(ភ្នំពេញ)៖ អគ្គិភ័យឆាបឆេះផ្ទះប្រជាពលរដ្ឋមួយកន្លែង បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យចេញអន្តរាគមន៍ជួយបាញ់ទឹកពន្លត់។ ហេតុការណ៍នេះបានកើតឡើង នៅយប់រំលងអាធ្រាតឈានចូលថ្ងៃទី៣០ ខែតុលា ឆ្នាំ២០២២ តាមបណ្តោយផ្លូវជាតិលេខ៤ ក្នុងភូមិស្រែកក្នុង សង្កាត់កន្ទោក ខណ្ឌកំបូល។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ បានប្រាប់ឲ្យបណ្តាញព័ត៌មាន Fresh News ដឹងថា ក្រោយពីទទួលបានព័ត៌មានពីប្រជាពលរដ្ឋរាយការណ៍មកថា មានអគ្គិភ័យកំពុងឆាបឆេះផ្ទះលក់ឥវ៉ាន់ចាប់ហួយមួយកន្លែង ដែលស្ថិតនៅក្នុងតំបន់សេដ្ឋកិច្ចពិសេស ភ្លាមៗនោះលោកក៏បានបញ្ជាទៅរថយន្តពន្លត់អគ្គិភ័យនៅក្បែរទីតាំងឲ្យចេញជួយអន្តរាគមន៍។
លោកវរសេនីយ៍ឯក ព្រហ្ម យ៉ន នាយការិយាល័យ បានបន្តថា ហេតុការណ៍គ្រោះអគ្គិភ័យខាងលើនេះ គឺបណ្តាលមកពីការឆ្លងចរន្តអគ្គីសនី បានបង្កជាអគ្គិភ័យឆាបឆេះ ហើយក្នុងនោះធ្វើឲ្យខូចខាតឆេះសម្ភារៈក្នុងផ្ទះអស់ទាំងស្រុង ដែលសង់អំពី ដែកប្រក់សង្ក័សី ទំហំ ៥ម៉ែត្រ គុណ១០ម៉ែត្រ។
លោកវរសេនីយ៍ឯក ព្រហ្ម យ៉ន បានបញ្ជាក់ថា ក្នុងប្រតិបត្តិការខាងលើនេះ កម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យរបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ចំនួន ០៣គ្រឿង ប្រើប្រាស់ទឹកអស់២ឡាន និងរថយន្តជំនួយមកពី រថយន្តពន្លត់អគ្គិភ័យ ៩១១ ចំនួន១គ្រឿង ប្រើប្រាស់ទឹកអស់ ១ឡាន, រថយន្តពន្លត់អគ្គិភ័យកងពលតូចលេខ៧០ ចំនួន ៤គ្រឿង ប្រើប្រាស់ទឹកអស់១ឡាន និងរថយន្តពន្លត់អគ្គិភ័យបុរីសង្ឃឹមថ្មី ចំនួន១គ្រឿង ប្រើប្រាស់ទឹកអស់១ឡាន។
ចំពោះករណីអគ្គិភ័យខាងលើនេះ គឺមិនបានបណ្តាលឲ្យអ្នកណាម្នាក់រងរបួស និងប៉ះពាល់ដល់អាយុជីវិតប្រជាពលរដ្ឋនោះឡើយ៕
