំពើអបាយមុខ និងក្បត់ជាតិរបស់ក្រុមមួយចំនួនតូចដែលចង់បង្កឲ្យមានអស្ថេរភាព និងចលាចលក្នុងប្រទេស។
បន្ទាប់ពីទទួលបានឯករាជ្យដ៏ពេញលេញ ការការពារ និងថែរក្សាឯករាជ្យជាតិពិតសំខាន់បំផុត សម្រាប់ប្រជាជាតិ ហើយការរួបរួមសាមគ្គីនេះហើយ គឺជាគឹន្លះនៃការជួយស្រោចស្រង់ប្រទេសនៅសន្តិភាព និងភាពសុខសាន្ត។
កម្មវិធីដ៏មានអត្ថន័យនេះ បានប្រារព្ធឡើងដើម្បី បង្ហាញពីទឹកចិត្ត និងស្មារតីនៃការចងចាំចំពោះព្រះរាជបណ្តាំដ៏ថ្លៃថ្លា និងពោរពេញទៅដោយអត្ថន័យទូន្មាន ដែលជាព្រះរាជឱង្ការរបស់ ព្រះករុណា ព្រះមហាវីរក្សត្រ ព្រះបរមរតនកោដ្ឋ។
កម្មវិធីនាល្ងាចនេះ ក៏ចង់រលឹកពីព្រះរាជគុណូបការៈដ៏ខ្ពង់ខ្ពស់បំផុត តាមរយៈស្នាព្រះហស្ថដែលជាប្រវត្តិសាស្រ្តរបស់ ព្រះករុណា ព្រះមហាវីរក្សត្រ ព្រះមរមរតនកោដ្ឋ ក្នុងមួយព្រះជន្មរបស់ព្រះអង្គដែលបានគិតគូរពីឧត្តមប្រយោជន៍ជាតិលើសអ្វីទាំងអស់ ក្នុងនាមព្រះអង្គបានបំពេញព្រះរាជបូនីយកិច្ចទាមទារបានឯករាជ្យ និងបូរណភាពទឹកដីខ្មែរឲ្យបានគង់វង្ស៕
