(ភ្នំពេញ)៖ លោក ឃ្លាំង ហួត អភិបាលរងរាជធានីភ្នំពេញ តំណាងលោកអភិបាលរាជធានី ឃួង ស្រេង នាថ្ងៃទី១៦ ខែតុលា ឆ្នាំ២០២២នេះ បានចុះពិនិត្យទីតាំងគ្រោងសាងសង់ផ្លូវមួយខ្សែនៅសង្កាត់បាក់ខែង ខណ្ឌជ្រោយចង្វា និងបានជូនដំណឹងដល់ប្រជាពលរដ្ឋថាគម្រោងសាងសង់ផ្លូវនេះនឹងចាប់អនុវត្តនាពេលឆាប់ៗខាងមុខឆាប់ៗនេះ ប្រជាពលរដ្ឋពេលនៅពេលបានដឹងដំណឹងនេះហេីយ ពួកគាត់សប្បាយរីករាយពោរពេញដោយក្ដីសង្ឃឹម និងបានថ្លែងអំណរគុណចំពោះសម្ដេចតេជោ ហ៊ុន សែន នាយករដ្ឋមន្ត្រី ដែលតែងតែយកចិត្តទុកដាក់ចំពោះពួកគាត់ជាប្រជាជនមូលដ្ឋាន ហើយក៏បានថ្លែងអំណរគុណដល់អាជ្ញាធររាជធានីភ្នំពេញផងដែរ។
នាឱកាសនោះក៏មានការអមដំណើរដោយលោក លីម សុភា អភិបាលខណ្ឌជ្រោយចង្វា ព្រមទាំងមន្ត្រី និងអាជ្ញាធរពាក់ព័ន្ធដទៃទៀត។
លោក ឃ្លាំង ហួត និងក្រុមការងារបានថ្លែងអំណរគុណចំពោះប្រជាពលរដ្ឋសង្កាត់បាក់ខែងដែលបានចូលរួមបោះឆ្នោតក្រុមប្រឹក្សាសង្កាត់ នាថ្ងៃទី៥ ខែមិថុនា ឆ្នាំ២០២២ កន្លងមក ជាលទ្ធផលគណបក្សប្រជាជនកម្ពុជាឈ្នះភ្លូកទឹកភ្លូកដី ដែលវាជាភស្តុតាងបង្ហាញឱ្យឃេីញថា ក្រោមការដឹកនាំរបស់រាជរដ្ឋាភិបាល គណបក្សប្រជាជនកម្ពុជាពិតជាបានបម្រេីប្រជាពលរដ្ឋពិតប្រាកដមែន។
លោក ឃ្លាំង ហួត និងក្រុមការងារក៏បានថ្លែងអំណរគុណចំពោះសម្ដេចតេជោ ហ៊ុន សែន ដែលតែងតែធ្វេីជាគំរូដល់មន្រ្តីរាជការគ្រប់ជាន់ថ្នាក់ក្នុងការបម្រេីជាតិ និងប្រជាជន៕
