(ភ្នំពេញ)៖ នៅរសៀលថ្ងៃពុធ ៤កើត ខែជេស្ឋ ឆ្នាំវក ព.ស ២៥៥៩ ត្រូវនឹងថ្ងៃទី០៨ ខែមិថុនា ឆ្នាំ២០១៦នេះ លោកទេសរដ្ឋមន្រ្តី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតឲ្យលោក Ivo SIEBER ឯកអគ្គរដ្ឋទូតស្វីសនៅកម្ពុជា ដែលមាន និវេសនដ្ឋាននៅថៃ ចូលជួបសំដែងការគួរសម និង ពិភាក្សាការងារ។

ក្នុងជំនួបនេះ លោកទេសរដ្ឋមន្ត្រី បានថ្លែងអំណរគុណចំពោះ​រដ្ឋាភិបាលស្វីស ដែលតែងតែផ្តល់​កិច្ចសហប្រតិ​បត្តិការល្អជា​មួយរដ្ឋា​ភិបាល​កម្ពុជា ។

លោក Ivo SIEBER សម្តែងសេចក្តីសោមនស្សរីករាយក្នុងការចូល​ជួបសំដែងការគួរសម​ចំពោះលោកទេសរដ្ឋមន្ត្រី និងបានបង្ហាញការគាំទ្រ ចំពោះកិច្ចសហប្រតិបត្តិការជាមួយក្រសួងរៀបចំដែនដី នគរូបនីយកម្ម និងសំណង់ លើបញ្ហាប្រឈមផ្សេងៗ ដែលក្រសួងកំពុងជួបប្រទះ និងបានជម្រាបអំពីកម្មវិធីអភិបាលកិច្ចដីធ្លីនៅតំបន់មេគង្គ ដែលកំពុងធ្វើកិច្ចសហប្រតិបត្តិការ​ជាមួយបណ្តាប្រទេស​ក្នុងតំបន់ដូចជា ប្រទេសម៉ីយ៉ាន់ម៉ា ឡាវ វៀតណាម និងប្រទេសកម្ពុជាផងដែរ ក្នុងគោលបំណងជួយកសិករ​នៅតាមបណ្តាទន្លេមេគង្គ​ឲ្យយល់ដឹងអំពី​ការប្រើប្រាស់​សិទ្ធិជាម្ចាស់ដីធ្លី អនុវត្តគោល​នយោបាយ​នៃកំណែ​ទម្រង់ក្នុងវិស័យដីធ្លីផងដែរ ។

ដើម្បីប្រសិទ្ធភាពក្នុងការអនុវត្តការងារសំខាន់ៗ ដែលក្រសួងរៀបចំដែនដី នគរូបនីយកម្ម និងសំណង់ ក្រោមការចង្អុលបង្ហាញរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយក​រដ្ឋមន្ត្រី ពិសេសការចុះបញ្ជីដីធ្លីជូនប្រជាពលរដ្ឋឲ្យបានទូទាំងប្រទេស និងការដោះស្រាយទំនាស់ដីធ្លីឲ្យបានឆាប់រហ័ស។ លោកទេសរដ្ឋមន្ត្រី បានលើកឡើងថា បញ្ហាប្រឈម ដែលក្រសួងរៀបចំដែនដី នគរូបនីយកម្ម និង សំណង់ កំពុងជួបប្រទះ គឺតម្រូវការឧបករណ៍វាស់ដីសម្រាប់មន្ត្រីចុះវាស់វែងដីធ្លី និងជំនួយហិរញ្ញវត្ថុសម្រាប់មន្ត្រីចុះដោះស្រាយទំនាស់ដីធ្លី។ លោកទេសរដ្ឋមន្ត្រី បានស្នើឲ្យ​ឯកអគ្គរដ្ឋទូតស្វីស ពិនិត្យលទ្ធភាពក្នុងការជួយក្រសួងលើតម្រូវការនេះ។

ជាការឆ្លើយតប លោកឯកអគ្គរដ្ឋទូត នឹងបញ្ជូនមន្ត្រីជំនាញសហការណ៍​ជាមួយមន្ត្រីរបស់ក្រសួង ដើម្បីពិនិត្យលើតម្រូវការ​លើបញ្ហាបច្ចេក ទេសតាមសំណើររបស់ ឯកឧត្តមទេសរដ្ឋមន្ត្រី ។

លោកទេសរដ្ឋមន្រ្តី បានថ្លែងអំណរគុណចំពោះ ឯកឧត្តមឯកអគ្គរដ្ឋទូត និងសហការី នូវកិច្ចខិតខំប្រឹងប្រែងសហប្រតិបត្តិការជាមួយក្រសួង ។ ក្នុងនាមក្រសួងរៀបចំដែនដី និងនគរូបនីយកម្ម និង​សំណង់ លោកទេសរដ្ឋមន្ត្រី នឹងព្យាយាមរឹតបន្តឹង​ចំណងមិត្តភាពល្អជាមួយក្រសួង ដើម្បីបន្តនូវកិច្ចសហប្រតិបត្តិការ​ជាគុណប្រយោជន៍​សម្រាប់រាជរដ្ឋាភិបាល និងប្រជាពលជាតិ​នៃប្រទេសទាំងពីរ៕