(ស្វាយរៀង)៖ រូបសំណាកព្រះបាទជ័យវរ្ម័នទី៧, រូបសំណាកសម្ដេចព្រះមហាសុមេធាធិបតី ជូន ណាត (ជោតញ្ញាណោ) និងរូបសំណាកអ្នកភិរម្យភាសាអ៊ូ ហៅ ង៉ុយ នៅវិទ្យាល័យ ប៊ុន រ៉ានី ហ៊ុនសែន ចន្ទ្រា ដែលជាអំណោយសប្បុរធម៌ដ៏ថ្លៃថ្លារបស់ឧកញ៉ា លីយូគៀក ទីប្រឹក្សាសម្ដេចពញាចក្រី ហេង សំរិន ប្រធានរដ្ឋសភា ត្រូវបានធ្វើពិធីចម្រើនព្រះបរិត្តនិងអភិសេកឆ្លង នារសៀលថ្ងៃទី១៤ខែតុលាឆ្នាំ២០២២ ម្សិលមិញ។
ពិធីនេះមានការចូលរួមពីលោក ថន ថាវុទ្ធា អភិបាលស្រុកចន្ទ្រា ព្រមទាំងមន្ត្រីរាជការ លោកនាយកសាលាវិទ្យាល័យ ប៊ុន រ៉ានីហ៊ុន សែន ចន្ទ្រា លោកគ្រូអ្នកគ្រូ សិស្សានុសិស្សជាច្រើនអ្នកផងដែរ។
បើតាមលោក ចក់ ចំរើន នាយកវិទ្យាល័យ ប៊ុន រ៉ានី ហ៊ុនសែន ចន្ទ្រា បានឱ្យដឹងថា សាលារៀនវិទ្យាល័យ ប៊ុន រ៉ានី ហ៊ុនសែន ចន្ទ្រា ស្ថិតនៅក្នុងភូមិបុស្ស ឃុំមេសរថ្ងក ស្រុកចន្ទ្រា ខេត្តស្វាយរៀង មានឈ្មោះដើម អនុវិទ្យាល័យសុរាម្រិត កសាងនៅឆ្នាំ១៩៦៦ ដោយនៅឆ្នាំ១៩៧៥ ដល់ឆ្នាំ១៩៧៨ ជាឃ្លាំងដាក់គ្រាប់និងអាវុធរបស់ទាហានប៉ុលពត ក្រោយជ័យជំនះ ៧ មករាឆ្នាំ ១៩៧៩ នៅឆ្នាំ១៩៨២ សាលាបានបើកទ្វារបង្រៀនឡើងវិញដោយមានឈ្មោះថា សាលាកម្រិតសិក្សាទី២ ស្រុកចន្ទ្រា បន្តមកនៅឆ្នាំ ២០០៥ សាលាបានបង្កើតនៅវិទ្យាល័យ ប៊ុន រ៉ានី ហ៊ុនសែន ចន្ទ្រា ដែលមានលេខកូដ២០០ ១០៥ ០៤៩០១។ ស្ថានភាពទូទៅនៅសាលាវិទ្យាល័យ ប៊ុន រ៉ានី ហ៊ុនសែន ចន្ទ្រា មានបុគ្គលិកសិក្សាសរុប ៤២នាក់ ស្រី ៨នាក់ និងមានថ្នាក់កម្រិតចាប់ពីថ្នាក់ទី៧ ដល់ថ្នាក់ទី ១២។
លោកបានបញ្ជាក់ថា សាលាបានទទួលការឧបត្ថម្ភពីសប្បុរសជននានាកន្លងមកមានទាំងថវិការសម្ភារៈ ស្មារតីទ្រទ្រង់ជាហូរហែ។តែលុះឆ្នាំ២០២០នេះ សាលាបានទទួលការឧបត្ថម្ភទ្រទ្រង់ធំមានរូបសំណាកចំនួន៣ គឺរូបសំណាកព្រះបាទជ័យវរ្ម័នទី៧, រូបសំណាកសម្ដេចព្រះមហាសុមេធាធិបតី ជូន ណាត (ជោតញ្ញាណោ) និងរូបសំណាកអ្នក ភិរម្យភាសាអ៊ូ ហៅង៉ុយ ដែលមានតម្លៃសរុបជាង ១ម៉ឺនដុល្លារ ដែលជាអំណោយដ៏ថ្លៃថ្លារបស់ឧកញ៉ា លី យូគៀក។
បើតាមឧកញ៉ា លី យូគៀក បានឱ្យដឹងថា ការកសាងរូបសំណាកទាំងបីនេះឡើង ដើម្បីបំផុសឱ្យសិស្សានុសិស្សបានស្គាល់ បានដឹងបន្ថែមទៀតអំពីរូបសំណាក កិត្តិនាម និងស្នាព្រះហស្ថដ៏ល្បីល្បាញ និងអ្នកប្រាជ្ញខ្មែរ ដែលប្រជាពលរដ្ឋទូទៅចងចាំមិនភ្លេចនូវគុណឧបការៈដ៏ថ្លៃថ្លារបស់ឥស្សរជនឆ្នើមទាំងបីរូបរួមមាន៖
