(ព្រះសីហនុ)៖ នាវាស្វ័យការពារជើងទឹកជប៉ុន នឹងចូលចតនៅកំពង់ផែស្វយ័តក្រុងព្រះសីហនុ រយៈពេលពីរថ្ងៃ ចាប់ពីថ្ងៃទី១៨ ដល់ថ្ងៃទី២០ ខែវិច្ឆិកា ឆ្នាំ២០២២ខាងមុខ ដើម្បីបំពេញទស្សនកិច្ចរឹតចំណងមិត្តភាព។
ពាក់ព័ន្ធការចូលចតនេះ លោកវរសេនីយ៍ឯក អ៊ីស៊ីហារ៉ា ម៉ាសាណាអូ អនុព័ន្ធយោធាស្ថានទូតជប៉ុនប្រចាំកម្ពុជា នៅព្រឹកថ្ងៃទី០២ ខែវិច្ឆិកា ឆ្នាំ២០២២នេះ ត្រូវបានអនុញ្ញាតឲ្យចូលជួបពិភាក្សាការងារ ជាមួយលោក ឯម ភាព អភិបាលរងខេត្តព្រះសីហនុផងដែរ ដើម្បីពិភាក្សាលម្អិតអំពីដំណើរទស្សនកិច្ចនេះ។
ក្នុងជំនួបនោះ លោក ឯម ភាព បានស្វាគមន៍អនុព័ន្ធយោធាស្ថានទូតជប៉ុនប្រចាំកម្ពុជា ដើម្បីពិភាក្សាការងារស្តីពីការចូលចតរបស់នាវាស្វ័យការពារជើងទឹកជប៉ុន នៅកំពង់ផែស្វយ័តក្រុងព្រះសីហនុ នាពេលខាងមុខ រដ្ឋបាលខេត្តព្រះសីហនុ ចូលរួមសហការធ្វើការងារជាមួយកងនាវាស្វ័យការពារជប៉ុន។
កន្លងមកនាវាស្វ័យការពារជើងទឹកជប៉ុន បានចូលចតនៅកំពង់ផែស្វយ័តក្រុងព្រះសីហនុជាបន្តបន្ទាប់ ដើម្បីធ្វើទស្សនកិច្ចនៅកម្ពុជាជាច្រើនលើក រួចមកហើយ ដើម្បីស្វែងយល់ និងផ្លាស់ប្តូរបទពិសោធន៍ពីគ្នាទៅវិញទៅមករវាងកម្ពុជា ជប៉ុន ហើយប្រទេសទាំងពីរមានទំនាក់ទំនងកិច្ចសហប្រតិបត្តិការល្អ សម្រាប់ការចូលចតនាវាស្វ័យការពារជើងទឹកជប៉ុន បង្ហាញពីទំនាក់ទំនង នៃកិច្ចសហប្រតិបត្តិការរវាងរាជរដ្ឋាភិបាល និងប្រជាជននៃប្រទេសទាំងពីរកាន់តែជិតស្និតបន្ថែមទៀត។
លោកវរសេនីយិ៍ឯក អ៊ីស៊ីហារ៉ា ម៉ាសាណាអូ អនុព័ន្ធយោធាស្ថានទូតជប៉ុនប្រចាំកម្ពុជា បានថ្លែងអំណរគុណរដ្ឋបាលខេត្ត និងកងកម្លាំងដែលអនុញ្ញាតឲ្យរូបលោកបានចូលជួបពិភាក្សាដើម្បីរៀបចំសកម្មភាពផែនការ នៃការចូលចតរបស់នាវាស្វ័យការពារជើងទឹកជប៉ុនចូលចតនៅកំពង់ផែស្វយ័តក្រុងព្រះសីហនុ។
លោកក៏បានបង្ហាញនូវចំណាប់អារម្មណ៍ ពីការអភិវឌ្ឍរីកចម្រើនរបស់ខេត្តព្រះសីហនុ នាពេលបច្ចុប្បន្នហើយនេះក៏ជាលើកទីមួយ ដែលរូបលោកបានមកធ្វើទស្សនកិច្ចខេត្តព្រះសីហនុ លោកគិតថា កំពង់ផែស្វយ័តក្រុងព្រះសីហនុធំទូលាយអាចឲ្យនាវាស្វ័យការពារជើងទឹកជប៉ុន ចូលចតប្រកបដោយសុវត្ថិភាព និងជាការផ្លាស់ប្តូរវិស័យការពារជាតិ នៃប្រទេសទាំងពីរជាទស្សនវិស័យល្អមួយ។ លោកមានសេចក្តីរីករាយដែលរដ្ឋបាលខេត្តអនុញ្ញាតឲ្យនាវាស្វ័យការពារជើងទឹកជប៉ុនចូលចត នៅថ្ងៃទី១៨ ខែវិច្ឆិកា ឆ្នាំ២០២២ ប្រកបដោយសុវត្ថិភាព៕
