(ភ្នំពេញ)៖ ទូក «អធិរាជឥន្ទ្រីសែនជ័យបារមីដូនពេញ» របស់កងរាជអាវុធហត្ថរាជធានីភ្នំពេញ ក្រោមការឧបត្ថម្ភគាំទ្រពេញទំហឹងពីលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ ព្រមទាំងមេបញ្ជាការរង នាយទាហាន នាយទាហានរង និងពលទាហាន នៃកងរាជអាវុធហត្ថទូទាំង រាជធានីភ្នំពេញ នៅតែការពារបាននូវជយលាភីចំណាត់ថ្នាក់លេខ១ របស់ខ្លួនដដែល ក្នុងការប្រកួតនៅខេត្តស្វាយរៀង។
ទូក «អធិរាជឥន្ទ្រីសែនជ័យបារមីដូនពេញ» ធ្លាប់បានជ័យលាភីចំណាត់ថ្នាក់លេខ១ កាលពីឆ្នាំ២០១៧, ឆ្នាំ២០១៨, ឆ្នាំ២០១៩កន្លងមក និងខកខានមិនបានចូលរួមប្រកួត០២ឆ្នាំ គឺឆ្នាំ២០២០-២០២១ ដោយសារមិនមានការរៀបចំប្រារព្ធពិធីព្រោះតែវិបត្តិនៃជំងឺកូវីដ-១៩ មកដល់ឆ្នាំ២០២២នេះ ដោយមានការរៀបចំប្រារព្ធពិធីប្រណាំងទូកឡើងវិញ អធិរាជឥន្ទ្រីសែនជ័យបារមីដូនពេញ នៅតែការពារបាននូវជយលាភីនេះ។
កម្មវិធីប្រកួតទូកប្រពៃណីខ្នាតអន្តរជាតិលើដងទន្លេវ៉ៃគោ ខេត្តស្វាយរៀង ឆ្នាំនេះ ក៏មិនខុសពីបណ្តាឆ្នាំកន្លងមកផងដែរ គឺប្រារព្ធឡើង រយៈពេល០២ថ្ងៃ កាលពីថ្ងៃទី២៩-៣០ ខែតុលា ឆ្នាំ២០២២ ដោយមានការជួយឧបត្ថម្ភគាំទ្រ និងចូលរួមជាអធិបតី ពីសំណាក់លោកស្រី កិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច។
ក្នុងនោះក៏មានការចូលរួមពី នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំងលោកឧកញ៉ា អ្នកឧកញ៉ា លោក លោកស្រី ក្រុមការងារថ្នាក់ជាតិចុះមូលដ្ឋានខេត្តស្វាយរៀង និងអាជ្ញាធររដ្ឋបាលខេត្តស្វាយរៀងទាំងមូល ដោយមានទូកចូលរួមប្រកួតមកពី កងរាជអាវុធហត្ថ រាជធានីខេត្ត ទាំង២៥ ទូទាំងប្រទេស រួមជាមួយទូកមកពី ក្រុងស្រុកទូទាំងខេត្តស្វាយរៀង ទូករបស់សាលាខេត្តស្វាយរៀង និងទូកមកពីតាមបណ្តាខេត្តផ្សេងមួយចំនួនទៀត ចូលរួមយ៉ាងច្រើនកុះករផងដែរ៕
