(ស្វាយរៀង)៖ នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋាស្រុកចន្ទ្រា នាព្រឹកថ្ងៃទី២៩ ខែតុលា ឆ្នាំ២០២២នេះបានសំណេះសំណាលជាមួយក្រុមប្រឹក្សាស្រុក គណៈអភិបាលស្រុក មន្ត្រីរាជការ កងកម្លាំង ក្រុមប្រឹក្សាឃុំ ក្រុមគ្រូពេទ្យ លោកគ្រូអ្នកគ្រូ និងចែកអំណោយប្រជាពលរដ្ឋក្រីក្រ២០គ្រួសារក្នុងស្រុកចន្ទ្រា ព្រមទាំងចុះពិនិត្យមើលវឌ្ឍនភាពនៃការអភិវឌ្ឍនៅស្រុកចន្ទ្រាផងដែរ។
លោក ម៉ឹង សំផន បានលើកឡើងពីគោលនយោបាយរបស់រាជរដ្ឋាភិបាល ដែលមានសម្តេចតេជោជាប្រមុខដឹកនាំ គឺខិតខំប្រឹងប្រែងលើកម្ពស់ជីវភាពរស់នៅមន្ត្រីរាជការស៊ីវិល កងកម្លាំងប្រដាប់អាវុធ និងប្រជាពលរដ្ឋជួបការលំបាក ជាពិសេសលើបញ្ហាសុខភាពរបស់ប្រជាពលរដ្ឋ ដោយសម្តេចតេជោបានខិតខំប្រឹងប្រែងរកវ៉ាក់សាំងបង្ការជំងឺកូវីដ-១៩ យកមកចាក់ជូនប្រជាពលរដ្ឋដោយឥតគិតថ្លៃ និងការពារសុខុមាលភាពជូនប្រជាពលរដ្ឋគ្រប់ពេលវេលា ក៏ដូចជាការជួយស្តារឡើងវិញនូវជីវភាពប្រជាពលរដ្ឋ និងសេដ្ឋកិច្ចជាតិក្រោយពីរងផលប៉ះពាល់ដោយសារជំងឺកូវីដ-១៩។
លោកបានសង្កត់ធ្ងន់ថា សមិទ្ធផលនានាដែលកើតឡើងនៅស្រុកចន្ទ្រាខេត្តស្វាយរៀង ក៏ដូចជានៅទូទាំងប្រទេសនាពេលបច្ចុប្បន្ននេះ គឺដោយសារការដឹកនាំដ៏ត្រឹមត្រូវរបស់សម្តេចតេជោហ៊ុន សែន ដែលបានធ្វើឱ្យប្រទេសជាតិមានការរីកចម្រើន និងមានសុខសន្តិភាពពិតប្រាកដ។ ដូចនេះយើងទាំងអស់គ្នាត្រូវគាំទ្រសម្តេចតេជោ ហ៊ុន សែន ធ្វើជានាយករដ្ឋមន្ត្រី និងគាំទ្រលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីទៅថ្ងៃអនាគត។
លោក ម៉ឹង សំផន បានផ្តាំផ្ញើដល់មន្ត្រីក្រុមប្រឹក្សាឃុំស្រុកបន្តយកចិត្តទុកដាក់ដល់ប្រជាពលរដ្ឋជួបការលំបាក ជាពិសេសបម្រើប្រជាពលរដ្ឋឱ្យបានល្អលើការផ្តល់សេវាសាធារណៈជូនពួកគាត់ឲ្យបានទាន់ពេលវេលាគិតគូរអំពីជីវភាពរស់នៅ និងផ្ដល់សេវាសុខាភិបាលជូនពួកគាត់ឲ្យបានល្អប្រសើរ។
សូមបញ្ជាក់ថា នៅក្នុងពិធីនេះ លោក ម៉ឹង សំផន បានឧបត្ថម្ភអ្នកចូលរួមក្នុង១នាក់ទទួលបានសារុង១ ក្រមា១ និងថវិកា៥០,០០០រៀល បានឧបត្ថម្ភអំពូលភ្លើងសូឡា៥០ដើមដល់រដ្ឋបាលស្រុក ឧបត្ថម្ភទូកចន្ទ្រាសែនជ័យបារមីសេះសចំនួន១៥,៣៩០,០០០រៀល ឧបត្ថម្ភកម្មវិធីបុណ្យអុំទូកខេត្តថវិកា២,០០០,០០០រៀល។
លោកបានដឹកនាំក្រុមការងារចុះចែកអំណោយជូនជាពលរដ្ឋក្រីក្រចំនួន២០គ្រួសារមកពីឃុំសំរោង និងឃុំច្រេស ដែលក្នុងមួយគ្រួសារទទួលបានអង្ករ៥០គីឡូក្រាម មី១កេស ត្រីខ១ឡូទឹកស៊ីអ៊ីវ១យួរ ឃីត១កញ្ចប់ និងថវិកា៥០,០០០រៀល។
លោកបានបន្តដឹកនាំក្រុមការងារចុះពិនិត្យមើលអគារទីស្នាក់ការគណបក្សប្រជាជនកម្ពុជាស្រុកចន្ទ្រា ដែលកំពុងសាងសង់ថ្មី រួមនឹងក្រុមការងារចុះដែលសម្រេចបានប្រហែល៥០% និងបានឧបត្ថម្ភថវិកា២០០០ដុល្លារ សម្រាប់សាងសង់ខ្លោងទ្វារគណបក្ស។
បន្ទាប់មក លោក ម៉ឹង សំផន បានដឹកនាំក្រុមការងារចុះពិនិត្យមើលផ្លូវក្រាលថ្មមិក និងនាំគ្រឿងចក្រទៅធ្វើការជួសជុលផ្លូវក្រឡុកពីភូមិកោះក្បាលខាងជើងឃុំសំរោងភូមិបារាយណ៍ស្វាយគុយ ភូមិត្រពាំងធ្លក ភូមិបន្លាស្អិត ឃុំច្រេស ស្រុកចន្ទ្រា និងបានឧបត្ថម្ភថវិកាសម្រាប់ការជួសជុល២,០០០ដុល្លារ និងចែកសារុងក្រមាជូនដល់ប្រជាពលរដ្ឋ២០នាក់ក្នុង១នាក់សារុង១ ក្រមា១ បន្ទាប់មកចុះពិនិត្យមើលអនុវិទ្យាល័យផនសែនទេពធីតា និងបានឧបត្ថម្ភថវិកាចាក់ដីទីធ្លាសាលារៀនចំនួន២,៥០០ដុល្លារជូនលោកគ្រូអ្នកគ្រូ៣៤នាក់ក្នុងមួយនាក់សារុង១ ក្រមា១ ថវិកា៥០,០០០រៀល និងចុះសួរសុខទុក្ខគ្រូពេទ្យនៅមណ្ឌលសុខភាពមិត្តភាពកម្ពុជា-វៀតណាមទួលស្តីចំនួន២៣នាក់ និងបានឧបត្ថម្ភថវិកាក្នុងមួយនាក់៥០,០០០រៀល សារុង១ ក្រមា១ និងឃីត១កញ្ចប់៕
