(ភ្នំពេញ)៖ លោកទេសរដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេសកម្ពុជា និងសហប្រតិបត្តិការអន្តរជាតិ បានសំណូមពរឲ្យរដ្ឋាភិបាល ស្វីសបន្តគាំទ្រ និងជួយឧបត្ថម្ភដល់មន្ទីពេទ្យគន្ធបុប្ផា ដើម្បីជួយសង្រ្គោះជីវិតកុមារនៅកម្ពុជា។ លោក ប្រាក់ សុខុន បានបន្តថា មន្ទីរពេទ្យ គន្ធបុប្ផា គឺ ជាមន្ទីរពេទ្យ ដែលមានសារៈសំខាន់ក្នុងការជួយអាយុជីវិតប្រជាពលរដ្ឋកម្ពុជា ជាពិសេស គឺកុមារតូចៗ។

ជាការឆ្លើយតប លោក IVO SIEBER ឯកអគ្គរាជទូតស្វីសប្រចាំនៅកម្ពុជាបានឲ្យដឹងថា រដ្ឋាភិបាលស្វីស នៅតែបន្តគាំទ្រនិងជួយដល់ មន្ទីរពេទ្យគន្ធបុប្ផា បន្តទៀតទៅតាមលទ្ធភាព។ នេះបើតាមការប្រាប់ឲ្យដឹងពីលោក​ ជុំ សន្ទរី អ្នកនាំពាក្យក្រសួងការបរទេសកម្ពុជា និង សហប្រតិបត្តិការអន្តរជាតិ នៅក្រោយជំនួបពិភាក្សាការងាររវាងលោកទេសរដ្ឋមន្រ្តី ប្រាក់ សុខុន និងលោក IVO SIEBER  នៅថ្ងៃទី០៨ ខែមិថុនា ឆ្នាំ២០១៦នេះ។

លោក ​ជុំ សន្ទរី បានលើកឡើងទៀតថា ក្រៅពីការសំណូមពរនេះលោក ប្រាក់ សុខុន ក៏បានថ្លែងអំណរគុណដល់រដ្ឋាភិបាលស្វីស ជួយគាំទ្រ និងជួយឧបត្ថម្ភដល់មន្ទីរពេទ្យគន្ធបុប្ផាកន្លងមក។

សូមបញ្ជាក់ថា បច្ចុប្បន្នប្រទេសស្វីស ផ្តល់ថវិកាប្រមាណ ៤លានដុល្លារក្នុងមួយឆ្នាំ សម្រាប់ជួយទ្រទ្រង់​ដំណើរការមន្ទីរ​ពេទ្យគន្ធបុប្ផា។ រដ្ឋាភិបាលស្វីស បានជួយមន្ទីរពេទ្យគន្ធបុប្ផាតាំងពីឆ្នាំ ១៩៩៤មកម្ល៉េះ។ មកដល់បច្ចុប្បន្នទឹកប្រាក់ប្រមាណ ៥៥លានដុល្លារហើយ ត្រូវបាន រដ្ឋាភិបាលស្វីស បានជួយដល់គន្ធបុប្ផា។

លោកវេជ្ជបណ្ឌិត បេអាត រីចឆ្ទឺ ស្ថាបនិកមន្ទីរពេទ្យគន្ធបុប្ផា ធ្លាប់បានបញ្ជាក់ឲ្យដឹងថា គិតពីឆ្នាំ១៩៩២ ដល់ឆ្នាំ២០១៥ មន្ទីរពេទ្យគន្ធបុប្ផា បានចំណាយថវិកា អស់ ៥៧៣លានដុល្លារ​សហ​រដ្ឋអាមេរិក ជាការចំណាយសម្រាប់ការព្យាបាលកុមារ ដែលមានជំងឺធ្ងន់ និងចំណាយ លើការពិនិត្យព្យាបាលកុមារ ដែលមានជំងឺនៅក្នុងផ្នែកពិគ្រោះជំងឺក្រៅចំនួន ១៥លានករណី និងសម្រាប់ការ​សាងសង់មន្ទីរពេទ្យទាំងប្រាំ ព្រមទាំងការបំពាក់សំភារៈ បរិក្ខារទំនើបដើម្បីធ្វើរោគវិនិច្ឆ័យ និងការព្យាបាលនិងសម្រាប់ឱសថ និងថ្នាំសង្កូវផ្សេងៗ។

ថវិកា ៥៧៣លានដុល្លារនេះ មន្ទីរពេទ្យគន្ធបុប្ផា ទទួលបានពីរាជរដ្ឋាភិបាល ៨ភាគរយ រដ្ឋាភិបាលស្វីស៨ភាគរយ ក្រៅពីនោះបានពី សប្បុរសជន ដែលភាគច្រើនទទួលបានពីប្រជាពលរដ្ឋរស់នៅក្នុងប្រទេសស្វីស៕