(ភ្នំពេញ)៖ លោក ហួរ រដ្ឋា អតីតបេក្ខជនតំណាងរាស្ត្រមណ្ឌលភ្នំពេញ បានចេញសារ ថ្កោលទោស និងប្រឆាំងដាច់ខាតចំពោះ លោក សម រង្ស៉ី ដែលបានប្រមាថដល់អង្គព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់បំផុត នៃប្រជាជនកម្ពុជា។ លោកចាត់ទុកថា ទង្វើរបស់ លោក សម រង្ស៉ី ដែលប្រមាថព្រះមហាក្សត្រ គឺជាគំរូដ៏អាក្រក់បំផុត សម្រាប់អ្នកនយោបាយជំនាន់ក្រោយ។
លោក ហួរ រដ្ឋា បានលើកឡើងថា៖ «ក្នុងនាមខ្ញុំផ្ទាល់ ជាអ្នកនយោបាយវ័យក្មេងនៅកម្ពុជា ខ្ញុំសូមប្រឆាំងដាច់ខាតចំពោះទង្វើបំពានរដ្ឋធម្មនុញ្ញ នៃព្រះរាជាណាចក្រកម្ពុជា ដែលមិនអាចអត់ឱនឱ្យបានរបស់ លោក សម រង្ស៉ី ចំពោះការប្រមាថជាសាធារណៈចំពោះអង្គព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់នៃយើង»។
លោក ហួរ រដ្ឋា បានលើកឡើងថា លោក សម រង្ស៉ី បាន និងកំពុងធ្វើនយោបាយតាមអារម្មណ៍ និងហ៊ានធ្វើអ្វីៗគ្រប់បែបយ៉ាងដើម្បីបំពេញមហិច្ឆិតានយោបាយរបស់ខ្លួន បើទោះបីជាទង្វើនោះជាកលល្បិចធ្វើឱ្យប៉ះពាល់ដល់ប្រយោជន៍ជាតិ និងសង្គមកម្ពុជាក៏ដោយ។
លោកបន្ថែមថា «តាមរយៈសកម្មភាព និងទង្វើនយោបាយប្រឆាំងរបស់ លោក សម រង្ស៉ី និងបក្ខពួក ខ្ញុំពុំមើលឃើញថា លោក សម រង្ស៉ី និងបក្ខពួក មានឧត្តមគគតិស្នេហាជាតិ ស្នេហាមាតុភូមិ និងប្រជាជនកម្ពុជាពិតប្រាកដម្តងណាឡើយ។ ក្រុមប្រឆាំង ដែលដឹកនាំដោយលោក សម រង្ស៉ី គឺមានតែរិះរកប្រើគ្រប់មធ្យោបាយ និងយុទ្ធសាស្ត្រដឹកនាំបំផ្លិចបំផ្លាញសង្គមជាតិ និងបង្កជាសកម្មភាពធ្វើឱ្យសង្គមជាតិអស្ថេរភាពនយោបាយឥតឈប់ឈរ»។
លោកបានបញ្ជាក់ដូច្នេះថា៖ «ដូចនេះ ខ្ញុំក្នុងនាមជាអ្នកនយោបាយវ័យក្មេងចាត់ទុកថា ទង្វើរបស់លោក សម រង្ស៉ីគឺ ជាគំរូដ៏អាក្រក់បំផុត សម្រាប់អ្នកនយោបាយជំនាន់ក្រោយ។ ខ្ញុំ សូមថ្កោលទោស និងប្រឆាំងដាច់ខាតចំពោះទង្វើប្រមាថទាំងបំពាន មានចែងក្នុងរដ្ឋធម្មនុញ្ញកម្ពុជា ដល់អង្គព្រះមហាក្សត្រនៃយើង ដែលបានប្រព្រឹត្តដោយ លោក សម រង្ស៊ី និង ក្រុមបក្ខពួក»៕
