(ភ្នំពេញ)៖ បន្ទាប់ពីបើកសវនាការតាំងពីព្រឹក រហូតដលម៉ោងជាង ១២៖០០នាទីថ្ងៃត្រង់ ថ្ងៃទី១៣ ខែមិថុនា ឆ្នាំ២០១៦នេះ ប្រធានក្រុមប្រឹក្សាជំនុំជម្រះរបស់សាលាឧទ្ធរណ៍ លោក ឃុន លាងម៉េង បានបដិសេធលើសំណើសុំនៅក្រៅឃុំបណ្តោះអាសន្នរបស់មន្ត្រីសមាគមសិទ្ធិមនុស្សអាដហុក ៤រូប និង អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) មួយរូបហើយ ដោយតម្កល់តាមសេចក្តីសម្រេចរបស់សាលាដំបូងរាជធានីភ្នំពេញ។
ជនជាប់ចោទទាំង៥នាក់ រួមមាន លោក នី សុខា ប្រធានផ្នែកស៊ើបអង្កេតសមាគមអាដហុក លោក យី សុខសាន្ត អនុប្រធានសមាគមអាដហុក លោក ណៃ រ៉ង់ដា អនុប្រធានសមាគមអាដហុក លោកស្រី លឹម មុន្នី មន្ត្រីជាន់ខ្ពស់សមាគមអាដហុក និង លោក នី ចរិយា អគ្គលេខាធិការរង គ.ជ.ប ។
មន្រ្តីអាដហុក លោក នី សុខា, លោក យី សុខសាន្ត, លោក ណៃ វង់ដា និងលោកស្រី លឹម មុន្នី នាពេលកន្លងទៅ ត្រូវបានលោកព្រះរាជអាជ្ញារង គុជ គឹមឡុង ចោទពីបទ សូកប៉ាន់សាក្សី តាមមាត្រា៥៤៨ នៃក្រមព្រហ្មទណ្ឌកម្ពុជា ហើយត្រូវបាន លោក ជា សុខចាន់ដេត ចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីល្ងាចថ្ងៃទី០២ ខែឧសភា ឆ្នាំ២០១៦ ឃុំខ្លួនដាក់ពន្ធនាគារ ដើម្បីរង់ចាំការស៊ើបអង្កេតបន្តទៀត ។
ដោយឡែក លោក នី ចរិយា ដែលកំពុងជាប់ឃុំដែរនោះ ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និង មាត្រា ៥៤៨ នៃក្រមព្រហ្មទណ្ឌ។ ជាមួយគ្នានេះ លោក សឺន សាលី ជាមន្ត្រីអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ដែលកំពុងរត់គេចខ្លួន ក៏ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សីផងដែរ។ បទល្មើសសូកប៉ាន់សាក្សី អាចប្រឈមនឹងការផ្តន្ទាទោសពី៥ឆ្នាំទៅ១០ឆ្នាំ ៕
