(កំពង់ធំ)៖ នៅព្រឹកថ្ងៃសៅរ៍ ទី២៩ ខែតុលា ឆ្នាំ២០២២ស្អែកនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នឹងអញ្ជើញចែកស្រូវពូជ និងស្បៀងអាហារជូនប្រជាពលរដ្ឋខេត្តកំពង់ធំជិត ៧ពាន់គ្រួសារ។ ពិធីរៀបចំធ្វើឡើងនៅទីលានបាល់ទាត់ខេត្តកំពង់ធំ។

លោក ងួន រតនៈ អភិបាលខេត្តកំពង់ធំ បានឱ្យដឹងថា ប្រជាពលរដ្ឋដែលអញ្ជើញមកទទួលស្រូវពូជ និងស្បៀងអាហារនេះ មានចំនួន ៦,៨៤៤គ្រួសារ មកពី ៩ក្រុង ស្រុក ៤៨ឃុំ សង្កាត់ និង ២៩៨ភូមិ។ ស្រូវពូជដេលនឹងប្រគល់ជូនប្រជាពលរដ្ឋមានចំនួន ៦៨៤,៤០០គីឡូក្រាម រួមនឹងគ្រឿងឧបភោគ បរិភោគមួយចំនួនរួមមាន៖ អង្ករ ត្រីខ មី និងថវិកាមួយចំនួនទៀត។

លោកអភិបាលខេត្តកំពង់ធំ បានឱ្យដឹងថា ខេត្តកំពង់ធំ ដែលជាតំបន់វាលទំនាបកណ្តាល បានទទួលរងគ្រោះទឹកជំនន់ និងប៉ះពាល់ចំនួន ៩ក្រុង ស្រុក ៥១ឃុំ សង្កាត់ និង ២៩២ភូមិ។ ប៉ះពាល់ប្រជាពលរដ្ឋចំនួន ២៩,៣៣៦គ្រួសារ ក្នុងនោះ ជម្លៀសប្រជាពលរដ្ឋទៅកាន់ទីទួលមានសុវត្ថិភាពចំនួន ១,៥០១គ្រួសារ។

ទឹកជំនន់ បានប៉ះពាល់ដំណាំស្រូវ ២៥,៣៩៥ហិកតាខូចខាត ១២,៣០៧ហិកតា និងដំណាំរួមផ្សំ ១,៧៦៦ហិកតា ខូចខាត ១,២៥៦ហិកតា និងប៉ះពាល់ហេដ្ឋារចនាសម្ព័ន្ធ ខូចខាតស្ពានទាំងស្រុងចំនួន ០២កន្លែង ផ្លូវជនបទមួយចំនួនទទួលរងការខូចខាតប៉ះពាល់សាលារៀន មណ្ឌលសុខភាព និងវត្តអារាមមួយចំនួនទៀត។

លោកអភិបាលខេត្ត បានឱ្យដឹងថា ដើម្បីឆ្លើយតប និងដោះស្រាយបន្ទាន់ រដ្ឋបាលខេត្ត ក្រុង ស្រុក មន្ទីរ-អង្គភាព កងកម្លាំងប្រដាប់អាវុធ បានត្រៀមប្រចាំការ និងចុះពិនិត្យមើលទីតាំងដែលកំពុងតែប្រឈមនឹងគ្រោះទឹកជំនន់ជាប្រចាំ។ ក្រៅពីនោះរដ្ឋបាលខេត្ត បានធ្វើការផ្សព្វផ្សាយដល់សាធារណជន និងប្រជាពលរដ្ឋនៅទូទាំងខេត្តកំពង់ធំ តាមរយៈការប្រើប្រាស់ប្រព័ន្ធប្រកាសឱ្យដឹងមុន១២៩៤ ដើម្បីឱ្យប្រជាជនមានការប្រុងប្រយ័ត្ន និងត្រៀមលក្ខណៈទុកជាមុន។ ព្រមទាំងបានជូនដំណឹងដល់សាធារណជន និងប្រជាពលរដ្ឋ ដែលរស់នៅតាមបណ្តោយដងស្ទឹងសែន និងស្ទឹងស្ទោង ឱ្យបង្កើនការប្រុងប្រយ័ត្នខ្ពស់ និងត្រៀមបង្ការចំពោះគ្រោះទឹកជំនន់។

