(តូក្យូ)៖ រដ្ឋាភិបាលជប៉ុន បានបង្ហាញក្ដីព្រួយបារម្ភយ៉ាងខ្លាំង និងបានកោះហៅឯកអគ្គរដ្ឋទូតចិនប្រចាំប្រទេសជប៉ុន មកសួរនាំ បន្ទាប់ពីនាវាកងទ័ពជើងទឹករបស់ចិន បានរំកិលខ្លួនខិតចូលកាន់តែជិតកោះមួយស្ថិតនៅតំបន់ជម្លោះសមុទ្រចិនខាងកើត។ នេះបើយោងតាមការចេញផ្សាយរបស់សារព័ត៌មាន Channel News Asia នៅថ្ងៃទី០៩ ខែមិថុនា ឆ្នាំ២០១៦។
រដ្ឋភិបាលជប៉ុន បានអះអាងថា តំបន់កោះមានជម្លោះនោះ ជាកម្មសិទ្ធិរបស់ខ្លួន (ជប៉ុន ហៅកោះ Senkaku ចំណែកចិន ហៅកោះ Diaoyu) ហើយការដែលចិនចល័តនាវាចម្បាំងរបស់ខ្លួនមកកាន់តែជិតដែនកោះមួយនេះ គឺកាន់តែធ្វើឲ្យមានភាពតានតឹងខ្លាំងឡើង។
អនុរដ្ឋមន្ត្រីការបរទេសរបស់ជប៉ុន លោក Akitaka Saiki បានកោះហៅ ឯកអគ្គរដ្ឋទូតចិនប្រចាំប្រទេសទីក្រុងតូក្យូ នៅម៉ោងប្រមាណ ២រសៀលនេះ ដោយបានសម្ដែងនូវព្រួយបារម្ភយ៉ាងខ្លាំង។ «យើងព្រួយបារម្ភយ៉ាងខ្លាំងទៅលើសកម្មភាពរបស់ចិននៅពេលនេះ ដែលបានបង្កើនភាពតានតឹងក្នុងកម្រិតខ្ពស់ និងអាចប៉ះពាល់ដល់ទំនាក់ទំនងរវាងប្រទេសទាំងពីរ»។ នេះជាសំដីរបស់ ប្រធានលេខាធិការគណៈរដ្ឋមន្រ្តីជប៉ុន លោក Yoshihide Suga បានថ្លែងយ៉ាងខ្លី ទៅកាន់អ្នកសារព័ត៌មាន៕