ទី១៖ ព្រះបាទជ័យវរ្ម័នទី៧ គឺជាមហាក្សត្រដែលមានឫទ្ធិអំណាចខ្លាំងក្លាក្នុងចំណោមព្រះរាជា ក្នុងសម័យអង្គរ។ ដោយសារតែលទ្ធិបារមីក្នុងការដឹកនាំប្រទេសរបស់ទ្រង់នេះហើយ ទើបបានជាធ្វើឱ្យកូនខ្មែរជំនាន់ក្រោយបានស្គាល់ដោយមិនអាចបំភ្លេចបានអំពីស្នាព្រះហត្ថដ៏ល្បីល្បាញរបស់ព្រះអង្គ។
ទីទី២៖ សម្ដេចព្រះសង្ឃរាជ ជួន ណាត គឺជាអ្នកប្រាជ្ញអក្សរសាស្ត្រខ្មែរមួយរូប ល្បីល្បាញក្នុងអំឡុងសហស្សវត្សទី១៩៥០ ដល់១៩៦០ ដោយព្រះអង្គ បានបង្កើតស្នាដៃនិពន្ធជាច្រើន ក្នុងនោះរួមមានវចនានុក្រមខ្មែរជាដើម។វចនានុក្រមនោះបានបន្សល់ទុកឲ្យកូនចៅខ្មែរប្រើប្រាស់រហូតមកដល់សព្វថ្ងៃនេះ។ស្នាព្រះហស្តទាំងនោះនៅតែបានដក់ជាប់ព្រមទាំងមានការកោតសរសើរយ៉ាងក្រៃលែង ពីសំណាក់ពុទ្ធបរិស័ទ ប្រជាពលរដ្ឋកូនចៅខ្មែរ ពីមួយជំនាន់ទៅមួយជំនាន់។ ដោយហេតុ គេឃើញថាស្នាព្រះហស្តអស់ទាំងនោះ គឺមានសារៈសំខាន់ និងមានប្រយោជន៍ក្នុងការជួយដល់ការសិក្សាទាំងផ្លូវលោក និងផ្លូវធម៌។
និងទី៣៖ អ្នកភិរម្យភាសា អ៊ូ ហៅង៉ុយ ជាបុគ្គលឧស្សាហ៍ព្យាយាមរៀនសូត្រ ដែលគេទទួលស្គាល់ថា ជាអ្នកប្រាជ្ញអក្សរសាស្ត្រខ្មែរមួយរូប រហូតដល់ហ្លួងព្រះស៊ីសុវត្ថិ ប្រទានគោរម្យងារជា «ក្រមង៉ុយ» ពេលបម្រើការងារនៅក្រុមភ្លេងព្រះរាជទ្រព្យក្នុងព្រះបរមរាជវាំង។ កវីវោហារសព្ទមិនចេះរីងស្ងួតរូបនេះ បានបង្កើតស្នាដៃច្រៀងផ្ទាល់មាត់ជាច្រើន ដូចជាច្បាប់ល្បើកថ្មី, ច្បាប់កេរកាលថ្មី, សេចក្តីរំលឹកដាស់តឿន, ច្បាប់ប្រដៅជនប្រុសស្រី, បណ្ដាំក្រមង៉ុយ, ក្រៅពីនេះមានស្នាដៃជាច្រើនទៀត។
បន្ថែមលើសពីនេះ លោកសូមផ្តាំផ្ញើរដល់កូនចៅខ្មែរជំនាន់នេះ និងក្រោយៗទៀត មេត្តាចងចាំ នូវកេរ្តិ៍ឈ្មោះរបស់លោកទាំង៣ដែលបានកសាងរូបសំណាកនេះ ក៏ដូចជាស្នាដៃជាច្រើនរបស់លោក និងបុព្វបុរសខ្មែរផ្សេងៗជាច្រើនទៀត ដែលបានចំណាយពេលវេលា កម្លាំង កាយចិត្ត ដើម្បីប្រជាជាតិខ្មែរយើងផងដែរ។
ជាមួយគ្នានេះ ឧកញ៉ា លី យូគៀក បានថ្លែងផ្ដាំផ្ញើដល់លោកគ្រូអ្នកគ្រូ ត្រូវខិតខំបង្រៀនសិស្សានុសិស្សឲ្យបានល្អបន្ថែមទៀត ដើម្បីឲ្យសិស្សទទួលបានចំណេះដឹងថ្មីៗបន្ថែមទៀត ក្លាយខ្លួនជាទំពាំងស្នងឬស្សី នៃប្រទេសជាតិមានដ៏រឹងមាំ ក្រោមម្លប់សុខសន្តិភាពនិងការអភិវឌ្ឍន៍ រីកចម្រើនលើគ្រប់វិស័យ ដែលមានសម្តេចតេជោ ហ៊ុន សែន ជានាយករដ្ឋមន្ត្រី។
នៅក្នុងឱកាសនោះឧកញ៉ា លី យូគៀក ក៏បានប្រគេនបច្ច័យ និងថវិកាមួយចំនួនដល់ព្រះសង្ឃ លោកគ្រូ អ្នកគ្រូសិស្សានុសិស្សដែលសរុបថវិកាអស់ ១,៧០០ដុល្លារផងដែរ៕
