(ភ្នំពេញ)៖ លោក ធឹម សំអាន អភិបាលខណ្ឌព្រែកព្នៅ នៅថ្ងៃទី១៣ ខែតុលា ឆ្នាំ២០២២ បានចុះសួរសុខទុក្ខ និងសំណេះសំណាល ជាមួយលោកគ្រូ-អ្នកគ្រូ សិស្សនុសិស្ស និងបាននាំយកអំណោយមួយចំនួន មកចែកជូនក្មួយៗសិស្សានុសិស្ស នៅសាលាបឋមសិក្សាបឹងប្រិយ៍។
នាឱកាសនោះ លោក ធឹម សំអាន បានក្រើនរំលឹកទៅដល់ក្មួយៗសិស្សានុសិស្ស ត្រូវខិតខំសិក្សារៀនសូត្រ ឲ្យក្លាយខ្លួនជាសិស្សពូកែ និងជាកូនល្អ សិស្សល្អ ជាទំពាំងស្នងឫស្សី ហើយត្រូវចៀសឲ្យឆ្ងាយពីគ្រឿងញៀន និងអំពើអបាយមុខផ្សេងៗ។
លោក ធឹម សំអាន ក៏បានអំពាវនាវដល់ក្មួយៗ ត្រូវរស់នៅស្អាត ហូបស្អាត ពោលគឺចេះធ្វើអនាម័យ ដោយលាងដៃនឹងសាប៊ូ រៀងរាល់មុនពេលញាំអាហារ ដើម្បីការពារបានការឆ្លងមេរោគ និងការពារបាននូវជំងឺកូវីដ១៩ថែមទៀតផង។
លោកអភិបាលខណ្ឌ បានបញ្ជាក់ថា ក្រៅពីក្មួយៗសិស្សានុសិស្ស ចំនួន ៦០នាក់ ទទួលបានដោយក្នុងម្នាក់ៗ រួមមាន ៖ សៀវភៅ ប៊ិក ខ្មៅដៃ ជ័រលុប និងថវិកា ចំនួន១០,០០០រៀល និង លោកគ្រូ អ្នកគ្រូ ចំនួន៥នាក់ ដោយម្នាក់ៗទទួលបាន ៣ម៉ឺនរៀល ព្រមទាំងលោកនាយកសាលាម្នាក់ បាន១០ម៉ឺនរៀលផងដែរ៕