ដើម្បីដោះស្រាយជីវភាពប្រចាំថ្ងៃជូនប្រជាពលរដ្ឋដែលមានជីវភាពខ្វះខាត ហើយទទួលរងដោយគ្រោះទឹកជំនន់ រដ្ឋបាលខេត្ត គណៈកម្មាធិការជាតិគ្រប់គ្រងគ្រោះមហន្តរាយ បានចែកជូនគ្រឿងឧបភោគបរិភោគ ដែលជាស្បៀងបម្រុងរបស់រាជរដ្ឋាភិបាល និងសប្បុរសជននានា ជូនប្រជាពលរដ្ឋបានចំនួន ១៥,៤៩៤គ្រួសារ។ ដោយឡែក លោកបណ្ឌិត ហ៊ុន ម៉ាណែត និងលោកស្រី ពេជ្រ ចន្ទមុន្នី ក៏បានផ្ដល់ជូនថ្នាំពេទ្យចំនួន ១,០០០កញ្ចប់ ដើម្បីចែកជូនបងប្អូនប្រជាពលរដ្ឋផងដែរ។

ជាមួយនឹងការដោះស្រាយផលប៉ះពាល់នៃទឹកជំនន់ខាងលើ ពិសេសការដោះស្រាយជីវភាពជូនបងប្អូនដែលមានជីវភាពខ្វះខាត ជាគ្រឿងឧបភោគបរិភោគ និងថ្នាំពេទ្យខាងលើ សម្តេចតេជោ ក៏បានផ្ដល់អង្ករចំនួន ៣០០តោន និងថវិកាចំនួន ១៥ម៉ឺនដុល្លារបន្ថែមទៀតដើម្បីឱ្យរដ្ឋបាលខេត្ត និងគណៈកម្មការគ្រប់គ្រងគ្រោះមហន្តរាយខេត្ត បន្តផ្ដល់ជូនដល់ប្រជាពលរដ្ឋដែលមានជីវភាពខ្វះខាត និងរងគ្រោះដោយសារទឹកជំនន់។

មួយវិញទៀតចំពោះការស្ដារឡើងវិញ នូវការខូចខាតដំណាំស្រូវរបស់ប្រជាពលរដ្ឋ លើផ្ទៃដី ១១,៥៣០ហិកតា ដែលត្រូវការស្រូវពូជជាចាំបាច់ចំនួន ៩៥៩តោន ក្នុងនោះ លោកទេសរដ្ឋមន្តីគន់ គីម ប្រតិភូក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្ម និងរដ្ឋបាលខេត្ត បានផ្ដល់ជូនប្រជាពលរដ្ឋលើកទី១ បានចំនួន ២៧៤តោន ស្មើនឹង ៤,១៩៦គ្រួសារ។

ក្នុងនាមក្រុមប្រឹក្សាខេត្ត គណៈអភិបាលខេត្ត កងកម្លាំងប្រដាប់អាវុធ មន្ត្រីរាជការ និងប្រជាពលរដ្ឋទូទាំងខេត្តកំពង់ធំ លោក ងួន រតនៈ គោរពថ្លែងអំណរគុណយ៉ាងជ្រាលជ្រៅ ជូនចំពោះសម្តេចតេជោនាយករដ្ឋមន្ត្រី ដែលសម្ដេច តែងតែយកចិត្តទុកដាក់ខ្ពស់អំពីសុខទុក្ខរបស់ប្រជាពលរដ្ឋក្នុងការដោះស្រាយបញ្ហាស្បៀង និងស្រូវពូជ ជូនប្រជាពលរដ្ឋរងគ្រោះដោយសារទឹកជំនន់។

លោក ងួន រតនៈ ប្រកាសគាំទ្រការដឹកនាំរបស់រាជរដ្ឋាភិបាលដែលមាន សម្ដេចតេជោជានាយករដ្ឋមន្ត្រី និងប្រឆាំងដាច់ខាតរាល់ការប៉ុនប៉ងផ្តួលរំលំរាជរដ្ឋាភិបាលស្របច្បាប់ ពិសេសថ្កោលទោសយ៉ាងដាច់អហង្ការ ចំពោះជនក្បត់ជាតិបីជំនាន់ សម រង្ស៉ី ដែលហ៊ានប្រមាថដល់អង្គព្រះមហាក្សត្រជាទីគោរពសក្ការៈដ៏ខ្ពង់ខ្ពស់នៃប្រជាពលរដ្ឋខ្មែរ និងសូមគាំទ្រយ៉ាងពេញទំហឹងចំពោះយុទ្ធនាការ សម្តេចតេជោ នាយករដ្ឋមន្ត្រី ក្នុងការកម្ចាត់ចោលនូវនយោបាយជុលនិយមរបស់ជនក្បត់ជាតិបីជំនាន់ឱ្យអស់ពីព្រះរាជាណាចក្រកម្ពុជា ដើម្បីរក្សាសន្តិភាព ស្ថិរភាពសង្គមនិងសេចក្តីសុខសាន្តរបស់ប្រជាពលរដ្ឋខ្មែរ៕