(ភ្នំពេញ)៖ លោក ឌិត ទីណា រដ្ឋមន្ត្រីថ្មីនៃក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី១៩ ខែតុលា ឆ្នាំ២០២២នេះ បានចាប់ផ្តើមចុះបំពេញបេសកកម្មរបស់ខ្លួនជាលើកដំបូង ក្នុងនាមជារដ្ឋមន្ត្រីកសិកម្ម ដើម្បីនាំយកនូវជំនួយគ្រាប់ពូជ ចែកជូនកសិករដែលរងផលប៉ះពាល់ដោយទឹកជំនន់។
នៅព្រឹកនេះ លោករដ្ឋមន្ត្រី ឌិត ទីណា បានអមដំណើរលោកទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ឆ្ពោះទៅជួបបងប្អូនប្រជាកសិកររងគ្រោះដោយជំនន់ទឹកភ្លៀងនៅខេត្តក្រចេះ តាមរយៈ Facebook ផ្លូវការរបស់ខ្លួន លោក ឌិត ទីណា បានសរសេរយ៉ាងដូច្នេះថា «បន្ទាប់ពីប្រជុំវាយតម្លៃ និងចាត់ចែងការងារនៅក្រសួងពេញមួយថ្ងៃម្សិលមិញ ថ្ងៃនេះបេសកកម្មតាមខេត្តរបស់ខ្ញុំចាប់ផ្ដើមជាផ្លូវការ ទៅតាមបណ្តាទីតាំងដែលមានប្រជាពលរដ្ឋរងគ្រោះដោយទឹកជំនន់ ដើម្បីចែកជូននូវជំនួយសម្រាប់ស្តារឡើងវិញនូវការខូចខាត។ ការងារនេះ ចាំបាច់និងបន្ទាន់ណាស់ ដើម្បីធានាថា បងប្អូនប្រជាកសិករយើង លោកបានទទួលពូជស្រូវសម្រាប់ដាំដុះឡើងវិញទាន់ពេលវេលា នៅពេលដែលទឹកចាប់ស្រកទៅវិញ។
នាព្រឹកនេះ ខ្ញុំមានឱកាសអមដំណើរ ឯកឧត្តមនាយឧត្តមសេនីយ៍ គន់ គីម ទេសរដ្ឋមន្រ្តីទទួលបន្ទុកបេសសកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ឆ្ពោះទៅជួបបងប្អូនប្រជាកសិកររងគ្រោះដោយជំនន់ទឹកភ្លៀងនៅខេត្តក្រចេះ»។
សូមជម្រាបថា លោក ឌិត ទីណា បានចូលកាន់តំណែងរដ្ឋមន្ត្រីថ្មី នៃក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃទី១៧ ខែតុលា ឆ្នាំ២០២២។
ក្រោយចូលកាន់តំណែងជារដ្ឋមន្ត្រី លោកបានកំណត់ការងារអទិភាពនៅចំពោះមុខ ដែលលោកត្រូវដោះស្រាយក្នុងជំហានដំបូង គឺដោះស្រាយបញ្ហារបស់ប្រជាកសិករ ដែលកំពុងរងផលប៉ះពាល់ពីគ្រោះទឹកជំនន់។
លោកនឹងចាប់ផ្តើមចុះទៅតាមបណ្តាខេត្តដែលរងផលប៉ះពាល់ពីគ្រោះទឹកជំនន់ និងសហការជាមួយស្ថាប័នពាក់ព័ន្ធ ពិនិត្យ និងដោះស្រាយផលប៉ះពាល់ដែលបង្កដោយទឹកជំនន់ ដែលបានបំផ្លាញដំណាំប្រជាពលរដ្ឋជាច្រើននៅទាំងប្រទេស ផ្តល់ពូជស្រូវ និងដំណាំជាបន្ទាន់ដល់កសិករ ដើម្បីស្តារការដាំដុះឡើងវិញ៕
